1 MoaOkorinti 1 - Ohwihwim Olehe

¹ Akpa he lo a zgi abgo me Oblus. Ahogbrẽ angyiŋ a bzi me okyku o da me e dzu are la a nyum oshpa ba Ekristi Eyesu. Akpa lo a zgi okro ba anigi Osostani bubgu.

² Agimi Eklisiya ba Ahogbrẽ la e wo osku ba Okorinti, pa la moarehwi pyeŋ ba Ahogbrẽ a bzi mo okyku o da mo a dzu moarehwi baŋ, moa la a wo moarehwi baŋ okro ba okŋeo-bga ba Ekristi Eyesu, nga pa la moarehwi ba okroyaŋ a mbo la a hlu Adigi-odne Eyesu Ekristi la a wo Adimo-odne, ta la Adigi-odne eshko.

³ Ahogbrẽ la a wo Adigi, ta la Adigi-odne Eyesu Ekristi, moa a shri okpoghwo ta la opyapyaŋ ba eso a da gimi.

Owlama ba Ekristi

⁴ Ame e vye la Ahogbrẽ ombamba pyeŋ okyku gimi, okyku okpoghwo baŋ a kpo a ghwo la gimi okro ba Ekristi Eyesu.

⁵ Okyku eshi okro ba okŋeobga ba Ekristi he lo angyiŋ, agimi e gbu angyiŋ ekployaŋ a mbo ta la odlo bimi e la e lu, ta la oyioyi bimi.

⁶ Oshpa ba Ekristi o gre gimi eshri osheshye,

⁷ okyku eka he angyiŋ agimi e hwiŋ owlamayaŋ a mbo, omba ba agimi e la e ka ayi ozhẽ okyku omba ba moa a da Adigi-odne Eyesu Ekristi a ba.

⁸ Aŋa nga á kpaŋ gimi osheshye ma-me a mo, okyku o da mo a hwiŋ akpukyeŋ okro bimi mbo, onda ba Adigi-odne Eyesu Ekristi á ba a ba.

⁹ E kom Ahogbrẽ abgo gble. Aŋa angyiŋ a bzi gimi okyku o da gimi e ba e ri ekpom ta la Anwye baŋ Eyesu Ekristi Adigi-odne.

Ogagʼba Eklisiya

¹⁰ Ame e vẽ gimi anáŋ, okro ba ekʼpo ba Adigi-odne Eyesu Ekristi. Agimi e la e bmi ta la egimi ekployaŋ a mbo bimi e lu, okyku o da ogagʼbakyeŋ o gre o ba eshki bimi mbo. Agimi e da eshri bimi e dzu ekyekyeŋ aga bimi ta la okoklo bimi.

¹¹ Agimi anáŋ, moarekyeŋ ba odne ba Oklowi, moa a lu a da me ma oklaodlo o wo agʼbaha bimi o gre eshri.

¹² Ame é shri lo é zga ozhẽ hi, areyaŋ a mbo eshki bimi a la a lu ekplo baŋ a klo. Moakyeŋ ma moa a wo ba Oblus, moakyeŋ nga ma moa a wo ba Apolos, moakyeŋ nga ma moa a wo ba Ebitru, moakyeŋ nga ma moa a wo ba Ekristi.

¹³ Moa a gʼba Ekristi lo egʼba! Oblus angyiŋ a kpu egŋe aki okyku gimi? Moa a kpo gimi abaptisma la eshko ba Oblusa ngyiŋ?

¹⁴ Ame e vye la Ahogbrẽ nzenze okyku ba ame e kpo akyeŋ a mbo eshki bimi abaptisma mbo o wo le Ekrispu ta la Egayu sha.

¹⁵ Okyku eka he arekyeŋ a kpo a gbu baŋ a lu ma moa a kpo ŋa abaptisma okyku o daŋ a lu me angyiŋ e ma mbo.

¹⁶ Ame nga e sa e kpo Estifanu pa la moa-odŋe baŋ abaptisma. Ame e sa e kpo arekyeŋ bubgu angyiŋ abaptisma a mu, ame e yi nga mbo.

¹⁷ Ekristi a da me e ba okyku o kpo moare abaptisma angyiŋ mbo, ambo okyku o da me e nyum Oshpaodzadzi e ygi moare angyiŋ. Aŋa a klo ba ame e lu lo la okao-bmye ba olom moarehwi angyiŋ mbo, okyku eshi ozhẽ he lo ó tpi ekʼpo ba eku ba Ekristi a kpu egŋe aki ayi.

