1 Eyohana 2 - Ohwihwim Olehe

Ekristi Are la a kpo a ghwo la gi

¹ Ame e ta gimi anwye me akpa he, okyku o da gimi e kpo odlobi mbo. Ambo o wo ba akyeŋ eshki bimi a kpo odlobi le, agimi e ka, agi e wo la Eyesu Ekristi ma. Aŋa a wo are ba odlodzi. Aŋa angyiŋ a la a vẽ okyku gi egi ayi ba Ada.

² Okyku eshi Ekristi ababgo baŋ a wo ozhẽ la o da mo a kyu gi abgo odlobi bi. Ambo odlobi bimi sha angyiŋ mbo, ambo odlobi ba moarehwĩ obiŋ hi pyeŋ.

³ O wo ba agi e la e kpaŋ odaŋ ba Ahogbrẽ le, agi é yi zhe-zheŋ ba agi e yi ŋa.

⁴ O wo ba arekyeŋ a lu mi ma aŋa a yi ŋa, ambo o wo baŋ a kpaŋ odaŋ baŋ mbo le, edgu are he lo a sheŋ akpro angyiŋ, nga adlidzi a wo ka la ŋa mbo ku-ku.

⁵ Ambo are la a kpaŋ odlo baŋ le, edgu are he lo angyiŋ, oklo baŋ okyku Ahogbrẽ o bli. Ozhẽ he lo agi e kpo e gbu ba agi e yi zhezheŋ ba agi e la e dzu esõ ba Ahogbrẽ.

⁶ Are la a lu mi ma aŋa a la a wo ta la Ahogbrẽ le, o raŋ o gre baŋ a dzu eka ba Eyesu Ekristi a dzu.

Odaŋ olehe

⁷ Agimi akyemeazba, ame e ta odaŋ olehe angyiŋ e kom gimi mbo. Alo o wo odaŋ ogbyi angyiŋ. Alo angyiŋ agimi e wo la alo ma okũ oriori. Odaŋ ogbyi lo angyiŋ, o wo oshpa ba agimi e sheŋ e gno bgu.

⁸ Ambo ekayaŋ a mbo, odaŋ ba ame e ta e kom gimi o wo odaŋ olehe angyiŋ. Moa a ka adlidzi ba odaŋ lo okro ba Ekristi ta la okro bimi. Okyku eshi evbu e la e blu, nga ayimom ba adlidzi a sheŋ a zga esĩ a tra a mo.

⁹ Are la a lu mi ma aŋa a wo ayimom lo, ambo o wo baŋ a tla anáŋ le, aŋa a yi a wo evbu angyiŋ a gbu omba he lo.

¹⁰ Are la a klo anáŋ angyiŋ a dzu ayimom. Okyku eka he nga ekplokyeŋ la é ba e da arekyeŋ a kpo odlobi e wo ka la ŋa mbo.

¹¹ Ambo are la a tla anáŋ le, aŋa a wo evbu, nga a la a dzi odzi evbu lo. Aŋa nga a ka a yi okro baŋ a yi mbo, okyku evbu e vga ŋa ayi.

¹² Ame e ta gimi anwye me akpa okyku ba moa a kyu gimi abgo okro odlobi bimi okyku eshko ba Ekristi.

¹³ Ame e ta gimi adugu akpa, okyku eshi agimi e yi ŋa baŋ a wo arehwĩ la a zgi okũ oriori. Ame e ta gimi ola anwye akpa okyku ba agimi e kpo e gre Areabi.

¹⁴ Ame e ta gimi anwye akpa okyku eshi agimi e yi Ada. Nga ame e ta gimi adugu akpa okyku eshi agimi e yi baŋ a wo arehwĩ la a zgi okũ oriori. Nga ame e ta gimi ola anwye akpa okyku ba agimi e wo la oshye ma. Odlo ba Ahogbrẽ o wo ka la gimi, nga agimi e kpo e gre Areabi.

¹⁵ Agimi e klo obiŋ hi mbo, o mbo le ekplokyeŋ ba obiŋ hi. O wo ba agimi e klo obiŋ hi le, agimi e wo la oklo ma okyku Ada esõ bimi mbo.

