1 MoaOkorinti 12 - Ohwihwim Olehe

Okpogbu ba Ogbgaodzi o shri o di

¹ Ohuhuhi nga, odlo eshri ba okpogbu ba Ogbgaodzi o shri o di. Agimi anáŋ, ame e klo bimi e yi adlidzi eshri lo.

² Agimi e yi ba omba ba agimi e wo evbu, okpko la o wo eso ma mbo angyiŋ o la o ri ekʼpo eshri bimi ayga, nga o la o so gimi ayi.

³ O raŋ o gre bimi e ka e bmye. Are ba Ogbgaodzi o kpo otum ka la ŋa a kpo a gbu baŋ a lu odlo ba ototno eshri ba Eyesu mbo! Nga are ba Ogbgaodzi o kpo otum ka la ŋa sha angyiŋ a kpo a gbu baŋ a zgi egŋe ba Eyesu a wo Adigi-odne!

⁴ Okpogbu ba Ogbgaodzi o wo adandandim, ambo Ogbgaodzi okyekyeŋ o shri lo o di.

⁵ Ezhẽ ba o hlu Adigi-odne eshko e wo ma nzenze, ambo Adigi-odne he lo a wo akyakyeŋ angyiŋ.

⁶ Okpogbu ba o kpo otum o wo andandandim, ambo Ahogbrẽ akyakyeŋ angyiŋ a shri okpogbu a shri a da areyaŋ a mbo okyku o daŋ a kpo edgu otumyaŋ a mbo.

⁷ Moa a da areyaŋ a mbo a yi zhezheŋ ba Ogbgaodzi o wo ka la ŋa okyku o kpo o ghwo la moahwõ mvye.

⁸ Ogbgaodzi o shri oshpa ba okaobmye o shri o da areabze, nga Ogbgaodzi he lo o shri oshpa ba oyioyi angyiŋ o shri o da areabze.

⁹ Nga Ogbgaodzi okyekyeŋ o sa o shri obmi ba adlidzi o shri o da areabze nga o shri ekʼpo ba o shaŋ elolo angyiŋ o shri o da areabze.

¹⁰ Ogbgaodzi nga o shri ekʼpo ba o kpo ayakplo ba egbregbre angyiŋ o shri o da areabze, nga o shri okpogbu ba o nyum oshpa ba Ahogbrẽ o shri o da areabze. Nga Ogbgaodzi o shri ekʼpo ba o gʼba edgu okpogbu la o wo o ba Ogbgaodzi ta la okpogbu la o wo o ba Ogbgaodzi mbo. Ogbgaodzi o shri okpogbu ba o lu odlo la elom andandandim o shri o da areabze, nga o shri okpogbu ba o zhiŋ odlo he lo o shri o da areabze.

¹¹ Ambo Ogbgaodzi okyekyeŋ angyiŋ o la o kpo edgu ayakplo he lo pyeŋ. A la a shri edgu okpogbu andandandim a shri a da areyaŋ a mbo eka baŋ a klo.

Egʼba ekyekyeŋ la évgi nzenze

¹² Ekristi a wo eka ba egʼba ekyekyeŋ la e wo évgi nzenze. Alo e wo egʼba ekyekyeŋ angyiŋ, ambo ekakahelo e wo la évgi nzenze.

¹³ Nga ekakahelo, agi Eyahuda pa la moa la a wo moaEyahuda mbo, pa la moa la a wo moawaghrẽ, pa la moa la a wo moawaghrẽ mbo, moa a kpo gi abaptisma ibu ba egʼba ekyekyeŋ, la Ogbgaodzi okyekyeŋ. Moa a shri Ogbgaodzi okyekyeŋ he lo angyiŋ a da gi pyeŋ okyku o da gi e yga.

¹⁴ Egʼba lo nga e wo la evgi ekyekyeŋ sha mbo, ambo e wo évgi nzenze.

¹⁵ O wo ba odga o lu mi le, Ame e wo obgo angyiŋ mbo, okyku eka he ame e wo ogʼba egʼba lo ko mbo, ohi lo ó nyom lo o dzu ogʼba egʼba lo mbo.

