1 MoaOkorinti 2 - Ohwihwim Olehe

Oshpa eshri Ekristi la a wo egŋe aki

¹ Agimi anáŋ, omba ba ame e ba okro bimi okyku o nyum eshyẽ ba adlidzi ba Ahogbrẽ e da gimi, ame e ka e kpo otum la amgboŋ odlo la a wo la ewu a gre eshri mbo, nga ame e ka e tsa gimi oyioyi ogagre angyiŋ mbo.

² Ame e sko e zga eso me, ba ame é ba e nyum oshpa ba Eyesu Ekristi sha é da gimi omba ba ame e wo ka la gimi. Ame é shĩ odlo eshri eku baŋ a kpu egŋe aki angyiŋ nzenze.

³ Okyku eka he nga, omba ba ame e ba okro bimi, ame e wo la oshye ma mbo nga egʼba e la e zhga me ara okyku eyli.

⁴ Ame e ka e lu odlo nga e nyum oshpa la oyioyi ba okaobmye ba arehwĩ angyiŋ mbo, ambo ame e kpo lo la adlidzi la a tsa ozhiozhiŋ, la ekʼpo ba Ogbgaodzi ba Ahogbrẽ angyiŋ.

⁵ Okyku eka he, obmi ba adlidzi bimi o wo ma okyku okaobmye ba arehwĩ angyiŋ mbo, ambo okyku ekʼpo ba Ahogbrẽ.

Okaobmye ba Ahogbrẽ

⁶ Ambo ame e la e lu odlo la okaobmye e ygi moare la a bli la Ogbgaodzi. Ambo okaobmye he lo o wo okaobmye edgu o ba obiŋ hi angyiŋ mbo, o wo eka ekʼpo la e ri ekʼpo obiŋ hi angyiŋ mbo. Edgu ekʼpo he lo e la e khwo.

⁷ Okaobmye ba ame e kpo otum ta la lo hi, o wo eshyẽ ba okaobmye ba Ahogbrẽ angyiŋ. Moa a ghre moarehwi la edgu okaobmye he lo. Ahogbrẽ a sheŋ a sla lo okyku o da gi e hwiŋ ekekʼpo. Aŋa a kpo ohe lo ayga moa a kpo obiŋ hi.

⁸ Are-kyeŋ eshki moa la a ri ekʼpo obiŋ hi a wo la edgu okaobmye he lo e mbi, moa a kũ Adigi-odne la a wo esesla, ekusa egŋe aki mbo.

⁹ Ambo eka ba Akpa ba Ahogbrẽ a lu mi le, Ekplo ba arekyeŋ a ka, o mbo le a gno a ka ku-ku mbo, Ekplo ba arekyeŋ a tne aga a fu ma ba alo é kpo mbo, Ahogbrẽ a nyiŋ ohe lo angyiŋ a kpo lo okyku moa la a la a klo ŋa.

¹⁰ Ambo Ahogbrẽ a hwile eshyẽ baŋ a da gi angyiŋ e ka. A kpo ohe lo ozhẽ ba Ogbgaodzi baŋ. Ogbgaodzi angyiŋ o la o mbga ekployaŋ a mbo o ka. O la o mbga okoklo ba Ahogbrẽ la o wo ogyugyuŋ a mbo.

¹¹ Ambo okro ba arehwĩ, ayaŋ ba eso baŋ sha angyiŋ a yi eka baŋ a wo. Ekakahelo angyiŋ, o wo le Ogbgaodzi ba Ahogbrẽ sha o yi eka baŋ a wo.

¹² Agi e yga ogbga ba obiŋ hi angyiŋ mbo, ambo agi e yga Ogbgaodzi ba Ahogbrẽ a da lo o ba, okyku o da gi e ka ekployaŋ a mbo ba Ahogbrẽ a shri a da gi e bmye.

¹³ Okyku eka he agi e la e lu odlo la okaobmye ba odlo ba arehwĩ a nye angyiŋ mbo, ambo la okaobmye ba Ogbgaodzi o nye, omba ba agi e la e wre ayakplo ba adlidzi ba Ogbgaodzi e ygi moarehwi la a wo la Ogbgaodzi ma.

¹⁴ Ambo are la a wo la Ogbgaodzi ma mbo le, aŋa a kpo a gbu baŋ a yga ototno la o zgi okro ba Ogbgaodzi ba Ahogbrẽ he lo o ba mbo. A kpo a gbu baŋ a ka lo a bmye mbo ku-ku. Alo o dzu o ba adro angyiŋ ka la ŋa, okyku eshi are a kpo a gbu baŋ a ka olbi mo a bmye ozhẽ ba Ogbgaodzi sha.

¹⁵ Are ba Ogbgaodzi o wo ka la ŋa le, a kpo a gbu baŋ a ka olbi ba ekployaŋ a mbo, ambo arekyeŋ a sõ ŋa ombgu a gbu mbo.

¹⁶ Akpa ba Ahogbrẽ a lu mi le, Ayi a yi eso ba Adigi-odne? Ayi a shri ebra odlo a daŋ a gbu? Ambo agi e wo la aga ba Ekristi angyiŋ.