1 MoaOkorinti 10 - Ohwihwim Olehe

Oshishĩ eshri ololo

¹ Agimi anáŋ, ame e klo bimi e tne aga e fu ekplo la e kpo pa la moadigi la a lu Omusa ma. Etabro angyiŋ e la e kpaŋ mo, nga moa pyeŋ a bmyi anyuŋ-ondzu Obme adzadzi.

² Etabro, ta la anyuŋ-ondzu lo, moa a kpo mo abaptisma nga a dzu eka moare la a lu Omusa ma.

³ Moa pyeŋ moa a taŋ agbrotsa ba Ogbgaodzi he lo.

⁴ Moa pyeŋ nga, moa a sa a wa ami ba Ogbgaodzi. Moa a wa ami la a zgi ezhim ba Ogbgaodzi. Ezhim he lo e dzi e la e lu mo ma. Ezhim he lo nga e wo Ekristi angyiŋ.

⁵ Ambo omba he lo, Ahogbrẽ a gno oraŋ pa la moare nzenze eshki mo mbo. Okyku eka he moa a kpu a lom akla wayawaya.

⁶ Ayakplo he lo pyeŋ, a dzu egŋe angyiŋ ka la gi, okyku o shĩ gi, okyku o da gi e kpo ayakplobi eka ba moa a kpo mbo,

⁷ nga e hlu okpko eshko eka ba moa a kpo mbo. Akpa ba Ahogbrẽ a lu mi le, Moarehwi a dzu obiŋ okyku o ri nga o wa, ambla he nga moa a kso angyeŋ okyku o zhga ara.

⁸ O raŋ o gre bi e ta ekpa eka moakyeŋ eshki mo a ta mbo. Okyku eshi ondakyekyeŋ eka he, moare la a tsu a ygi obiŋ nga a kpu moa a wo ezbi ekʼpoeha la atra.

⁹ O raŋ o gre bi e mbga Adigi-odne e ka mbo. Moakyeŋ a kpo eka he lo, nga moa a da amabi a bga mo.

¹⁰ O raŋ bimi e nyi agla eka moakyeŋ eshki mo a kpo mbo, okyku eshi moa a da Anwyeadga ba Eku a bga mo.

¹¹ Ayakplo he lo pyeŋ a kpo pa la mo okyku o tsa moahwõ. Moa a ta lo okyku o shĩ gi angyiŋ. Okyku eshi omba o kpo okhwokhwo a mo.

¹² Are la a ka eka baŋ a tspi shasha, a nyuŋ eshri baŋ a zga, okyku o daŋ a tsu a gbu mbo.

¹³ Edgu ombambga la o hwiŋ moahwõ angyiŋ o la o hwiŋ gimi. Okyku eshi Ahogbrẽ a la a bli ohwihwim baŋ. Okyku eka he, á da ombambga la o gre gimi eshri o hwiŋ gimi mbo. Nga ombayaŋ a mbo ba moa a mbga gimi a ka, Ahogbrẽ nga á shri oshye á da gimi, okyku o da gimi e tspi gaŋ. Nga á shri ozhẽ ba ozizgi á shri á da gimi.

¹⁴ Okyku eka he, agimi moakyemeazba ba adlidzi, agimi e la e hlu okpko eshko mbo.

¹⁵ Ame e lu odlo ka la gimi eka ba ame e lu odlo pa la moare la a wo la eda edzi. Agimi ababgo bimi e mbga ayakplo ba ame e lu e ka.

¹⁶ Etku ami ba owlama ba agi e la e vye la Ahogbrẽ okyku lo, agi e la e kŋe eshri bi angyiŋ e bga ibu ba amanzhli ba Ekristi omba ba agi e wa ami etku lo mbo? Nga agbrotsa bi e la e tsoŋ agbu, agi e la e kŋe eshri bi angyiŋ e bga okro ba egʼba baŋ, omba bi e taŋ lo mbo?

¹⁷ Okyku ba agbrotsa lo a wo akyakyeŋ, agi e wo nzenze egyagi a mbo, agi e dzu egʼba ekyekyeŋ angyiŋ, okyku eshi agi e taŋ agbrotsa akyakyeŋ angyiŋ.

¹⁸ Agimi e tne aga eshri moaEyahuda e ka. Moa la a taŋ ekplo ba moa a shri a ndba ambgu, moa a dzu eka moa a mbo a shri eshri mo a ndba Ahogbrẽ.