¹⁶ Ekployaŋ a mbo la e wo e ba obiŋ hi e wo ekplo ba are ba odlobi a la a klo, nga ayakplo ba moarehwĩ a la a ka nga, a la a klo, ta la ekployaŋ a mbo ba moarehwĩ a la a nyom egʼba okyku lo obiŋ hi. Ekplokyeŋ eshki ayakplo he lo e zgi okro ba Ada e ba mbo. Alo pyeŋ a zgi obiŋ hi lo a ba.

¹⁷ Obiŋ hi ta la ekployaŋ a mbo la e wo ma ba moarehwĩ a la a klo lo moa á bre á yi. Ambo are la a la a kpo ayakplo ba Ahogbrẽ a klo le, á dzu ma gbagbu-amo.

Afpu ba Ekristi

¹⁸ Agimi anwye me, omba ba amom-abgo o wo osusku a mo! Moa a lu a da gimi eka ba Afpu ba Ekristi á ba a ba. Nga ohuhuhi, moafpu ba Ekristi nzenze moa a sheŋ a ba bgu. Okyku eka he, agi e ka e bmye ba omba ba amom-abgo lo o wo osusku a mo.

¹⁹ Moa edgu moarehwĩ he lo, moa a wo moarehwĩ ba ogʼba bi angyiŋ mbo. Moa a wo a ba ogʼba bi angyiŋ e mbi, moa a dzu ka la gi. Ambo moa a dzu gi a zga. Alo o tsa zhezheŋ ba akyeŋ a mbo eshki mo a wo a ba ogʼba bi mbo.

²⁰ Ekristi nga a da Ogbgaodzi o gile o zhiŋ o ygi eshri bimi. Okyku eka he nga agimi pyeŋ e yi adlidzi.

²¹ Ame e ta gimi akpa okyku ba agimi e gbaŋ e yi adlidzi angyiŋ mbo, ambo okyku ba agimi e sheŋ e yi adlidzi, nga okyku ba agimi e sheŋ e yi ba akpro a zgi adlidzi ku-ku a ka mbo.

²² Ayi angyiŋ a wo are la a sheŋ akpro? Are la a lu mi ma Eyesu a wo Ekristi mbo angyiŋ a wo are la a sheŋ akpro. Are he lo a wo Afpu ba Ekristi angyiŋ. Aŋa a tla Ada ta la Anwye a mbo pyeŋ.

²³ Nga are la a tla Anwye le, aŋa a tla Ada a mbo ko-ko. Nga are la a yga Anwye le, aŋa a yga Ada a mbo ko-ko.

²⁴ Agimi e da ekplo bimi e gno oriori e dzu esõ bimi. Okyku eshi, o wo ba ayakplo ba agimi e gno okũ oriori a dzu gimi esõ le, ombamba pyeŋ agimi é dzu esõ ba Anwye, ta la Ada.

²⁵ Ekristi a mbo a hwim baŋ á shri esõ ba gbagbu-amo angyiŋ á ba a shri á da gi.

²⁶ Ame e ta gimi oshpa he lo eshri moarehwĩ la a klo o bile gimi.

²⁷ Ambo okro bimi, Ekristi a sheŋ a da Ogbgaodzi o gile o zhiŋ o ygi eshri bimi bgu. Ombayaŋ a mbo ba Ogbgaodzi o wo ka la gimi, alo o wo eheŋ-ekyeŋ ba agimi e klo arekyeŋ okyku o daŋ a nye gimi mbo. Okyku eshi Ogbgaodzi o nye gimi eshri ekployaŋ a mbo. Nga ayakplo ba alo o nye lo a wo adlidzi angyiŋ, a wo akpro mbo. Agimi e bmi ta la onyenye ba Ogbgaodzi nga e dzu esõ Ekristi.

²⁸ Alo o wo odzi ba agimi anwye me e dzu esõ ba Ekristi okyku o da gi e wo la oshye-esõ omba baŋ á ba a ba, nga okyku o da gi e dzu la anzi Olum onda baŋ á ba a ba mbo.

²⁹ Agimi e yi ba Ekristi a wo a ba odlodzi angyiŋ. Okyku eka he o raŋ o gre ba agimi e yi ba areyaŋ a mbo la a kpo ayakplo la a wo kye aŋa a wo anwye ba Ahogbrẽ angyiŋ.