1 MoaOkorinti 7 - Ohwihwim Olehe

Ozhiozhĩ eshri eble

¹ Ohuhuhi ame é shri otnoma ba ayakplo bimi e zhĩ é shri é da gimi. O wo ba are a klo o dzu ekpla le, o wo odzi.

² Ambo okyku obile, o raŋ o gre ba arealomyaŋ a mbo a kyu ashe, nga ba asheyaŋ a mbo a kyu alom.

³ O raŋ o gre ba alom-odne a kpo ekployaŋ a mbo la e wo otum ba adaŋ-odne, nga o raŋ o gre ba ashe-odne a mbo a kpo ekployaŋ a mbo la e wo otum ba anaŋ-odne. Moa aha lo, o raŋ o gre moa a raŋ emo eso.

⁴ Ashe angyiŋ a la a kpo ekʼpo ta la egʼba baŋ mbo, alom angyiŋ a la a kpo ekʼpo ta la alo. Nga alom a la a kpo ekʼpo ta la egʼba baŋ mbo, ambo ashe angyiŋ.

⁵ Okyku eka he agimi e nyom egimi ekplo he lo mbo, ambo o wo bimi e klo e tspi omba ple okyku o fa olu angyiŋ le, o wo akplokyeŋ mbo. Ambla he nga, agimi e nyom egimi ekplo he lo nga mbo, okyku o da obile ba Eshitaŋ o bile gimi omba ba agimi e ghwo eso e gbu mbo, mbo.

⁶ Ame e jygu gimi odaŋ angyiŋ eshri odlo he lo mbo, ambo ame e bmi lo e da gimi.

⁷ Ó raŋ me eso o wo ba moare pyeŋ a wo eka ba ame e wo hi. Ambo areyaŋ a mbo a wo la edgu okpogbu ba Ahogbrẽ a shri a daŋ ma.

⁸ Ame e lu odlo he e ta moa la a kyu moarealalom mbo, pa la moa la a dzu moashe-eshaku. Alo o raŋ o gre bimi e dzu ekpla eka ba ame e dzu hi.

⁹ Ambo o wo bimi e kpaŋ eshri bimi e gbu mbo le, e kyu eble, o raŋ o gre o sku bimi e dzu eka he nga e la e kpo ekhwo ba alo.

¹⁰ Ame e wo la odaŋ ma okyku moa la a kyu eble. Odaŋ he lo nga o zgi okro me mbo, ambo o zgi okro ba Adigi-odne angyiŋ. Alo o lu mi le, O dzu omgbybi ba ashe la a kyu eble baŋ a dzu alom baŋ a zga mbo.

¹¹ O wo baŋ a dzu alom baŋ a zga le, o dzu omgbybi baŋ a dzu ekpla o mbo le aŋa a sa a bmre a nyuŋ a kpo ta la alom baŋ. Nga o dzu omgbybi ba alom a bga eble ta la ashe baŋ mbo.

¹² Ambo odaŋ ohwõ nga, Adigi-odne angyiŋ a jygu lo mbo, ambo ame e jygu lo. O wo ba are la a lu Ekristi ma a wo la ashe la a bmi ba adlidzi mbo, ambo o wo baŋ a klo o dzu ka la ŋa le, o raŋ o gre ba alom lo a kyu ŋa abgo mbo.

¹³ Nga, o wo ba ashe la a lu Ekristi ma a wo la alom la a bmi ba adlidzi mbo, nga o wo baŋ a klo o dzu ka la ŋa le, o raŋ o gre ba ashe lo a kyu ŋa abgo mbo.

¹⁴ Okyku eshi alom la a bmi ba adlidzi mbo, a kpo a gbu baŋ a zhiŋ a lu Ahogbrẽ ma okyku ashe he lo. Nga ashe la a bmi ba adlidzi mbo, a kpo a gbu baŋ a zhiŋ a lu Ahogbrẽ ma okyku alom la a lu Ahogbrẽ ma he lo. Ambo o wo ba alo o wo eka he angyiŋ mbo le, moanwye mo moa á dzu eka moanwye ba evbu ototno. Ambo ozhẽ he sha moa á ba a lu Ahogbrẽ ma.

