1 MoaOkorinti 15 - Ohwihwim Olehe

Oksongybi ba Ekristi

¹ Nga ohuhuhi, ame e klo e dzũ gimi anáŋ, eshri Oshpaodzadzi ba ame e nyum e ygi gimi. Agimi nga e yga lo, nga eshri lo angyiŋ obmi ba adlidzi bimi o tspi osheshye.

² Alo angyiŋ o wo Oshpaodzadzi, oshpa he lo angyiŋ ame e nyum e ygi gimi. Agimi é gro okro oshpa he lo o wo bimi e yga lo osheshye le, o wo le obmi ba adlidzi bimi o wo otum ba ototno angyiŋ.

³ Ame e shri ekployaŋ a mbo ba ame e yga angyiŋ e shri e da gimi. E wo anyuanyuŋ nzenze. O wo adlidzi eka moa a ta Akpa ba Ahogbrẽ ma Ekristi a kpu okyku odlobi bi pyeŋ.

⁴ Moa a ngybi ŋa a khwo nga, olum ba otra moa a kso ŋa ongybi eka ba moa a ta Akpa ba Ahogbrẽ.

⁵ Ambla he nga a da Ebitru a ka ŋa, ambla he nga moa la a nyum oshpa otsko lo pyeŋ.

⁶ Ambla he nga a sa a da moare endgaetno la a lu ŋa ma a ka ŋa omba okyekyeŋ. Moa nzenze eshki moahi lo a yi a wo ma la ayi, ambo moakyeŋ a sheŋ a kpu bgu.

⁷ Ambla he nga a da Eyakubu a ka ŋa, ambla he nga a da moa la a nyum oshpa pyeŋ a ka ŋa.

⁸ Ame e wo eka are ba moa a mbre ŋa la egbregbre, ambo amom-abgo ekpyemgbyeŋ nga, aŋa a da me a mbo e ka ŋa.

⁹ Okyku eshi ame angyiŋ e wo are la a nyum oshpa ba moa a tsi a ghwo ayi mbo ku-ku. Ame e ka e tse ma moa a bzi me ma are la a nyum oshpa mbo ku-ku, okyku eshi ame angyiŋ e kpo Eklisiya ba Ahogbrẽ efye.

¹⁰ Ambo okyku okpoghwo ba Ahogbrẽ angyiŋ, ame e zhiŋ e dzu eka ba ame e wo hi. Nga okpoghwo baŋ a kpo a ghwo la me, alo o wo o ba ototno angyiŋ mbo, okyku eshi ame e kpo otum lo osheshye e gre moahwõ pyeŋ la a nyum oshpa. Ambo o wo eka he okyku ba ame angyiŋ e klo mbo, ambo okpoghwo ba Ahogbrẽ angyiŋ o la o kpo otum pa la me.

¹¹ Okyku eka he nga, o wo ba alo o zgi okro mo o mbo le okro me, oshpa bi e la e nyum lo o wo eshri ohe lo angyiŋ. Nga agimi e bmi ba adlidzi ta la alo.

Oksongybi bi

¹² Ohuhuhi, agi e la e nyum oshpa e lu mi ma Ekristi a kso ongybi. Alo o kpo anyu moakyeŋ eshki bimi a lu ma moa la a sheŋ a kpu bgu á kso ongybi nga mbo?

¹³ O wo ba ohe lo o wo adlidzi angyiŋ le, o dzu eka ba Ekristi a kso ongybi mbo.

¹⁴ Nga o wo ba Ekristi a kso ongybi mbo le, agi e wo la ekplokyeŋ ba o nyum oshpa eshri lo mbo, nga agimi a mbo e wo la ekplokyeŋ ba o bmi ba adlidzi ta la alo mbo.

