1 MoaOkorinti 13 - Ohwihwim Olehe

Oklo

¹ O wo ba ame e la e lu elom moarehwi ta la elom moanwyeadga ba Ahogbrẽ a mbo, ambo o wo ba ame e wo la oklo ma mbo le, odlo me o dzu eka afõ la a zhle ototno.

² O wo ba alo o kpo o gbu ba ame e nyum oshpa la o gre eso, nga e kpo e gbu ba ame e wo la oyioyi ba obiŋ hi pyeŋ, nga ba ame e ka eshyẽ ekployaŋ a mbo e bmye, nga o wo ba alo o kpo o gbu ba ame e wo la obmi ba adlidzi la o kpo o gbu ba ame e gʼbu akukũ a mbo, ambo o wo ba ame e wo la oklo ma mbo le, ame e wo akplokyeŋ angyiŋ mbo.

³ O wo ba ame e shri ekployaŋ a mbo ba ame e wo la alo ma e shri e da moare, nga o wo ba ame e shri egʼba me e shri e di okyku o da mo a ta lo ovo a mbo, ambo o wo ba ame e wo la oklo ma mbo le, alo o wo akplokyeŋ ba owlama angyiŋ pa la me mbo.

⁴ Oklo o yi oheheŋ pa la okpoghwo. Oklo o yi efpu mbo, oklo o la o lu ega mbo, nga alo o la o nyom egʼba mbo.

⁵ Oklo o la o kpo ayakplo la a tpi eso ayi mbo. Oklo o la o klo eshri mbo. Oklo o la o vre are eso mbo, nga alo o la o ghre akpu moa a ta ŋa eso mbo.

⁶ Oklo o la o gno oraŋ ta la odlobi mbo, ambo o la o gno oraŋ ta la adlidzi.

⁷ Oklo ó khwo mbo ku-ku. Obmi ba adlidzi ba oklo ta la okayiozhẽ, ta la oheheŋ baŋ, ó khwo ku-ku mbo.

⁸ Oklo o wo gbagbu-amo. Oshpa la o gre eso o wo ma nzenze, ambo moa a wo okyku omba ple sha angyiŋ. Okpogbu ba o lu elom o wo ma, ambo alo ó khwo. Oyioyi o wo ma, ambo ó bre ó yi.

⁹ Okpogbu ba oyioyi, ta la okpogbu ba o nyum oshpa la o gre eso, moa a bli mbo ku-ku.

¹⁰ Ambo omba ba ekplo la e bli é ba e ba, ekplo la e sheŋ e nye é blu.

¹¹ Omba ba ame e wo anwye afifi, egba ba ame e la e kpla ta la otsitspi me pyeŋ ta la aga me, moa a wo ayakplo moanwye afifi angyiŋ. Ambo ohuhuhi ba ame e bmye ayi e klu hi, ame e dzu odzudzu ba moanwye e zga angyiŋ a mo.

¹² Ayakplo ba agi e la e ka ohuhuhi a wo eka ba amu emakyeŋ a zgi a dzu akpaokayi. Omba mi lo nga agi é ka ekployaŋ a mbo la enmwre ayi. Ayakplo ba ame e yi ohuhuhi a wo ple sha ayga. Omba mi lo nga, ame é yi ekployaŋ a mbo pyeŋ, eka ba Ahogbrẽ a yi me pyeŋ.

¹³ Ambo obmi ba adlidzi ta la okayiozhẽ, ta la oklo, ayakplo atra he lo á tspi eka he lo. Ambo eshki mo, oklo o gre pyeŋ.