¹⁵ Ambo o wo ba are la a bmi ba adlidzi mbo a klo o kyu are la a lu Ekristi ma abgo le, alo o wo akplokyeŋ mbo. Ozhẽ he lo, ashe o mbo le arealom la a lu Ekristi ma a wo la ozhẽ ma baŋ a kpo ekplo baŋ a klo okyku eshi Ahogbrẽ a bzi gimi okyku o da gimi e dzu opyapyaŋ angyiŋ.

¹⁶ Aŋo ashe la o lu Ekristi ma, aŋo o kpo anyu o yi ba alo o wo eheŋ-ekyeŋ boŋ o shla alom boŋ mbo? Nga aŋo alom la o lu Ekristi ma, aŋo o kpo anyu o yi ba alo o wo eheŋ-ekyeŋ boŋ o shla ashe boŋ mbo?

Agimi e dzu eka ba Ahogbrẽ a bzi gimi

¹⁷ O raŋ o gre ba areyaŋ a mbo a kpo otum ta la edgu okpo-gbu ba Adigi-odne a shri a daŋ, eka baŋ a wo omba ba Ahogbrẽ a bzi ŋa. Ame e la e nye eka he ekro pyeŋ ba Eklisiya e wo ma.

¹⁸ O wo ba are ba moa a sheŋ ŋa ongyum a yga obzi ba Ahogbrẽ le, o raŋ o gre baŋ a ghre lo mbo. Nga o wo ba are ba moa a sheŋ ŋa ongyum mbo a yga obzi ba Ahogbrẽ le, aŋa a da mo a sheŋ ŋa ongyum okyku lo mbo.

¹⁹ Okyku eshi osheŋongyum o wo akplokyeŋ angyiŋ mbo. Okpaŋ odlo ba Ahogbrẽ angyiŋ o wo la owlama.

²⁰ O raŋ o gre ba areyaŋ a mbo a dzu eka baŋ a wo omba baŋ a yga obzi ba Ahogbrẽ.

²¹ Aŋo o wo awaghrẽ angyiŋ omba ba Ahogbrẽ a bzi ŋo? Aŋo o ngʼba esõ-ekyeŋ ku-ku mbo. O wo boŋ o hwiŋ ozhẽ okyku o doŋ o dzu are la a dzu eŋa-eŋa le, aŋo o kpo otum ta la ozhẽ he lo.

²² Okyku eshi awaghrẽ ba Adigi-odne a bzi ŋa a wo are ba Adigi-odne a shla ŋa. Nga are la a wo odzudum ma ba Ekristi a bzi ŋa, a dzu awaghrẽ ba Ekristi angyiŋ.

²³ Ahogbrẽ a gbmo gimi la ekplo la e wo la egbmo nzenze. Okyku eka he, agimi e dzu moawaghrẽ ba arekyeŋ ku-ku mbo.

²⁴ Agimi anáŋ, o raŋ o gre ba areyaŋ a mbo a dzu ekpom ta la Ahogbrẽ, eka baŋ a wo omba ba Ahogbrẽ a bzi ŋa.

Ozhiozhi eshri moaekpla pa la moashe-eshaku

²⁵ Ohuhuhi, odlo eshri moaekpla. Odaŋ he lo o wo o ba Adigi-odne angyiŋ mbo, ambo ame e lu eka ba ame e ka angyiŋ, eka ba are ba Adigi-odne a bmi ka la ŋa okyku oka-yiekŋe baŋ.

²⁶ Ambo eka edgu odzudzu ba ewu ohuhuhi, ame e ka alo o raŋ o gre ba are a dzu eka baŋ a wo.

²⁷ Aŋo o wo la ashe ma? O wo ba alo o wo eka he le, aŋo o tla ŋa mbo. Aŋo o wo la ekpla? O wo eka he le, aŋo o kyu ashe mbo.

²⁸ Ambo aŋo o kpo odlobi angyiŋ mbo o wo boŋ o kyu ashe. Nga o wo ba ashe a kyu alom le, aŋa a kpo odlobi angyiŋ mbo. Ambo ame e klo e fa ewu ba elulum ba moa edgu he lo a la a kpo e ra angyiŋ.