¹⁵ Ekplo la e gre nga, alo o dzu eka bi e la e sheŋ akpro angyiŋ e ghwo Ahogbrẽ, okyku eshi agi e lu mi ma Ahogbrẽ a kso Ekristi eku. O ba alo o wo he, o wo ba moa la a kpu á kso ongybi mbo adlidzi angyiŋ le, o dzu eka ba Ahogbrẽ a kso Ekristi ongybi mbo.

¹⁶ O wo ba moa la a kpu á kso ongybi mbo le, o dzu eka ba Ekristi a mbo a kso ongybi mbo.

¹⁷ Nga o wo ba Ekristi a kso ongybi mbo le, obmi ba adlidzi bimi o wo otum ba ototno, nga agimi e yi e wo ewu ba odlobi angyiŋ.

¹⁸ Nga alo ó dzu eka ba moare la a bmi ba adlidzi ta la Ekristi, ba moa á tpi ayi omba ba moa a kpu.

¹⁹ O wo ba okayiozhẽ bi eshri Eyesu o wo okyku oraŋ ba ohuhuhi sha le, o raŋ o gre ba moa a ka gi ayiekŋe a gre areyaŋ a mbo obiŋ hi.

²⁰ Ambo alo o wo adlidzi angyiŋ ba moa a kso Ekristi ongybi. O dzu egŋe ba areyaŋ a mbo la a kpu á ba a kso ongybi.

²¹ Eka ba eku e gre e ba ozhẽ ba arehwĩ, ekakahelo okokso eku ó ba o ba ozhẽ ba arehwĩ.

²² Eka ba moarehwi pyeŋ a kpu okyku okŋeobga mo ta la Adamu, ekakahelo, moa á kso moarehwi pyeŋ eku okyku okŋeobga mo ta la Ekristi.

²³ Moa a nyunyiŋ angyiŋ. Alo o sheŋ o kpo la Ekristi bgu, ó kpo pa la moa la a wo a ba Ekristi omba baŋ á ba a ba.

²⁴ Omba he lo angyiŋ, eygi é ba e ba. Ekristi á kpo ekʼpo ta la egbgabi la e ri ekʼpo pyeŋ, nga Ekristi á shri Oreŋ lo á shri á da Ahogbrẽ la a wo Ada.

²⁵ Okyku eshi o dzu omgbybi ba Ekristi á ri oreŋ o tsa ba Ahogbrẽ á kpo á gre moafpu ŋa pyeŋ, nga á da mo a kŋe a shki obiŋ egi ayi baŋ.

²⁶ Afpu ba amom-abgo ekpyemgbyeŋ ba moa á ba a kpo á gre ŋa angyiŋ a wo eku.

²⁷ Okyku eshi Akpa ba Ahogbrẽ a lu mi le, Ahogbrẽ a da ekployaŋ a mbo e kne e shki obiŋ egi ayi baŋ. Alo o wo zhezheŋ ba agimi e shri Ahogbrẽ la a da ayakplo pyeŋ a dzu abgo ba Eyesu e ghwo eshki anzho he lo mbo.

²⁸ Ambo omba ba moa a shri ekployaŋ a mbo a shri a ghwo abgo ba Ekristi okyku o daŋ a ri ekʼpo pa la mo, omba he lo angyiŋ, aŋa, Anwye lo, á shri eŋa á ghwo abgo ba Ahogbrẽ la a shri ekployaŋ a mbo a ghwo abgo baŋ. Nga Ahogbrẽ á ri ekʼpo pyeŋ eshri ekployaŋ a mbo.

²⁹ Nga eshi é ba e kpo pa la moare ba moa a kpo mo abaptisma okyku moa la a kpu? Moa a la a ka ayi ozhẽ okyku o bli eshi angyiŋ? O wo ba alo o wo adlidzi eka moa a lu ma moa la a sheŋ a kpu bgu á kso eku mbo le, okyku eshi moa a kpo mo abaptisma okyku moare la a kpu?

³⁰ Nga okro bi, okyku eshi agi e la e shri eshri bi e ghwo ewu ombamba pyeŋ?

