1 Eyohana 5 - Ohwihwim Olehe

Okpogre bi eshri ba obiŋ hi

¹ Areyaŋ a mbo la a bmi ba Eyesu angyiŋ a wo Emisiya le, a wo anwye ba Ahogbrẽ angyiŋ. Nga areyaŋ a mbo la a klo Ada lo le, a la a klo anwye ba Ada lo a mbo ko-ko.

² Ozhẽ ba oklo Ahogbrẽ ta la okpaŋ odlo baŋ, agi e yi ba agi e klo moanwye ba Ahogbrẽ.

³ Oklo okyku Ahogbrẽ o wo okro ba okpaŋ odaŋ baŋ angyiŋ. Odaŋ baŋ nga o wo ewu o gre gi eshri mbo ku-ku,

⁴ okyku eshi areyaŋ a mbo la a wo anwye ba Ahogbrẽ á kpo á gbu baŋ a kpo a gre obiŋ hi. Agi é kpo é gbu ba agi e kpo e gre obiŋ hi ozhẽ ba obmi ba adlidzi bi.

⁵ Ayi a kpo a gbu baŋ a kpo a gre obiŋ hi lo? O wo le are la a bmi ba adlidzi ba Eyesu a wo Anwye ba Ahogbrẽ sha a kpo a gbu baŋ a kpo a gre obiŋ hi.

Egŋe eshri ba Eyesu Ekristi

⁶ Eyesu Ekristi angyiŋ a wo are la a ba. A ba ibu ba amihĩ ba abaptisma baŋ ta la amanzhli ba eku baŋ. Aŋa a ba ibu ba amihĩ sha mbo, ambo a ba ibu ba amanzhli a mbo omba okyekyeŋ. Ogbgaodzi a mbo ababgo baŋ o tsa zhezheŋ ba odlo he lo o wo adlidzi angyiŋ, okyku eshi Ogbgaodzi ababgo baŋ o wo adlidzi angyiŋ.

⁷ Moaegŋe atra angyiŋ a wo ma.

⁸ Moaegŋe atra he lo a wo Ogbgaodzi, ta la amihĩ, ta la amanzhli, nga moatra he lo pyeŋ moa a bmi ta la emo.

⁹ Agi e bmi ta la egŋe ba moarehwĩ a zgi, ambo egŋe ba Ahogbrẽ a zgi, e wo oshye e gre. Egŋe he lo angyiŋ, Ahogbrẽ a zgi lo eshri ba Anwye baŋ.

¹⁰ Okyku eka he areyaŋ a mbo la a bmi ba adlidzi ta la Anwye ba Ahogbrẽ le, aŋa a wo la egŋe he lo esõ baŋ. Ambo areyaŋ a mbo la a bmi ba adlidzi pa la Ahogbrẽ mbo le, aŋa a sko Ahogbrẽ a daŋ a dzu are ba akpro, okyku eshi aŋa a bmi ta la egŋe ba Ahogbrẽ a zgi eshri ba Anwye baŋ mbo.

¹¹ Egŋe lo e lu ma Ahogbrẽ a shri esõ ba gbagbu-amo a shri a da gi, nga ma agi é hwiŋ esõ he lo ozhẽ ba Anwye baŋ.

¹² Areyaŋ a mbo la a wo la Anwye ma, a wo la esõ ma. Nga are la a wo la Anwye ba Ahogbrẽ ma mbo le, a wo la esõ ma mbo.

Esõ ba gbagbu-amo

¹³ Ame e ta gimi oshpa he okyku o da gimi e yi ba agimi e wo la esõ ba gbagbu-amo ma, okyku eshi agimi e bmi ba adlidzi ta la eshko Anwye ba Ahogbrẽ.

¹⁴ Agi e wo la oshye-esõ egi ayi ba Ahogbrẽ, okyku eshi agi e bmi ba adlidzi baŋ á ba a gno olu bi o wo ba agi e vẽ ekployaŋ a mbo la e wo shasha ta la aga baŋ.

¹⁵ Aŋa a la a ngli atuŋ a gno ovẽ bi omba-yaŋ a mbo ba agi e vẽ ŋa. Eka ba agi e yi ba ohe lo o wo adlidzi, agi e sa e yi baŋ a shri ekployaŋ a mbo ba agi e vẽ a la a shri a da gi.

¹⁶ O wo ba arekyeŋ a ka ba anáŋ a kpo odlobi la o yi okro ba eku mbo le, o raŋ o gre baŋ a fa olu a vẽ Ahogbrẽ, Ahogbrẽ nga á shri esõ á shri á daŋ. Ohe lo o wo okyku moarehwĩ ba odlobi mo o tse ma ba moa á kpu mbo sha angyiŋ. Ambo odlobi ba eku o wo ma, ambo ame e lu ba agimi e fa olu e vẽ Ahogbrẽ okyku ohe lo angyiŋ ko mbo.

¹⁷ Ekployaŋ a mbo la e wo e ba adlidzi mbo e wo odlobi angyiŋ, ambo odlobi la o wo ba eku mbo o wo ma.

¹⁸ Agi e yi ba arekyeŋ ba moa a mbre ŋa okro ba Ahogbrẽ a la a shri eshri baŋ a zga okyku o kpo odlobi mbo, okyku eshi Anwye ba Ahogbrẽ a la a kpaŋ ŋa, nga Areabi a kpo a gbu baŋ a ta ŋa etsa mbo.

¹⁹ Agi e yi ba agi e wo moanwye ba Ahogbrẽ angyiŋ. Nga obiŋ hi pyeŋ o wo abgo ba ekʼpo ba Areabi.

²⁰ Agi e yi ba Anwye ba Ahogbrẽ a ba nga a shri okaobmye a da gi okyku o da gi e ka Ahogbrẽ ba adlidzi e bmye. Odzudzu bi pyeŋ o wo ta la Ahogbrẽ ba adlidzi okro ba Anwye baŋ Eyesu Ekristi. Aŋa angyiŋ a wo Ahogbrẽ ba adlidzi, nga esõ he lo angyiŋ e wo esõ ba gbagbu-amo.

²¹ Agimi anwye me, agimi e ngʼba e sku moahogbrẽ ba akpro!