Ekristi angyiŋ a wo ekʼpo ta la okaombye ba Ahogbrẽ

¹⁸ Okyku eshi oshpa ba Ekristi a kpu egŋe aki, o wo akplo-kyeŋ angyiŋ pa la moa la a tpi ayi mbo, ambo alo o wo ekʼpo ba Ahogbrẽ angyiŋ pa la moa la a hwiŋ oshla lo.

¹⁹ Akpa ba Ahogbrẽ a lu mi le, Ame é kypi okaobmye ba moarehwi. Nga ame é sko oyioyi ba moarehwi la a yi engla é zga agba.

²⁰ Okyku eka he, okaobmye moarehwi ta la oyioyi moarehwi la a yi engla ta la okaobmye moarehwi la a yi oklaodlo ba obiŋ hi o wo anyu? Ahogbrẽ a tsa moare eka ba okaobmye ba obiŋ hi o wo otum ba adro ototno.

²¹ Okyku eshi Ahogbrẽ la okaobmye baŋ, a da lo o kpo o gbu ba moarehwi a ka ŋa a bmye la okaobmye ba eshri mo mbo, ambo Ahogbrẽ a zga eso baŋ okyku o shla moarehwi la a bmi ba adlidzi angyiŋ, ozhẽ oshpa ba adro ba agi e la e nyum he.

²² MoaEyahuda a klo egŋe akplokyeŋ egbregbre, okyku o da mo a ka adlidzi ba odlo Ahogbrẽ, nga moaEgrise a klo o ka adlidzi ba alo ozhẽ ba okaobmye.

²³ Ambo agi e su Ekristi egŋe aki. Oshpa he lo o la o tpi moaEyahuda eso ayi, nga o dzu ekplo adro angyiŋ pa la moa la a wo moaEyahuda mbo.

²⁴ Ambo okro moarehwi ba Ahogbrẽ a bzi mo moaEyahuda, pa la moa la a wo moaEyahuda mbo, oshpa he lo o wo Ekristi, la a wo ekʼpo ta la okaobmye ba Ahogbrẽ.

²⁵ Ekplo ba Ahogbrẽ la e wo eka ekplo ba adro, e wo ozhẽ okaobmye moarehwi e gre, nga ekplo ba Ahogbrẽ la e wo eka ba alo e wo oshye mbo, alo e wo oshye e gre oshye moarehwi.

²⁶ Agimi anáŋ, agimi e tne aga eka ba odzudzu bimi o wo omba ba Ahogbrẽ a bzi gimi. Moare fi sha eshki bimi a wo la okaobmye ma, o mbo le a wo la ekʼpo ma, o mbo le a gbu eshko ozhẽ ba aga ba arehwĩ.

²⁷ Ahogbrẽ a ka ayga a sla ekplo ba moarehwi ba obiŋ hi a sko lo a zga e ba adro, okyku o da moarehwi la okaobmye he a gbu anzi, nga a sla ekplo moarehwi ba obiŋ hi a ka eka ba alo e wo oshye mbo, okyku o da moarehwi la a wo oshye nzenze a gbu anzi.

²⁸ Aŋa a sla ekplo ba moarehwi ba obiŋ hi a sko lo a zga akplokyeŋ mbo, nga a dzĩ lo, nga a la a tne aga lo mbo, okyku o jygi ayakplo ba moarehwi ba obiŋ hi a sko lo a zga la anyuanyuŋ.

²⁹ Okyku eka he, ohi lo o tsa eka ba arekyeŋ a kpo a gbu baŋ a nyom egʼba egi ayi ba Ahogbrẽ a gbu mbo.

³⁰ Ambo Aho-gbrẽ angyiŋ a shri okŋeobga a zga agʼbaha bimi ta la Ekristi Eyesu. Nga Ahogbrẽ angyiŋ a da Ekristi a dzu okaobmye bi. Okro baŋ sha onyuŋokpo o gre o ba agʼbaha bi ta la Aho-gbrẽ. Agi nga e zhiŋ e dzu moarehwi ba Ahogbrẽ, nga agi e wo la odzudum ma.

³¹ Okyku eka he, Akpa ba Ahogbrẽ a lu mi le, Areyaŋ a mbo, la a klo o hre egʼba le, a nyom egʼba okyku ekplokyeŋ mbo, ambo a nyom egʼba okyku ekplo ba Adigi-odne a kpo angyiŋ.