³¹ Agimi anáŋ, ame e la e ka eku elelum! Oraŋ ba ame e wo la alo ma okyku gimi ibu odzudzu ba Ekristi Eyesu Adigi-odne angyiŋ, o da me e lu eka he.

³² O wo ba ame e kpo ambgu ta la ébyi akla osku ba Afisu okyku oklo ba eso ba arehwĩ angyiŋ, ame é hwiŋ owlamakyeŋ? Enzho lo nga e lu mi le, Agimi e da gi e ri nga e wa okyku eshi akyi agi é kpu. O wo ba moa la a sheŋ a kpu á ba a kso eku angyiŋ mbo le, e da gi e kpaŋ enzho he lo.

³³ Agimi e da mo a bile gimi mbo! Moakyeazba la a wo abi a tpi eda edzi ayi.

³⁴ Agimi e bmre e nyuŋ eshri bimi e zga nga e kyu ezhẽ ba ayakplobi abgo. Ame e lu e da gimi, alo o wo ekplo ba anzi angyiŋ okro bimi, okyku eshi moakyeŋ eshki bimi a yi Ahogbrẽ mbo.

Egʼba la é ba e kso eku

³⁵ Areabze á zhĩ á lu mi le, Moa á kpo anyu á ba a kso moa la a sheŋ a kpu eku? Omba mi lo, moa á wo la edgu egʼbayaŋ?

³⁶ Aŋo adro arehwĩ! Omba boŋ o fu eyi emakyeŋ obiŋ le, alo é fu owyi mbo o wo le é kpu ayga.

³⁷ Ambo aŋo o la o fu eyi angyiŋ obiŋ. O dzu mbo eyi esekʼpa, o mbo le edgu eyikyeŋ. Ambo aŋo o la o fu esĩ ema lo angyiŋ mbo.

³⁸ Ahogbrẽ angyiŋ a shri edgu egʼba baŋ a klo a shri a da eyi ema lo. Aŋa a da edgu eyiyaŋ a mbo e wo la edgu egʼba baŋ e ma.

³⁹ Ebyi ba ama la a wo la eso ma pyeŋ, e wo edgu ekyekyeŋ angyiŋ mbo. Moarehwi a wo la edgu ebyi egʼba mo ma. Ebyi akla a mbo e wo la edgu ebyi egʼba mo ma, nga awunu a wo la edgu ebyi egʼba mo ma, nga atsa a wo la edgu ebyi egʼba mo ma.

⁴⁰ Egʼba ba ongyeŋ ta la egʼba ba obiŋ hi e wo ma. Ozba o wo egʼba ba ongyeŋ lo, nga edgu ozbakyeŋ nga o sa o wo egʼba ba obiŋ hi.

⁴¹ Olum o wo la edgu ozba baŋ ma, ohwa a mbo o wo la edgu ozba baŋ ma, nga eyi enzo a mbo e wo la edgu ozba mo ma, ambo eyi enzo moa a wo la edgu ozba okyekyeŋ angyiŋ mbo. Moa a wo la alo andandandim.

⁴² Alo o wo eka he angyiŋ omba ba moa á kso moa la a sheŋ a kpu eku. Omba ba moa a ngybi egʼba lo, alo e wo edgu egʼba la é ba e kpu, ambo omba ba alo é kso, alo é dzu egʼba la é kpu ku-ku nga mbo.

⁴³ Omba ba moa a ngybi lo alo e wo edzi mbo, nga e wo oshye mbo, ambo omba ba alo é kso, alo é wo la ozba nzenze nga é wo la oshye.

⁴⁴ Omba ba moa a ngybi lo, alo e wo egʼba ba ebyi he angyiŋ, ambo omba ba alo é kso, alo é dzu egʼba ba ogbga. O wo adlidzi ba egʼba ba ebyi e wo ma, okyku eka he alo o wo zhezheŋ angyiŋ ba egʼba ba ogbga a mbo e wo ma.