¹⁹ Okũ ekplo ba ame e lu hi e ri eshri? O dzu eka ba okpko o mbo le ba algo ba moa a shri a ndba lo ba alo a wo akplokyeŋ?

²⁰ O mbo! Alo o wo eka he angyiŋ mbo. Ame e lu eka ba ekplo ba moa a shri a kpo ololo, ba alo e dzu e ba egbgabi angyiŋ, alo e wo e ba Ahogbrẽ angyiŋ mbo. Ame nga e klo bimi e ri ekpom ta la egbgabi mbo ku-ku.

²¹ Agimi e kpo e gbu bimi e wa ami etku ami ba Adigi-odne ta la etku ami ba egbgabi mbo. Nga agimi e kpo e gbu bimi e ri algo eteblo ba Adigi-odne, ta la eteblo ba egbgabi mbo.

²² O wo eka he le, agi e klo e tpi Adigi-odne eso ayi? Eka bimi e ka, agi e wo la oshye e gre ŋa?

²³ Moahwõ a lu mi le, Moa a da gi ozhẽ okyku o da gi e kpo akployaŋ a mbo. O wo eka he lo angyiŋ, ambo ekployaŋ a mbo e wo edzi ba o kpo-kpo mbo. Moa a da gi ozhẽ okyku o da gi e kpo ekployaŋ a mbo, ambo ekployaŋ a mbo angyiŋ e wo la owlama mbo.

²⁴ O raŋ o gre ba arekyeŋ a kpo otum okyku eshri baŋ sha mbo. Aŋa a la a tne aga moahwõ ko-ko.

²⁵ Ekplokyeŋ e nyom bimi e taŋ ebyi edguyaŋ a mbo moa a la a shri a gbmo ekyku mbo, nga agimi e zhĩ ekplokyeŋ okyku aga ba enzi ba eso mbo.

²⁶ Okyku eshi Akpa ba Ahogbrẽ a lu mi le, Obiŋ hi pyeŋ, ta la ekployaŋ a mbo la e wo ma e wo e ba Adigi-odne angyiŋ.

²⁷ O wo ba are la a bmi ba adlidzi mbo a bzi gimi okyku algo le, o wo bimi e zga eso okyku o yi le, agimi e ri ekployaŋ a mbo ba moa a shri a zga egi ayi bimi. Agimi e fu eha akplokyeŋ eso bimi nga e zhĩ akplokyeŋ mbo.

²⁸ Ambo o wo ba arekyeŋ a nyuŋ gimi a lu mi le, Algo ololo angyiŋ a wo ahi. O wo eka he le, agimi e ri edgu algo he lo mbo, okyku aga ba are he lo ta la enzi ba eso bimi.

²⁹ Ambo e kpo eka he okyku enzi ba eso bimi angyiŋ mbo, ambo okyku enzi ba eso ba are mi lo. O dzu mbo arekyeŋ a sa a zhĩ a lu mi le, Okyku eshi aga ba eso arekyeŋ a nyom me o kpo ekployaŋ a mbo ba ame e klo o kpo-kpo?

³⁰ Nga o wo ba ame e vye la Ahogbrẽ okyku algo lo e khwo, okyku eshi arekyeŋ a sa a klo odlo pa la me eshri algo ba ame e sheŋ e vye Ahogbrẽ okyku lo?

³¹ Okyku eka he, ekployaŋ a mbo boŋ o kpo, omba boŋ o ri ta la omba boŋ o wa, o raŋ o gre boŋ o kpo ayakplo lo mvye okyku o hlu Ahogbrẽ eshko.

³² Agimi e nyuŋ eshri bimi e zga adzadzi, okyku o da gimi e tpi egimi ayi pa la moaEyahuda mbo o mbo le moa la a wo moaEyahuda mbo mbo, nga agimi e tpi egimi ayi ta la Eklisiya ba Ahogbrẽ mbo.

³³ Agimi nga e kpo ekployaŋ a mbo eka ba ame e la e kpo. Ame e la e klo o gbu areyaŋ a mbo eso obiŋ, nga ame e la e tne aga okyku ohwihwiŋ me mbo, ambo ame e la e tne aga okyku ohwihwiŋ moare pyeŋ angyiŋ, okyku o da mo a hwiŋ oshla.