1 Etimoti 5 - Ohwihwim Olehe

Otum okyku moa la a bmi ba adlidzi

¹ Aŋo o shrom atsoŋ are mbo ambo o lu odlo ka la ŋa eka baŋ a wo adoŋ angyiŋ. Nga o kpo pa la moa ola anwye eka moa a wo moanóŋ.

² Nga o kpo pa la moashe la a tsoŋ eka ba moa a wo moanoŋ, nga o kpo pa la moashe la a ra ola eka moa a wo moanóŋ-alashle, o kpo mo ekployaŋ a mbo la e wo okyekye.

³ Aŋo o ka moa la a wo moashe-eshaku ba adlidzi la olbi.

⁴ Ambo o wo ba ashe-eshaku a wo la moanwye o mbo le moanwye ba moanwye baŋ ma le, o raŋ o gre ba moanwye lo a nye eda nga a dzu la odzudzu ba ozhẽ ba Ahogbrẽ pa la moadimo. Ozhẽ he lo moadimo á hwiŋ owlama mo. Moanwye he lo á raŋ Ahogbrẽ esõ ozhẽ he lo angyiŋ.

⁵ Ashe-eshaku la a wo la arekyeŋ la a kpo a ghwo la ŋa ma mbo, a sko okayiozhẽ baŋ a zga ta la Ahogbrẽ nga a fa olu okyukyku ta la olulum, okyku o da Ahogbrẽ a kpo a ghwo la ŋa.

⁶ Ambo ashe-eshaku la a shri eshri baŋ a zga okyku ognoraŋ ba obiŋ hi le, a sheŋ a kpu bgu. O wo baŋ a wo ayi a mbo, o dzu eka baŋ a sheŋ a kpu angyiŋ.

⁷ Aŋo o shri odaŋ he o da moare, okyku o da arekyeŋ a dzĩ mo mbo.

⁸ Ambo o wo ba arekyeŋ a la a kpo a ghwo la moa ba ogu baŋ mbo le, nga a kpo a ghwo la moa-odne baŋ a mbo mbo le, o dzu eka baŋ a tla odlo ba Ahogbrẽ angyiŋ, nga a wo abi a sa a gre are la a ka a bmi ba adlidzi mbo ku-ku.

⁹ Aŋo o ta eshko ba ashe-eshaku eshki ba ashko lo mbo, ambo o ta eshko ba ashe-eshaku la a gbu eyi ekʼpoefĩ. Nga o dzu omgbybi baŋ a dzu ashe la a kyu eble odgo okyekyeŋ sha.

¹⁰ Nga o raŋ o gre baŋ a wo are la a wo la eda edzi ba moare a yi ŋa la alo. Nga baŋ a wo ashe la a la a nye moanwye baŋ adzadzi nga a la a yga moazhẽ la anyu eŋo-eŋo odne baŋ. O raŋ o gre baŋ a dzu awaghrẽ ba moarehwĩ la a lu Ahogbrẽ ozhẽyaŋ a mbo, nga baŋ a dzu are la a kpo a ghwo la moa la a wo ewu. Nga o raŋ o gre baŋ a dzu are la a shri eshri baŋ a di okyku o kpo otum andandandim la o wo odzi.

¹¹ Aŋo o shri moashe-eshaku la a ra ola o shri o ghwo eshki ba ashko lo mbo, okyku eshi aga ba okyueble á ba mo esõ le, moa á kyu ohwihwim ba moa a hwim ta la Ekristi abgo á zga.

¹² Okyku eka he moa a ta akpu angyiŋ okyku eshi moa a tpi ohwihwim ba moa a hwim oriori ka la ŋa ayi.

¹³ Nga moa a la a dzi adne a la a tpi omba mo ayi, nga ekplo ba ayiekŋe moa a la a kpo onjygu nga moa a la a lu ayakplo la a raŋ a gre ba moa a lu lo mbo.

¹⁴ Okyku eka he, ame e ka alo o raŋ o gre ba ashe-eshaku la a yi a ra ola a kyu eŋa eble, okyku o daŋ a mbre moanwye nga a kpaŋ odne mo, okyku o da moafpu gi a hwiŋ ozhẽ a la a lu odlo ototno eshri bi mbo.

¹⁵ Ame e ka moashe-eshakuabze a sheŋ a zhiŋ a lu Eshitaŋ angyiŋ e ma a mo.

¹⁶ Eshki moashe la a lu Ahogbrẽ ma, o wo moa a wo moashe-eshaku adne mo le, o raŋ o gre ba moa a la a kpaŋ mo okyku o da mo a dzu ewu lo a ta Eklisiya mbo, okyku o da Eklisiya e hwiŋ oshye ba o kpo o ghwo la moashe-eshaku la a wo moarekyeŋ ma mbo.

¹⁷ Moandakʼpo la a kpo otum adzadzi, moa a raŋ o hre mo ékplu eha. Esĩ lo e wo okyku moa la a kpo otum ngre a la a nyum oshpa, nga a la a nye moare odlo ba Ahogbrẽ.

¹⁸ Okyku eshi odlo ba Ahogbrẽ o lu mi le, O bʼbu anyu andu omba alo a la a jygu esekʼpa mbo. Odlo ba Ahogbrẽ o sa o lu mi le, Are la a kpo otum, o raŋ o gre baŋ a hwiŋ egbre baŋ.

¹⁹ Aŋo o yga odlo moa a la a lu eshri andakʼpo mbo, o wo le moare aha o mbo le atra a shri a ba, aŋo o kpo otum ta la alo.

²⁰ O shrom moa la a la a kpo odlobi pyeŋ la eyayi, okyku o da moahwõ a kpo eyli.

²¹ Egi ayi ba Ahogbrẽ, ta la Ekristi Eyesu, pa la moanwyeadga ba esesla ba Ahogbrẽ, ame e shĩ ŋo osheshye, o kpaŋ odlo he lo, nga o kpo akplokyeŋ la ososla mbo, nga o sa osla mbo.

²² Aŋo o kpo omvro okyku o shki abgo boŋ eshri ba areyaŋ a mbo la a klo o kpo otum Adigi-odne mbo. Nga o kpo odlobi eka moahwõ a la a kpo mbo, ambo o kpaŋ eshri boŋ kyekye.

²³ O wa amihĩ sha mbo, ambo o wa ami anab ple okyku o da lo o kpo o ghwo la akpyki boŋ, okyku boŋ o no akpyki omba-mba.

²⁴ Odlobi moabze moa a la a ka lo zheŋ, nga o la o shri mo o yi okro ba ombgu. Ambo odlobi moabze, moa a la a ka lo ambla angyiŋ.

²⁵ Ozhezhẽ he lo angyiŋ, moa a la a ka otum ba owlama zheŋ, nga etum la e wo zheŋ mbo, moa á kpo á gbu moa á ghre lo mbo.