1 MoaOkorinti 4 - Ohwihwim Olehe

Moa la a nyum oshpa ba Ekristi

¹ O raŋ o gre ba agimi e sko gi e zga eka moawaghrẽ ba Ekristi angyiŋ. Moa a shri eshyẽ ba adlidzi ba Ahogbrẽ a ghwo gi angyiŋ abgo.

² Akplokyekyeŋ ba moa a klo ibu are ba moa a shri edgu otum he a ghwo ŋa abgo, moa a klo baŋ a kpo adlidzi ta la adaŋ-odne.

³ Ambo ohuhuhi, ame e da eso e la e ngʼba me okyku bimi e sla ba o sõ me ombgu mbo, o wo bimi e sõ me ombgu la odzudzu ba arehwĩ a mbo. Ame e la e sõ eme ombgu mbo.

⁴ Ame e yi ekplokyeŋ la e wo eshre eso me mbo, ambo alo o tsa ba ame e wo la akpu ma mbo angyiŋ mbo. Adigi-odne sha a kpo a gbu baŋ a sõ me ombgu.

⁵ Arekyeŋ a sõ arekyeŋ ombgu ayga a da omba lo o kpo mbo. Ombgu ba amom-abgo, moa á sõ lo omba ba Adigi-odne á ba. Adigi-odne á se ayakplo la a ghre mgbyi-mgbyiŋ eso moarehwi á ta edzi. Omba he lo angyiŋ, are-yaŋ a mbo á ba a yga otsom ba alo o raŋ o gre baŋ a hwiŋ lo okro ba Ahogbrẽ.

⁶ Okyku gimi anáŋ sha angyiŋ, ame e la e ta egŋe eshri ba Apolos ta la eme. Ame e kpo otum ta la egi eka egŋe angyiŋ, okyku o da gimi e yi onyenye ba odlo la o lu la, Agimi e la e kpaŋ odaŋ adzadzi. O raŋ o gre ba arekyeŋ eshki bimi a nyom egʼba okyku arekyeŋ nga a la a dzĩ arekyeŋ mbo.

⁷ Ayi angyiŋ a kpo ŋo a doŋ o wo la anyuanyuŋ o gre moahwõ? Ahogbrẽ angyiŋ a shri ekployaŋ a mbo boŋ o wo la alo ma a shri a doŋ mbo? Okyku eka he, okyku eshi aŋo o nyom egʼba eka ba moa a shri ayakplo he lo a shri a doŋ ototno angyiŋ mbo?

⁸ Agimi e sheŋ e hwiŋ ekployaŋ a mbo ba agimi e klo bgu! Agimi e sheŋ e wo la angyiŋ ma bgu! Ohuhuhi agimi e wo moareŋ a mo, ambo agi ko mbo! Ambo agimi e wo moareŋ ba adlidzi angyiŋ e mbi, agi a mbo e dzu moareŋ otsotse ka la gimi.

⁹ Ambo eka ba ame e ka, o dzu mbo Ahogbrẽ a shri okro moa a la a tsi lo a ghwo ayi mbo angyiŋ a shri a da gi la e nyum oshpa. Agi e wo eka moarehwi ba moa a sõ mo ombgu ba eku nga, ba moa á ba a bga mo eyayi ba moare. Nga o dzu ekplo ba okayi okyku obiŋ hi pyeŋ, pa la moanwyeadga ba Ahogbrẽ, pa la moarehwi.

¹⁰ Okyku Ekristi angyiŋ agi e dzu moadro, ambo agimi e dzu moarehwi ba okaobmye eshko ba Ekristi! Agi e gbu akpgo, ambo agimi e hwiŋ oshye. Moa a dzĩ gi, ambo agimi e hwiŋ ekekʼpo angyiŋ!

¹¹ Ma-me o ta ohuhuhi oŋo ta la embyle e la e kpo gi ekŋe, nga agi e la e ygi akagre aknye, nga moa a la a bga gi andzu, nga agi e la e dzi ababgo,

¹² nga agi e la e kpo otum ngre okyku o vgi eshri bi. Omba moare a ta ogbukyu a ygi gi, agi e fa anyuadzi angyiŋ e ygi mo, nga omba moare a kpo gi ewu nga, agi e ta eso bi akpyli.

¹³ Nga omba moare a dzĩ gi, agi e tno mo ma la eso ble-ble. Agi e dzu otutuŋ ototno pa la mo, nga agi e dzu ekro ba obiŋ hi ma-me e bli ohuhuhi!

¹⁴ Ame e ta gimi edgu akpa hi, okyku o da gimi e gbu anzi angyiŋ mbo, ambo ame e ta lo okyku o da me e nye gimi eka moanwye ba ame e klo mo.

¹⁵ Odzudzu bimi ba Ekristi, o wo bimi e wo moare la a nye gimi e gbu ezbiokʼpo a mbo, agimi e wo la ada akyekyeŋ sha e ma. Okyku odzudzu bimi ba Ekristi, ame e dzu adigimi, okyku eshi ame angyiŋ e shri Oshpaodzadzi e da gimi.

¹⁶ Okyku eka he, ame e vẽ gimi, agimi e la e kpo ayakplo eka ba ame e la e kpo.

¹⁷ Okyku eka he lo angyiŋ, ame e hom Etimoti otum okro bimi. Aŋa a wo anwye me eshko ba Adigi-odne ba ame e klo ŋa nga la a wo adlidzi. Á dzũ gimi eka ozhẽ ba ame e la e sõ ibu ba eso elehe la e wo okro ba Ekristi Eyesu, nga ba ame e la e nye Eshki ba Ekristi okroyaŋ a mbo.

¹⁸ Moakyeŋ eshki bimi a la a nyom egʼba, moa a la a ka ma o dzu mbo ma ame é ba okyku o kpre gimi e ka mbo.

¹⁹ O wo ba Adigi-odne a bmi le, ame é ba okro bimi e ta adzadzi. Omba he lo angyiŋ ame é ba e ka eka ekplo ba moa la a nyom egʼba he lo a kpo a gbu. Ame e klo o gno ekplo moa a lu a gbu sha mbo!

²⁰ Okyku eshi Oreŋ ba Ahogbrẽ o wo okyku olulu sha mbo, ambo o wo ekʼpo angyiŋ.

²¹ Oyaŋ agimi e klo e gre? Agimi e klo ba ame e ba okro bimi la omgbom le, la oklo pa la obeble?