²⁹ Ame e zga aga eso me eka he. Agimi anáŋ, omba o ra ple sha a mo. Okyku eka he, o zga esĩ ohuhuhi, moa la a kyu moashe a dzu eka moare la a kyu moashe mbo,

³⁰ nga moa a la a wu okũ eka moare ba eso e ka e tpi mo ayi mbo, nga agimi la e ŋo eka moare la a wo la ovye ma mbo, nga agimi e la e gbmo eka ba moa la a wo ekplo ba moa a gbmo lo ma mbo.

³¹ Nga e dzu eka moa la a ta owyi ta la ayakplo ba obiŋ hi, ambo ba aga mo a wo anzho he lo mbo. Okyku eshi eka ba obiŋ hi o wo ohuhuhi, alo ó ta abyi ó gre eka he nga mbo.

³² Okyku eka he ame e klo bimi e ghwo eso. Are la a kyu ashe mbo, a sko eshri baŋ a zga okyku otum ba Adigi-odne lo, okyku eshi aŋa a la a kpo lo okyku o raŋ Adigi-odne eso angyiŋ.

³³ Ambo are la a kyu ashe a la a sko eshri baŋ a zga ekhwo ba odzudzu obiŋ hi, okyku eshi aŋa a klo o raŋ ashe baŋ eso.

³⁴ Okyku eka he aga baŋ a gʼba aha. Nga ashe la a kyu alom mbo, ta la ola anwyeshe la a kyu alom mbo, moa a la a sko eshri mo a zga okyku o kpo otum ba Adigi-odne, okyku eshi moa a klo o shri egʼba mo ta la eso mo o da Ahogbrẽ sha. Ambo ashe la a kyu alom a la a shri eshri baŋ a la a da odzudzu ba obiŋ hi sha, okyku eshi aŋa a klo o raŋ alom baŋ eso.

³⁵ Ame e la e lu odlo eka he okyku eshi ame e klo e kpo e ghwo la gimi. Ame e klo e shri ekplokyeŋ la e lbi angyiŋ e shri e zga eshri bimi mbo. Ambo ame e klo bimi e kpo ekplo la e raŋ e gre nga ba alo e wo shasha, nga agimi e shri eshri bimi e shri e di okyku otum ba Ahogbrẽ la eso ekyekyeŋ.

³⁶ Eshri moare la a klo o kyu eble, ambo ba moa a sa a klo nga mbo ambla le, o wo ba alom lo a yi ba odzudzu baŋ ta la anwyeshe lo, ba alo o wo kye mbo nga ba eso baŋ e dzu e gbu mbo, nga o wo baŋ a ka ba alo o raŋ o gre ba moa a kyu eble, alo o wo odzi ba moa a kyu eble eka ba alom lo a klo. Ekplo-kyeŋ ba odlobi e wo ma mbo.

³⁷ Ambo o wo ba arealom eshrishri eŋa angyiŋ a klo o kyu ashe mbo, o wo baŋ a kpo a gbu baŋ a dzu eka he bgu le, alo o wo odzi o wo baŋ a klo o kyu anwyeshe lo mbo.

³⁸ Okyku eka he, alo o wo odzi o wo ba are a kyu anwyeshe, ambo alo wo odzi o gre o wo ba are a kyu mbo.

³⁹ Ashe la a kyu alom a wo la ozhẽ ma okyku o kyu arehwõ mbo o wo ba alom baŋ a wo ma ka la ŋa, ambo o wo ba alom baŋ a kpu le, ashe lo a kpo a gbu baŋ a kyu are baŋ a klo. Ambo o dzu omgbybi baŋ a kyu are la a lu Ekristi ma.

⁴⁰ O wo baŋ a dzu eŋaŋa a mbo aŋa á gno oraŋ á gre eka baŋ a kyu eble. Ame e ka eka he angyiŋ. Eka ba ame e ka, ame a mbo e wo la Ogbgaodzi ba Ahogbrẽ ma.