1 Eyohana 1 - Ohwihwim Olehe

Odlo ba esõ

¹ Agi e ta akpa eshri ba odlo ba esõ angyiŋ e shri e kom gimi. Odlo he lo o wo ma, a zga omba ba moa a zga esĩ a kpo obiŋ hi. Agi e gno odlo lo, nga agi e ka lo la ayi bi. Alo o wo eka he lo, agi e ka lo, nga agi e sa e tka lo.

² Omba ba esõ he lo e tsa eŋa zhezheŋ, agi e ka lo. Okyku okũ he lo angyiŋ agi e la e lu odlo eshri lo, nga e lu odlo eshri ba esõ ba gbagbu-amo e da gimi. Esõ ba gbagbu-amo e wo okro ba Ada nga a da gi e ka lo e bmye.

³ Ayakplo ba agi e ka nga e sa e gno, agi e la e lu lo e da gimi, okyku o da gimi e ba e pu ibu ekpom ba agi e la e kpo ta la Ada ta la Anwye baŋ Eyesu Ekristi.

⁴ Agi e ta oshpa he lo okyku o da ovye bi o bli.

Ahogbrẽ a wo ayimom angyiŋ

⁵ Ohuhuhi oshpa he lo angyiŋ agi e gno ba Anwye baŋ. Agi e la e su lo angyiŋ e da gimi. Ahogbrẽ a wo ayimom angyiŋ, nga evbu e wo ka la ŋa mbo ku-ku.

⁶ Nga o wo ba agi e la e lu ma agi e wo la ekpom ka la ŋa, ambo o wo ba agi e la e dzi evbu le, odlo bi ta la otum bi pyeŋ o dzu akpro ototno angyiŋ.

⁷ Ambo o wo ba agi e la e dzu ayimom eka baŋ a mbo a la a dzu ayimom le, agi e wo la ekpom ta la egi, nga amanzhli ba Eyesu la a wo Anwye baŋ angyiŋ a la a ndza odlobi bi pyeŋ nga á da gi e lom pse.

⁸ O wo ba agi e lu mi ma agi e wo la odlobi ma mbo le, agi e bile egi obile angyiŋ. Adlidzi nga a ra abgo a wo esõ bi mbo ku-ku.

⁹ Ambo o wo ba agi e lu odlobi bi egi ayi ba Ahogbrẽ le, agi e fu ŋa eha mbo, okyku eshi aŋa a la a kpo odlodzi. Aŋa nga á kyu gi abgo odlobi bi, nga á ndza ayakplobi ba agi e kpo pyeŋ á sku gi.

¹⁰ O wo ba agi e lu mi ma agi e kpo odlobi mbo le, agi e sko Ahogbrẽ e zga are la a sheŋ akpro angyiŋ. Nga alo o tsa ba odlo baŋ o wo ka la gi mbo.