⁴⁵ Okyku eshi odlo Ahogbrẽ o lu mi le, Adamu arehwĩ ba oriori, moa a kpo ŋa a daŋ a dzu arehwĩ la e wo la ayaŋ ba eso ma, ambo Adamu ba amom-abgo ekpyemgbyeŋ, a wo Ogbga ba Ahogbrẽ la a shri eso a shri a di angyiŋ.

⁴⁶ Ambo aŋa la a wo a ba ogbga a ba ori mbo, ambo a ba egʼba ma angyiŋ a ba ori, ambla he nga a ba ogbga a ba.

⁴⁷ Adamu ba oriori moa a kpo ŋa la obiŋ hi angyiŋ. Adamu ba oha nga a zgi Ongyeŋ a ba.

⁴⁸ Moare-hwĩ ba obiŋ hi, moa a wo eka ba are ba moa a kpo ŋa la obiŋ hi, nga moarehwi ba Ongyeŋ moa a wo eka ba are la a zgi Ongyeŋ a ba.

⁴⁹ Eka ba agi e wo la edgu egʼba ba arehwĩ ba moa a kpo ŋa la obiŋ hi, ekakahelo angyiŋ, agi é ba e dzu la edgu egʼba ba Arehwĩ la a zgi Ongyeŋ a ba.

⁵⁰ Agimi anáŋ, alo o wo eka he angyiŋ. Ekplo la e wo ozhẽ ba egʼba ta la amanzhli le, e kpo e gbu ba alo e gre Oreŋ ba Ahogbrẽ mbo, nga ekplo la e wo la egʼba la é ba e kpu, e kpo e gbu ba alo e zhiŋ e dzu la egʼba ba gbagbu-amo mbo.

⁵¹ Agimi e ngli e gno eshyẽ ba odlo he. Agi pyeŋ angyiŋ é ba e kpu mbo. Ebuebu nga, egʼba bi lo é zhiŋ.

⁵² Alo é zhiŋ shoshoshoŋ ambla ba moa a hlu angzo ba amom-abgo. Omba ba moa a hlu lo, moare la a sheŋ a kpu, moa á kso eku la egʼba ba gbagbu-amo. Agi pyeŋ nga é zhiŋ.

⁵³ Okyku eshi, o dzu omgbybi ba are la a wo la egʼba la é ba e kpu á ba a ygi egʼba la é ba e kpu nga mbo. Nga are la a wo a ba eku á ygi egʼba la é ba e kpu nga mbo.

⁵⁴ Omba ba are la a wo la egʼba la é ba e kpu a zhiŋ a dzu la egʼba ba gbagbu, nga egʼba la é ba e kpu é zhiŋ é dzu egʼba la é kpu ku-ku nga mbo, omba he lo angyiŋ moa á ba a ka adlidzi ba odlo ba Ahogbrẽ la o lu mi le, Moa a bga eku, nga okpogre o bli pyeŋ!

⁵⁵ Eku, okpogre boŋ lo o wo ayaŋ a mo? Eku, ekʼpo boŋ o kpo moare ewu e wo ayaŋ?

⁵⁶ Eku e hwiŋ ekʼpo ba o la o kpo moare ewu okro ba odlobi angyiŋ. Odlobi nga o hwiŋ ekʼpo okro odaŋ angyiŋ.

⁵⁷ Ambo agi e vye la Ahogbrẽ baŋ a la a shri okpogre a da gi okro Adigi-odne Eyesu Ekristi!

⁵⁸ Okyku eka he agimi anáŋ, e tspi osheshye kye, nga e kpo otum bimi ombamba pyeŋ okyku Adigi-odne. Agimi a mbo e sheŋ e yi ba otumyaŋ a mbo bimi e kpo ozhẽ ba Adigi-odne, ba alo o wo otum ba ototno mbo.