¹⁶ O wo ba otuŋ o lu mi le, Ame e wo eyi angyiŋ mbo, okyku eka he ame e wo ogʼba egʼba lo ko mbo, ohi lo ó nyom lo o dzu ogʼba egʼba lo mbo.

¹⁷ O wo ba egʼba e zhiŋ e dzu eyi sha angyiŋ le, alo é kpo anyu é ba e gno? Nga o wo ba alo e zhiŋ e dzu otuŋ sha angyiŋ le, alo e kpo anyu é ba e gno efpi?

¹⁸ Eka ba alo o wo, Ahogbrẽ a kpo egʼba a da lo e wo la évgi andandandim eka ekplo baŋ a klo angyiŋ.

¹⁹ O wo ba evgi ekyekyeŋ sha e wo ma le, egʼba é wo ma mbo!

²⁰ Évgi nzenze angyiŋ e wo ma, ambo egʼba ekyekyeŋ angyiŋ.

²¹ Okyku eka he nga eyi e kpo o gbu ba alo e nyuŋ obgo e lu mi le, O ka, ame e klo ŋo mbo mbo! Nga eshri a mbo e kpo e gbu ba alo e nyuŋ adga e lu mi le, O ka, ame e klo gimi mbo mbo!

²² Nga agi e kpo e gbu ba agi e dzu evgi la e wo oshye mbo e zga nga ba agi e kpo otum adzadzi mbo.

²³ Nga évgi bi e ka eka ba moa a wo owlama nzenze mbo, moa angyiŋ agi e la e nyuŋ e kpo-kpo pa la mo. Nga ékplu la e wo la oshye mbo, agi e la e nyuŋ e kpo-kpo angyiŋ pa la mo.

²⁴ Evgi edzadzi ba egʼba bi he lo, e la e klo edgu onyuŋokpo he lo mbo. Ahogbrẽ eshrishri eŋa a kŋe egʼba bi pyeŋ a bga okyku o da mo a shri onyuonyuŋ la e gre a shri a da évgi la e wo anyuanyuŋ mbo.

²⁵ Okyku eka he nga, ogagʼbakyeŋ o wo egʼba lo mbo. Évgi lo pyeŋ e fki emo otsotse.

²⁶ O wo ba evgi ekyeŋ e la e kpo ewu le, évgi ehwõ pyeŋ e la e kpo ewu ta la alo. Nga o wo ba evgi ekyeŋ e hwiŋ otsotsom le, évgi ehwõ e la e kpo ovye ta la alo otsotse.

²⁷ Okyku eka he agimi pyeŋ e wo egʼba ba Ekristi angyiŋ, nga areyaŋ a mbo a wo evgi egʼba lo angyiŋ.

²⁸ Eklisiya nga Ahogbrẽ a shri moare a ghwo ma. Okro ba oriori moa la a nyum oshpa, okro ba oha, moarehwi ba Ahogbrẽ a hom mo otum, okro ba otra nga, moa la a nye, ambla he nga moa la a la a kpo ayakplo ba egbregbre, ambla he nga moa la a hwiŋ ekʼpo ba o shaŋ moare nga o kpo o ghwo, nga o tsa moare, nga o lu odlo la elom andandandim.

²⁹ Moa pyeŋ angyiŋ a wo moa la a nyum oshpa mbo, nga moa pyeŋ angyiŋ moa a wo moarehwi ba Ahogbrẽ a hom mo otum mbo, o mbo le moa la a nye mbo. Nga moa pyeŋ angyiŋ a wo la ekʼpo okyku o kpo ayakplo ba egbregbre mbo.

³⁰ Nga moa pyeŋ angyiŋ a wo la ekʼpo okyku o shaŋ elolo, o mbo le okyku o lu odlo la elom andandandim mbo. Nga moare pyeŋ angyiŋ a yi o zhiŋ edgu elom he lo mbo.

³¹ Okyku eka he, agimi e shri eshri bimi e zga okpogbu la o wo la onyuonyuŋ o gre pyeŋ. Nga ozhẽ he angyiŋ o wo odzi o gre pyeŋ.