1 MoaOkorinti 16 - Ohwihwim Olehe

Ofaodi okyku moanáŋ la a bmi ba adlidzi

¹ Ohuhuhi, odlo eshri amgbaŋ ba moa a ba a klo okyku o yi o kpo o ghwo la moarehwi ba Ahogbrẽ la a wo obiŋ ba Eyahuda. O raŋ o gre bimi e kpo eka ba ame e da moaEmisiya pyeŋ a kpo obiŋ ba Egalasiya.

² Olum onda ba ori ba asatiyaŋ a mbo, o raŋ o gre ba areyaŋ a mbo eshki bimi a shri ogʼba okyeŋ eshki amgbaŋ baŋ a hwiŋ asati lo a shri a di okyku o da lo o kpo ewu omba ba ame e ba mbo.

³ Ambla ba ame e ba, ame é da moarehwi ba agimi e bmi pa la mo é da mo a shri akpekpa ta la okpoghwo lo á shri á kom mo osku ba Orushalima.

⁴ O wo ba alo o wo odzi ba ame a mbo e yi le, moa á dzi otsotse pa la me.

Ohwihwim ba Oblus

⁵ Ambla ba ame e gre obiŋ ba Amasidoniya bgu le, ame é ba okro bimi, okyku eshi ame e zga eso ba o sõ Amasidoniya.

⁶ Ame e zga eso ba o ta abyi ple ka la gimi. O dzu mbo ame é dzu ahe ka la gimi omba afpe pyeŋ. Ambla he nga, agimi e kpo e gbu bimi e kpo e ghwo la me okyku o da me e tspi la odzi me mbo. Ame e klo bimi e kpo e ghwo la me okyku okroyaŋ a mbo ba ame é ba e yi.

⁷ Okyku eshi ame e klo e ka gimi la omvromvro mbo. Ame e la e ka ayi ozhẽ ba ame é ba e ta abyi ple ahe lo ka la gimi o wo ba Adigi-odne a bmi le.

⁸ Ambo ame e zga eso ba o dzu osku ba Afisu ma-me o tsa onda ba Epentakos.

⁹ Ozhẽ o lom ahe lo pim okyku o kpo anyuŋ otum ogagre. Moafpu nzenze a wo ahe lo ambo alo o wo akplokyeŋ mbo.

¹⁰ O wo ba Etimoti a ba okro bimi le, agimi e yga ŋa la ovyevye, okyku eshi a la a kpo otum okyku Adigi-odne eka ba ame a mbo e kpo otum okyku Adigi-odne.

¹¹ Arekyeŋ a dzĩ ŋa mbo, ambo o raŋ o gre bimi e kpo e ghwo la ŋa okyku o daŋ a dzi odzi baŋ pyapyaŋ, okyku o daŋ a bmre a ba okro me. Ame nga e la e ka ayi ozhẽ okyku oba-ba baŋ pa la moa-náŋ.

¹² Nga odlo eshri anime Apolos, ame e la e shĩ ŋa ma a ba pa la moanáŋ ahwõ okyku o kpre gimi o ka. Ambo aŋa nga a zga eso okyku o ba ohuhuhi mbo. Ombayaŋ a mbo baŋ a hwiŋ anvaŋ bgu le, aŋa á ba.

Odlo ba amom-abgo

¹³ Agimi e la e nyuŋ e ka, nga e tspi osheshye obmi ba adlidzi. E dzu moarealom nga e zga gble.

¹⁴ E kpo ekplo-yaŋ a mbo la oklo.

¹⁵ Agimi e sheŋ e yi odlo eshri ba Estifanu pa la moa-odne baŋ. Moa angyiŋ a wo moarehwi ba oriori eshki moaEgrise la a shiŋ a lu Ekristi ma, nga moa a shri eshri mo a da Ahogbrẽ okyku otum baŋ. Ame e vẽ gimi anáŋ,

¹⁶ okyku o da gimi a mbo e kpo edgu ekplo moahi lo a mbo a kpo. Nga e kpo eka ba areyaŋ a mbo la a kpo otum pa la mo.

¹⁷ Ame e gno oraŋ e gre eshri okyku oba-ba ba Estifanu ta la Ofotunatu ta la Akeku. Agimi e wo ahe mbo a mbo, moa a da me e wo ezizgi.

¹⁸ Moa a da eso e gbu me obiŋ eka moa a da lo e gbu gimi obiŋ. Edgu moarehwi hi, moa a raŋ ba moa a kyu mo abgo a ta mbo.

¹⁹ MoaEklisiya pyeŋ ba ogʼba obiŋ ba Asiya moa a shko gimi. Akila ta la Ebriskila, ta la Eklisiya la a la a shki eshki odne mo, moa a shko gimi la oshko adlidzi ba Ekristi.

²⁰ Moanáŋ pyeŋ la a wo ahe, moa a shko gimi. Nga agimi e shko areyaŋ a mbo la oshko ba oklo.

²¹ Ekplu he nga, ame Oblus e ta lo ababgo me angyiŋ. Oshko o zgi okro me Oblus.

²² Areyaŋ a mbo la a klo Adigi-odne mbo le, a ba eshri baŋ! Amaranata, o dzu, Adigi-odne o ba!

²³ Okpoghwo ba Adigi-odne Eyesu nga o dzu ka la gimi.

²⁴ Oklo me nga o dzu ka la gimi pyeŋ la e wo ozhẽ ba Ekristi Eyesu.