1 Etimoti 6 - Ohwihwim Olehe

¹ Moare la a wo moawaghrẽ pyeŋ, o raŋ o gre moa a ka moadimo-odne la olbi, okyku o da arekyeŋ a dzĩ eshko ba Ahogbrẽ ta la onyenye bi e la e nye mbo.

² Moawaghrẽ ba moadimo-odne la a lu Ahogbrẽ ma, o raŋ o gre ba moa a dzĩ mo mbo, okyku eshi moa a wo eka ba moanimo angyiŋ. Ambo o raŋ o gre ba moa a zga ayi gble a kpo mo odlodzi a ta ma-ma, okyku eshi moare ba moa a kpo otum okyku mo he lo moa a wo moa la a lu Ahogbrẽ ma, nga moa a wo moare-hwĩ ba moa a wo la oklo ma okyku mo angyiŋ. O raŋ o gre boŋ o nye moare, nga o nyum oshpa eshri he lo.

Onyenye ba akpro ta la angyiŋ ba adlidzi

³ Areyaŋ a mbo la a la a nye ekplokyeŋ ondundum nga a bmi ta la odlo ba adlidzi ba Adigi-odne Eyesu Ekristi mbo, ta la onyenye ba ozhẽ bi mbo le,

⁴ edgu aré he lo a la a nyom egʼba, ambo a ka a yi ekplokyeŋ mbo. Aŋa a la a klo o kla odlo nzenze a gre eshri. Nga edgu he lo e la e shri efpu ta la ogogʼba, ta la odzi, ta la aga abi,

⁵ nga a la a da moare la ba aga mo a kpu nga moa a yi adlidzi mbo, a la a kla odlo ombamba pyeŋ. Moahi lo a la a lu esõ mo ma o dzu mbo le ozhẽ ba Ahogbrẽ o wo ozhẽ ba o gbu angyiŋ angyiŋ.

⁶ Ambo, ozhẽ ba Ahogbrẽ o da are a gbu angyiŋ nzenze o wo baŋ a la a vye ta la ekplo baŋ a wo la alo ma.

⁷ Agi e shri eshi e ba obiŋ hi? Agi e shri emakyeŋ mbo! Agi é sko eshi obiŋ hi é kom ma? Ekplokyeŋ mbo ku-ku!

⁸ Okyku eka he, o wo bi e wo la algori ta la aknye ma bgu le, agi e da ahe lo a tse gi ma.

⁹ Ambo moa la a klo o gbu angyiŋ, moa a la a tsu a gbu obile ta la amgbaŋ ba ogroayi ba adro la efye, edgu la o kom are a hwro o yi enzheovo.

¹⁰ Oklo amgbaŋ angyiŋ o wo esĩ ba edgu odlobiyaŋ a mbo. Moabze a la a zga ayi ngre okyku o hwiŋ lo, okyku eka he moa a dzu ozhẽ ba obmi ba adlidzi a zga nga esõ e bili nzenze.

Onyenye okyku ŋo Etimoti

¹¹ Ambo aŋo, arehwĩ ba Ahogbrẽ, o ngʼba o sku edgu ayakplo he lo pyeŋ. O zga ayi ngre okyku o kpo odlodzi, nga o tspi ozhẽ ba Ahogbrẽ la adlidzi ta la obmi ba adlidzi, ta la oklo, nga o kpo oheheŋ, nga o dzu la esõ ble ekployaŋ a mbo.

¹² O zga ayi ngre nga o knye oŋe ba obmi ba adlidzi, okyku o doŋ o hwiŋ egbre ba esõ ba gbagbu-amo. Okyku odzudzu he lo angyiŋ Ahogbrẽ a bzi ŋo, omba boŋ o zgi egŋe ba obmi ba adlidzi boŋ egi ayi moaegŋe ahwõ nzenze.

¹³ Egi ayi ba Ahogbrẽ la a shri esõ a da ekployaŋ a mbo, ta la egi ayi Eyesu Ekristi la a zgi egŋe adzadzi egi ayi ba Obuntu Ebilatu, ame e jygu ŋo odaŋ.

¹⁴ Ame e lu e doŋ, o kpaŋ odaŋ lo okyekye, nga o da akpu a dzu ma mbo, ma-me o tsa onda ba Adigi-odne Eyesu Ekristi á ba a ba.

¹⁵ Ahogbrẽ nga á da Eyesu á ba omba la o wo shasha lo. Ahogbrẽ ba ohlueshko akyekyeŋ sha a la a ri ekʼpo pyeŋ. Aŋa angyiŋ a wo Areŋ ba moareŋ ta la Adaŋ-odne moadaŋ-odne.

¹⁶ Aŋa sha a wo la á kpu ku-ku mbo. Aŋa a la a dzu ayimom ba arekyeŋ a yi osusku ta la alo a gbu ku-ku mbo. Arekyeŋ a ka ŋa a ka ku-ku mbo, nga arekyeŋ á ka ŋa á gbu mbo ku-ku. Onyuonyuŋ ta la ekʼpo pyeŋ ba gbagbu-amo, moa pyeŋ moa a wo a baŋ angyiŋ! Amin.

¹⁷ Aŋo o shri odaŋ o da moanáŋ la a wo la angyiŋ ba obiŋ hi, okyku o da mo a nyom egʼba ta la alo mbo, nga okyku o da mo a shri okayiozhẽ mo pyeŋ a zga angyiŋ mbo, okyku eshi alo a wo ekplokyeŋ la e tspi mbo. Ambo moa a shri okayiozhẽ mo pyeŋ a shri a zga Ahogbrẽ angyiŋ. Aŋa sha a la a shri ekployaŋ a mbo nzenze a shri a di okyku o da gi e gno oraŋ.

¹⁸ Aŋo o shri odaŋ o da mo okyku o da mo a kpo otum odzi angyiŋ, nga okyku o da mo a kpo a ghwo la moahwõ.

¹⁹ Ozhẽ he lo angyiŋ moa á ba a pla owlama á shki ma okyku asheŋayi-asheŋayi hi. Ohe lo angyiŋ ó ba o dzu esĩ la e wo oshye okyku omba mi lo. Ozhẽ he lo angyiŋ moa á ba a kpo á gbu moa á hwiŋ esõ ba adlidzi.

²⁰ Aŋo Etimoti, o kpaŋ otum ba moa a shri a doŋ. Aŋo o ngʼba o sku odlo ba ototno la o wo o ba Ahogbrẽ mbo, ta la oklaodlo. Nga o tla oyioyi moare a bzi lo ma alo o wo adlidzi, ambo o wo akpu angyiŋ.

²¹ Moabze a la a sko eshri mo a zga eka moa a wo la oyioyi he lo. Okyku eka he nga moa a ta ozhẽ ba obmi ba adlidzi akpu. Okpoghwo ba Ahogbrẽ o dzu ka la gimi pyeŋ.