1 MoaOkorinti 14 - Ohwihwim Olehe

Odlo eshri okpogbu ba Ogbgaodzi o shri o di

¹ Alo o raŋ o gre bimi e zga gble okyku o tspi la oklo angyiŋ. E shri aga bimi e zga okpogbu ba Ogbgaodzi angyiŋ. É shri aga bimi e la e zga okpogbu ba o nyum oshpa ba Ahogbrẽ angyiŋ nzenze.

² Are la a lu elom moazhẽ a la a lu lo pa la moarehwi angyiŋ mbo, ambo ta la Ahogbrẽ angyiŋ, okyku eshi arekyeŋ a gno lo a bmye mbo ku-ku. Okyku eshi a lu eshyẽ ba adlidzi okro ba ekʼpo ba Ogbgaodzi angyiŋ.

³ Ambo are la a la a nyum oshpa ba Ahogbrẽ le, a nyum lo a ygi moarehwi angyiŋ. Aŋa nga a la a kpo a ghwo la mo, a shĩ mo nga a gbu mo eso obiŋ angyiŋ.

⁴ Ambo are la a lu la elom moazhẽ le, a kpo a ghwo la eŋa sha. Ambo are la a nyum oshpa ba Ahogbrẽ le, a kpo a ghwo la Eklisiya pyeŋ angyiŋ.

⁵ Eka ba ame e ka, o raŋ o gre ba areyaŋ a mbo a kpo a gbu baŋ a lu odlo la elom moazhẽ a gbu. Ambo o raŋ me eso o gre o wo ba areyaŋ a mbo a wo la okpogbu ba o nyum oshpa ba Ahogbrẽ. Okyku eshi are la a nyum oshpa ba odlo ba Ahogbrẽ a wo la owlama a gre are la a lu odlo la elom moazhẽ. O wo eheŋ-ekyeŋ mbo o wo le arekyeŋ a wo ma okyku o zhiŋ lo o da Eklisiya ayga dne alo a wo owlama.

⁶ Okyku eka he agimi anáŋ, omba ba ame e ba okro bimi, o wo ba ame e la e lu elom moazhẽ e ygi gimi le, alo o wo owlama? Ó wo owlama tsi a mbo mbo, o wo le ame e shri otsotsakyeŋ okro ba Ahogbrẽ e shri e ba ayga dne, o mbo le oyioyikyeŋ, o mbo le oshpa la o gre eso, o mbo le onyenyekyeŋ ayga dne.

⁷ Ama ba obibmmi eka ba angzo o mbo le egbani moa a wo ama ba ototno. Arekyeŋ á yi edgu enzi ba alo e zhle mbo o wo le moa a bmmi lo adzadzi ayga dne.

⁸ O wo ba are la a ta egbaru eko a ta lo adzadzi mbo le, arekyeŋ á zgi okyku o ta eko lo?

⁹ Nga ekakahelo moare á kpo anyu á ba a gno oshpa lo á bmye o wo ba agimi e lu lo la elom ba moa a gno lo a bmye mbo? Oshpa bimi lo ó gro ó yi ogbga va ototno!

¹⁰ Elom eshushku e wo ma nzenze obiŋ hi, ambo moa pyeŋ moa a wo la moare la a gno lo.

¹¹ Ambo o wo ba ame e yi olom ba moa a lu mbo le, are la a lu lo á dzu azhẽ pa la me, ame a mbo é dzu azhẽ angyiŋ ka la ŋa.

¹² Eka bimi e wo la ekhwo okyku okpogbu ba Ogbgaodzi he, o raŋ o gre bimi e zga gble ta la okpogbu ba moa la a tspi okyku ombdzi Eklisiya.

¹³ Okyku eka he, are la a lu odlo la elom moazhẽ le, o raŋ o gre baŋ a fa olu okyku o daŋ a hwiŋ okpogbu ba o tsa moare eshyẽ ba odlo lo.

¹⁴ Okyku eshi o wo ba ame e fa olu eka he le, eso me e fa olu zhezheŋ, ambo olu o wo la aga me angyiŋ mbo.

¹⁵ Ame nga é kpo eshi? Ame é fa olu ta la eso me, ambo ame é fa olu ta la aga me a mbo ko-ko. Ame é fu abmo la eso me, ambo ame é fu abmo la aga me a mbo ko-ko.

¹⁶ O wo boŋ o vye la Ahogbrẽ la eso sha le, moahwõ la a wo ma á kpo anyu á ba a ka odlo boŋ á bmye eshki nga á ba a tno ma a lu ma Amin? Aŋa á kpo á gbu baŋ á ka odlo boŋ o lu a bmye mbo.

¹⁷ O wo ba edgu olu boŋ o fa he lo o wo odzi nzenze egi ayi ba Ahogbrẽ a mbo, alo o kpo o ghwo la moahwõ mbo ku-ku.

¹⁸ Ambo ame e vye la Ahogbrẽ baŋ a da me e kpo e gbu nga e lu elom moazhẽ e gre gimi mvye.

¹⁹ Ambo ame é gno oraŋ o lu amgboŋ odlo atno ba moahwõ a gno lo a bmye eshki okyku o da me e nye mo, o sku ba ame e lu amgboŋ odlo ezbi la elom moazhẽ.

²⁰ Agimi anáŋ, e tne aga eka moanwye afifi mbo. Ambo e dzu eka moanwye afifi angyiŋ egi ayi ba odlobi, nga e da aga bimi a dzu eka ba aga moare la a bmye ayi a khwo.

