1 Eyohana 3 - Ohwihwim Olehe

Moanwye ba Ahogbrẽ

¹ Agimi e ka, Ahogbrẽ a klo gi a gre eshri! Oklo baŋ lo o gre eshri. Okyku oklo baŋ angyiŋ, moa a bzi gi ma moanwye Ahogbrẽ. Nga agi e wo moanwye baŋ la adlidzi angyiŋ. Okyku okũ he lo angyiŋ obiŋ hi o yi gi mbo, okyku eshi alo o yi Ahogbrẽ mbo.

² Agimi akyemeazba, agi e wo moanwye ba Ahogbrẽ angyiŋ ohuhuhi, ambo agi e yi eka ba agi é ba e dzu zhezheŋ a wo mbo. Ambo agi e yi ba agi é ba e dzu eka ba Ekristi omba baŋ á ba. Agi é zhiŋ e dzu eka baŋ, okyku eshi agi é ka ŋa eka baŋ a wo zhezheŋ.

³ Areyaŋ a mbo la a wo edgu okayiozhẽ he lo okro ba Ekristi a la a nyuŋ eshri baŋ a zga kye, eka ba Ekristi a mbo a wo kye.

⁴ Areyaŋ a mbo la a kpo odlobi, a wo la ombgu ma okyku baŋ a pre odaŋ ba Ahogbrẽ, okyku eshi opreodaŋ angyiŋ o wo odlobi.

⁵ Agimi e yi ba Ekristi a ba okyku o daŋ a sko odlobi ba moarehwĩ a sku mo. Nga odlobi o ka o wo ka la ŋa mbo ku-ku.

⁶ Okyku eka he, areyaŋ a mbo la a la a dzu esõ ba Ekristi le, a la a sko eshri baŋ a zga okyku o kpo odlobi mbo. Ambo are la a sko eshri baŋ a zga okyku o kpo odlobi le, are he lo a ka Ekristi a ka mbo, nga aŋa a ka a yi ŋa a mbo mbo.

⁷ Agimi anwye, agimi e da arekyeŋ a bile gimi mbo! Areyaŋ a mbo la a kpo ayakplo la a wo shasha, a wo arehwĩ ba odlodzi angyiŋ, eka ba Ekristi a mbo a wo arehwĩ ba odlodzi.

⁸ Areyaŋ a mbo la a shri eshri baŋ a zga okyku o kpo odlobi le, a wo arehwĩ ba Eshitaŋ angyiŋ. Okyku eshi a zga okũ oriori, odlobi o dzu atsoŋ eda la e gbyi angyiŋ ta la Eshitaŋ. Anwye Ahogbrẽ a ba okyku o jygi etum ba Eshitaŋ angyiŋ.

⁹ Areyaŋ a mbo la a wo anwye ba Ahogbrẽ le, aŋa a la a shri eshri baŋ a zga okyku o kpo odlobi mbo. Okyku eshi edgu odzudzu ba Ahogbrẽ angyiŋ o wo esõ baŋ. Nga okyku ba Ahogbrẽ angyiŋ a wo Adaŋ, aŋa a kpo a gbu baŋ a sko eshri baŋ a zga okyku o kpo odlobi mbo.

¹⁰ Agimi e ka ondundum la o wo zhezheŋ okro ba odzudzu ba moanwye ba Ahogbrẽ pa la moanwye ba Eshitaŋ. Areyaŋ a mbo la a kpo ayakplo la a wo shasha mbo, o mbo le a klo anáŋ mbo le, a wo anwye ba Ahogbrẽ angyiŋ mbo.

Agi e klo egi

¹¹ O raŋ o gre ba agi e klo egi. Alo angyiŋ a wo oshpa ba agimi e gno okũ oriori.

¹² O raŋ o gre ba agi e dzu eka ba Akayinu mbo, okyku eshi aŋa a wo a ba Eshitaŋ angyiŋ, nga a bga anáŋ. Okyku eshi Akayinu a bga anáŋ he lo? A bga ŋa okyku ba ayakplo baŋ a kpo a wo abi, ambo ayakplo ba anáŋ a kpo a wo adzi.

¹³ Okyku eka he, agimi anáŋ, agimi e ka egbregbre mbo o wo ba moarehwĩ ba obiŋ hi a tla gimi.

¹⁴ Agi e yi ba agi e dzu eku e zga nga e ba okro ba esõ. Agi e yi ba alo o wo eka he lo, okyku eshi agi e la e klo moanigi. Areyaŋ a mbo la a wo la oklo ma mbo le, aŋa a yi a wo ibu ba eku angyiŋ.

¹⁵ Areyaŋ a mbo la a tla anáŋ le, aŋa a wo are la a bga ebga angyiŋ. Agimi e yi ba are la a bga ebga a wo la esõ ba gbagbu ma mbo.

¹⁶ Ekristi a shri esõ baŋ a shri a di, okyku gi ozhẽ he lo angyiŋ agi e yi ekplo la e la e wo oklo. Nga o raŋ o gre ba agi a mbo e shri esõ bi e shri e di okyku moanigi!

¹⁷ O wo ba are a wo angyiŋ ma, nga o wo baŋ a ka anáŋ a gbaŋ emakyeŋ le, ambo o wo baŋ a zhiŋ okũ a blu ŋa le, aŋa á kpo anyu á ba a lu ma aŋa a wo la oklo ma esõ baŋ okyku Ahogbrẽ?

¹⁸ Agimi anwye me! Agi e da oklo bi o dzu egba ta la odlo sha mbo. O raŋ o gre ba alo o dzu oklo ba adlidzi la o tsa eŋa otum ba alo o kpo.

Oshye-esõ egi ayi ba Ahogbrẽ

¹⁹ Agi é yi ba agi e wo moanwye ba adlidzi ozhẽ he lo angyiŋ. Esõ bi é ka lo zhezheŋ egi ayi ba Ahogbrẽ eka he lo.

²⁰ O wo ba esõ bi e sõ gi ombgu le, agi e yi ba Ahogbrẽ a gre esõ bi nzenze, nga aŋa a yi ekployaŋ a mbo.

²¹ Okyku eka he, agimi akyemeazba, o wo ba esõ bi e sõ gi ombgu mbo le, agi é wo la oshye-esõ egi ayi ba Ahogbrẽ.

²² Agi e la e hwiŋ ekployaŋ a mbo ba agi e la e vẽ, okyku eshi agi e la e kpaŋ odaŋ baŋ nga e la e kpo ekplo la e raŋ ŋa esõ.

²³ A jygu gi odaŋ a lu ma agi e bmi ba adlidzi ta la eshko ba Anwye baŋ Eyesu Ekristi, nga e la e klo egi eka ba Ekristi a jygu gi odaŋ.

²⁴ Areyaŋ a mbo la a kpaŋ odaŋ ba Ahogbrẽ le, a wo esõ ba Ahogbrẽ, nga Ahogbrẽ a mbo a wo esõ baŋ. Agi e yi ba Ahogbrẽ a wo esõ bi ozhẽ ba Ogbgaodzi baŋ a shri a da gi.