2 Etimoti 1 - Ohwihwim Olehe

¹ Akpa he lo a zgi abgo me Oblus, are la a nyum oshpa ba Ekristi Eyesu. Alo o wo ekplo ba Ahogbrẽ a sheŋ a hwim angyiŋ. A hom me otum okyku o da me e lu oshpa ba esõ baŋ a hwim okyku gi, agi é hwiŋ esõ he lo okŋeobga ta la Ekristi Eyesu angyiŋ.

² Aŋo Etimoti, anwye me ba ame e klo ŋo, Ahogbrẽ la a wo Adigi, ta la Ekristi Eyesu Adigi-odne a shri okpoghwo ta la okayiekŋe, ta la opyapyaŋ a doŋ.

Ovye ta la oshishĩ

³ Ame e vye la Ahogbrẽ ba ame e la e kpo otum baŋ la esõ ekyle eka moadigi a mbo a kpo. Ame e vye la Ahogbrẽ ombamba pyeŋ la okyukyku ta la olulum omba ba ame e fa olu e tne aga boŋ.

⁴ Ame e ka amanyi boŋ o la o zhle, nga e klo e ka ŋo la esõ pyeŋ a mo, okyku o da me e kpo ovye.

⁵ Ame e yi edgu obmi ba adlidzi ba adlidzi boŋ o wo alo ma. Anaŋ anoŋ, Oluwi, ta la anoŋ Oyunesi, moa a wo la edgu obmi ba adlidzi he lo angyiŋ e ma. Ame e yi zhezheŋ boŋ o wo la edgu obmi ba adlidzi he lo a mbo.

⁶ Okyku eka he ame e dzu ŋo, o si abgo o zga gble ta la okpogbu boŋ o hwiŋ okro ba Ahogbrẽ omba ba ame e shki ŋo abgo eshri.

⁷ O wo eka he okyku eshi Ogbgaodzi ba Ahogbrẽ a shri a da gi, o la o shri eyli angyiŋ o ghwo gi egʼba mbo, ambo o shri ekʼpo ta la oklo, ta la ovueŋoghwo, angyiŋ o shri o da gi.

⁸ Aŋo o gbu anzi okyku o zgi egŋe okyku Adigi-odne ta la me la e wo oprusuna baŋ mbo. Ambo o bmi nga o kpo ewu okyku o su Oshpaodzadzi he lo, eka ba Ahogbrẽ a shri oshye a doŋ okyku lo.

⁹ Aŋa angyiŋ a shla gi, nga a bzi gi okyku o da gi e dzu moarehwĩ baŋ. A kpo ohe lo okyku ekplokyeŋ bi e kpo angyiŋ mbo, ambo okyku ekplo baŋ a sheŋ a hwim, ta la okpoghwo baŋ. Omba ba moa a kpo obiŋ hi a wo mbo a hwim baŋ a da Ekristi Eyesu á ba a shri lo á kom gi.

¹⁰ Ohuhuhi nga moa a da gi e ka lo zhezheŋ okro ba Areoshla bi Eyesu Ekristi. Okyku eshi Ekristi angyiŋ a kpo a gre ekʼpo ba eku. Okro ba Oshpaodzadzi he lo nga, aŋa a tsa gi esõ ba gbagbu-amo.

¹¹ Ahogbrẽ nga a sla me okyku o da me e su Oshpaodzadzi nga e nye moare alo.

¹² Okyku ekplo he lo angyiŋ ame e la e kpo edgu ewu he. Ambo ame e la e gbu anzi ta la otum lo mbo ku-ku. Okyku eshi ame e yi are ba ame e bmi ba adlidzi ka la ŋa. Nga ame e yi zhezheŋ baŋ a kpo a gbu baŋ á kpaŋ ekployaŋ a mbo baŋ a shri a da me ma-me o tsa Onda mi lo.

¹³ Aŋo o kpaŋ adlidzi ba ame e nye ŋo. O da lo a dzu ŋo ozhẽ ba ososõ, nga o tspi ozhẽ ba obmi ba adlidzi ta la oklo. Moahi lo a wo a bi, okyku okŋeobga bi e wo la alo ma ta la Ekristi Eyesu.

¹⁴ Ayakplo adzadzi ba moa a nye ŋo alo pyeŋ, o kpaŋ lo okro ekʼpo ba Ogbgaodzi la o dzu esõ bi.

¹⁵ Aŋo o yi eka ba areyaŋ a mbo obiŋ ba Asiya a tla me a ta ambambga. Efijilu ta la Ehemojeni a mbo, moa a tla me a ta.

¹⁶ Ahogbrẽ a bmi le, a ka moa-odne ba Onesiforu ayie-kŋe, okyku eshi a ghwo esõ nga a ba a gbu me esõ obiŋ engyi oshushku omba ba ame e wo aku.

¹⁷ Omba baŋ a gbu Oroma nga, aŋa a klo me ma-me o tsa baŋ a hwiŋ me.

¹⁸ Ame e vẽ Adigi-odne, okyku o daŋ a ka ŋa ayiekŋe Onda mi lo! Aŋo a mbo o yi eka ekplo baŋ a kpo okyku me omba baŋ a wo Afisu.