²¹ Moa a ta Akpa ba Ahogbrẽ a lu mi le, Adigi-odne a lu mi le, Ame é lu odlo pa la moare he lo, Ame é da moare la a lu elom moazhẽ á ba a lu pa la mo La anyu moazhẽ. Ambo ekakahelo moarehwi me á ngli atuŋ á gno odlo me mbo.

²² Okyku eka he nga, okpogbu ba o lu odlo la elom moazhẽ o wo okyku o tsa moa la a wo evbu angyiŋ, o wo okyku o tsa moa la a bmi ba adlidzi angyiŋ mbo. Ambo okpogbu ba o nyum oshpa ba Ahogbrẽ o wo okyku o tsa moa la a bmi ba adlidzi angyiŋ, alo o wo okyku o tsa moa la a wo evbu angyiŋ mbo.

²³ Okyku eka he, o wo ba Eklisiya pyeŋ e shki eshki, nga o wo ba areyaŋ a mbo a la a lu odlo la elom moazhẽ le, o wo moare la a bmi ba adlidzi mbo, o mbo le arekyeŋ ba ototno a gre a ba eshki lo le, moa a lu ma agimi e dro e mbo?

²⁴ Ambo o wo ba moare pyeŋ a nyum oshpa ba Ahogbrẽ angyiŋ, omba ba moakyeŋ la a bmi ba adlidzi mbo o mbo le arekyeŋ ba ototno a ba le, aŋa á ka á bmye baŋ a wo are ba odlobi omba baŋ a gno oshpa lo. La ekployaŋ a mbo baŋ a gno angyiŋ, moa á ba a sõ ŋa ombgu.

²⁵ Aga baŋ la a dga eshyẽ, oshpa lo ó ta lo edzi, nga á kʼpu obiŋ nga á hlu Ahogbrẽ eshko, á ghwo obiŋ okro baŋ nga á lu mi le, Adlidzi angyiŋ Aho-gbrẽ a wo ahe ka la gimi.

Odzu opyapyaŋ Eklisiya

²⁶ Agimi anáŋ, odlo ba ame e lu hi o wo ozhẽyaŋ? Omba bimi e shki okyku o hlu Ahogbrẽ eshko le, arekyeŋ a ba a dzu okyku o fu abmo, nga ahwõ a ba a dzu okyku onyenye, nga ahwõ a ba a dzu okyku o nyum oshpa la elom moazhẽ, nga ahwõ a ba a dzu okyku otsotsa ba Ahgobrẽ, nga ahwõ a ba a dzu okyku o zhiŋ oshpa he lo. O raŋ o gre ba ekployaŋ a mbo e dzu okyku o kpo o ghwo la Eklisiya.

²⁷ O wo ba are-kyeŋ a lu odlo la elom moazhẽ le, moa aha o mbo le atra sha moa á lu odlo le, moa a la a nyunyiŋ, nga arekyeŋ a la a zhiŋ ayakplo ba moa a lu.

²⁸ Nga o wo ba arekyeŋ la a zhiŋ lo a gbu a wo ma eshki lo okyku o wre odlo lo mbo le, o raŋ o gre ba arekyeŋ a lu odlo angyangyeŋ eshki mbo. Are he lo a lu lo esosõ nga a lu ta la Ahogbrẽ sha.

²⁹ Moahwõ a mbga ekplo ba Ahogbrẽ a shri a da moa aha o mbo le atra okyku olulu, omba ba moa a lu lo.

³⁰ Nga o wo ba arekyeŋ omba moa a wo eshki a yga oshpa abgo ba Ahogbrẽ le, o wo ba are-hwõ a lu odlo le, aŋa a tspi la alo ayga.

³¹ Agimi pyeŋ akye-kyeŋ e kpo e gbu bimi e nyum oshpa ba Ahogbrẽ, okyku o da gimi e nye egimi nga e shĩ egimi.

³² O raŋ o gre ba are a nyuŋ okpogbu ba onyumoshpa ba Ahogbrẽ a zga adzadzi.

³³ Okyku eshi Ahogbrẽ a bzi gi okyku o da gi e ba e kpo ambgu angyiŋ mbo, ambo okyku o da gi e dzu la opyapyaŋ ba eso. Okyku o da gi e dzu eka moa a kpo Eklisiya pyeŋ ba Ahogbrẽ,

³⁴ o raŋ o gre ba moashe a hwile anyu eshki ba Eklisiya mbo. Moa a tla mo o lu odlo eshki, eka ba odaŋ ba moaEyahuda o lu mi ma moashe a ri ekʼpo mbo.

³⁵ O wo ba moa a klo o zhĩ ekplokyeŋ eshri odlokyeŋ le, moa a yi a zhĩ moalalom mo odne. O wo odzi ku-ku ba ashe a yi a lu odlo eshki ba Eklisiya mbo.

³⁶ Odlo Ahogbrẽ o sa o zgi okro bimi angyiŋ ko? Alo o gre o ba okro bimi sha angyiŋ?

³⁷ O wo ba arekyeŋ a ka eka baŋ a wo anwyeadga ba Ahogbrẽ le, o mbo le a wo la okpogbu ba Ogbgaodzi le, o raŋ o gre ba edgu are he lo a ka a bmye ba ame e ta gimi akpa he lo la oklo ba ekʼpo ba Adigi-odne angyiŋ.

³⁸ Ambo o wo baŋ a bmi ta la alo mbo le, agimi e sko are he lo e zga akplokyeŋ mbo.

³⁹ Okyku eka he, agimi anáŋ, agimi e shri eso bimi e zga okyku o nyum oshpa ba Ahogbrẽ, ambo agimi e nyom moare la a lu odlo la elom moazhẽ mbo.

⁴⁰ O raŋ o gre ba moa a kpo ekployaŋ a mbo shasha ozhẽ la o raŋ o gre.