2 Ebitru 1 - Ohwihwim Olehe

¹ Akpa he lo a zgi abgo ba Esima Ebitru, la a wo awaghrẽ ta la are la a nyum oshpa ba Eyesu Ekristi. Alo a wo okyku moare la a hwiŋ obmi ba adlidzi la o wo la owlama eka ba obmi ba adlidzi bi e wo la alo ma. Moa a hwiŋ lo okro ba odlodzi ba Ahogbrẽ bi ta la Areoshla bi Eyesu Ekristi.

² Nga okpoghwo ta la opyapyaŋ, moa a dzu ka la gimi nzenze ozhẽ ba agimi e yi Ahogbrẽ ta la Eyesu Adigi-odne.

Obzi ba Ahogbrẽ ta la ososla baŋ

³ Ekʼpo baŋ ba Ahogbrẽ e shri ekployaŋ a mbo ba agi e klo okyku o da gi e dzu la odzudzu la o raŋ Ahogbrẽ esõ, ozhẽ oyioyi ba agi e yi ŋa la a bzi gi okyku o da gi e pu esesla baŋ ta la odzi baŋ.

⁴ Ozhẽ he lo angyiŋ, a shri ohwihwim la o wo la owlama ta la ogagre, a shri a da gi. O wo bimi e yga ekplo baŋ a hwim okyku gimi e khwo nga le, e ngʼba e sku okoklo la o wo oyla ototno obiŋ hi, nga e ba e pu ibu odzudzu ba Ahogbrẽ.

⁵ Okyku okũ he lo, aŋo o zga ayi ngre nga o da obmi ba adlidzi boŋ o ta ma la oshasha, nga okyku o da oshasha boŋ o sa o ta ŋa ma la oyioyi.

⁶ Nga okyku o da oyioyi boŋ o ta ma la onyuŋ-eshrizga. Nga okyku o da ovueŋoghwo boŋ o sa o ta ma la oghwo-esõ. Nga okyku o da oghwo-esõ boŋ o sa o ta ma odzudzu la o raŋ Ahogbrẽ esõ.

⁷ Nga okyku o da oklo moanáŋ o sa o ta ma la odzudzu la o raŋ Ahogbrẽ esõ. Nga okyku o da oklo o sa o ta ma la oklo moanáŋ.

⁸ Edgu ayakplo he lo angyiŋ a raŋ a gre ba agimi e wo la alo ma. Nga o wo ba agimi e wo la alo ma nzenze le, moa á da gimi e wo la oshye ta la okpogbu ibu ba oyioyi ba agimi é yi Adigi-odne Eyesu Ekristi.

⁹ Ambo are la a wo la ayakplo he lo mbo le, ayi baŋ a wo oshye ba o ka okro mbo, nga are he lo á gre esõ a ghre ba moa a kyu ŋa abgo odlobi baŋ a kpo ayga.

¹⁰ Okyku eka he nga agimi anime, agimi e zga ayi gble okyku o da obzi ba Ahogbrẽ a bzi gimi, ta la osla baŋ a sla gimi, o dzu zhezheŋ angyiŋ esõ bimi. O wo ba agimi e kpo eka he lo angyiŋ le, agimi é tsi é gbu ku-ku mbo.

¹¹ Ozhẽ he lo angyiŋ, moa á ba a shri obibmi ba ekʼpo okyku o yi Oreŋ ba gbagbu-amo ba Adigi-odne ta la Areoshla bi Eyesu Ekristi, á shri á da gimi.

¹² Okyku okũ he lo, ame é dzu gimi eshri ayakplo he lo ombamba pyeŋ. Ame e yi ba agimi e sheŋ e yi lo pyeŋ bgu, nga agimi e tspi osheshye ta la adlidzi ba agimi e sheŋ e yga.

¹³ Ame e ka lo o wo odzi ba ame e shĩ gimi, nga e da gimi e tne aga ayakplo he lo, ombayaŋ a mbo ba ame e wo ma la ayi.

¹⁴ Okyku eshi ame e yi ba ame e ta adzadzi e ngʼba e sku egʼba ba eku hi, eka ba Adigi-odne Eyesu Ekristi a lu a da me zhezheŋ.

¹⁵ Okyku eka he ame é kpo ekplo ba ame e kpo e gbu, okyku o da gimi e hwiŋ ozhẽ ba o tne aga ayakplo he lo ombayaŋ a mbo ambla ba ame e kpu.

Moaegŋe eshri ekʼpo ba Ekristi

¹⁶ E ka, agi e shri eshri bi e zga enzho ba ototno angyiŋ mbo, omba ba agi e la e su osu oba-ba ba esesla ba Adigi-odne Eyesu Ekristi. Agi e ka ekʼpo baŋ lo la ayi bi.

¹⁷ Agi e wo okro lo omba ba Ahogbrẽ la a wo Ada a shri ekʼpo a shri a daŋ. Omba lo enzi e zgi okro ba Esesla la e gre pyeŋ nga e lu mi le, Anwye me ba ame e klo ŋa angyiŋ a wo ahi ba ame e la e gno oraŋ ka la ŋa e gre eshri!

¹⁸ Agi a mbo ababgo bi e gno omba ba enzi he lo e zgi Ongyeŋ e ba obiŋ, omba ba agi e wo otsotse ka la ŋa akũ, nga omba he lo angyiŋ, a zhiŋ nga a shka ayi leleleŋ.

¹⁹ Okyku eka he agi e bmi ta la odlo ba moarehwĩ ba Ahogbrẽ a hom mo otum, a lu a ta ma-ma o ta angyiŋ. Alo o wo odzi ba agimi a mbo e ngli atuŋ e gno lo, okyku eshi odlo he lo o wo eka ba emgbuovo la e shka ayi evbu, ma-me o tsa Onda ba ayi a kre, nga ba ambzi ba endigiŋ a ba a shka ayi esõ bimi.

²⁰ Ambo ekayaŋ a mbo, agimi e la e tne aga ekplo he lo, okyku eshi arekyeŋ ababgo baŋ a kpo a gbu baŋ a wre ekplo ba moa a ka a lu Akpa ba Ahogbrẽ mbo.

²¹ Okyku eshi oshpa ba okaolu he lo o ba ondakyeŋ la okaobmye ba arehwĩ o ka mbo. Ambo Ogbgaodzi angyiŋ o tsa moarehwĩ o da mo a lu oshpa ekplo la e zgi okro ba Ahogbrẽ.