1 Etimoti 3 - Ohwihwim Olehe

Moapasto ba Eklisiya

¹ Odlo he lo o wo adlidzi angyiŋ. O wo ba are a klo o dzu apasto ba Eklisiya le, aŋa a sla otum la o wo odzi nzenze angyiŋ.

² O raŋ o gre ba apasto a wo are la a wo la akpu akplokyeŋ ma mbo. O dzu omgbybi baŋ a wo la ashe akyeŋ sha e ma, nga a dzu are la a nyuŋ a kpo-kpo ekployaŋ a mbo, ta la are la a vu eŋa a ghwo. Aŋa a dzu are la a dzu shasha, nga a la a yga moazhẽ la anyu eŋo-eŋo odne baŋ, nga o raŋ o gre baŋ a wo are la a nye moahwõ odlo ba Ahogbrẽ a gbu.

³ O raŋ o gre baŋ a dzu are la a wa ami anab a kpo ayi mbo, nga a la a wo esõ khakha mbo. Ambo a dzu are la a wo la esõ ble la opyapyaŋ ba esõ ma. A dzu are la a ka ayi amgbaŋ mbo.

⁴ O raŋ o gre baŋ a dzu are la a kpaŋ odne baŋ adzadzi a gbu, nga a kpo a gbu baŋ a kpaŋ moanwye baŋ ozhẽ ba o fa olbi o di.

⁵ Okyku eshi, o wo ba are a ka a kpaŋ odne baŋ a gbu mbo le, aŋa á kpo anyu á ba a kpaŋ Eklisiya ba Ahogbrẽ?

⁶ O raŋ o gre baŋ a dzu are la a yga Ahogbrẽ ehehe angyiŋ mbo, o mbo le aŋa á ygi egʼba. Edgu are he lo, moa á sõ ŋa ombgu eka ba moa a sheŋ a sõ Eshitaŋ ombgu.

⁷ O raŋ o gre baŋ a wo are ba moare la a wo Eklisiya mbo a ka ŋa la olbi, okyku o da mo a ta ŋa anzi nga a daŋ a tsi a gbu amgbaŋ ba Eshitaŋ mbo.

Moandakʼpo ba Eklisiya

⁸ Nga eshri ba moandakʼpo ba Eklisiya, o dzu omgbybi ba moa a dzu moare la a wo la eda edzi, nga a kpo adlidzi, nga moa a dzu moa la a wa ami anab a gre eshri mbo, o mbo le a ri ayi mbo.

⁹ O raŋ o gre ba moa a dzu moare la a kom odlo ba adlidzi ba moa a shri a ba la obmi ba adlidzi la enzi esõ la e wo pyapyaŋ.

¹⁰ O raŋ o gre ba moa a mbga mo a ka ayga. O wo ba moa a ri ombambga lo le, moa á kpo a gbu ba moa a kpo otum he lo.

¹¹ O raŋ o gre ba eda moashe mo e wo eda edzi, nga moa a dzu moa la a kpo onjygu mbo. O raŋ o gre moa a nyuŋ eshri a zga nga a kpo adlidzi ekployaŋ a mbo.

¹² Andakʼpo ba Eklisiya, o dzu omgbybi baŋ a wo la ashe akyeŋ sha e ma nga a kpo a gbu baŋ a kpaŋ moanwye baŋ ta la odne baŋ adzadzi a gbu.

¹³ Moare la a kpo otum ba adlidzi moa a gbu eshko, nga moa a wo la oshye ba esõ ma okyku o su odlo ba obmi ba adlidzi bi e wo la alo ma okŋeobga ba Ekristi Eyesu.

Esi ba eshyẽ ba odlo lo

¹⁴ Eka ba ame e ta gimi akpa he ame e ka ayi ozhẽ okyku o ba o kpre gimi e ka ambla ple.

¹⁵ Ambo o wo ba ame e ta abyi le, akpa he lo dne á ba a tsa gimi eka ekplo la e raŋ e gre bi e kpo odzudzu bi odne ba Ahogbrẽ. Odne he lo angyiŋ o wo Eklisiya ba Ahogbrẽ la a wo la esõ ma. Eklisiya he lo angyiŋ e wo anzoŋ la a kom adlidzi abgo.

¹⁶ Arekyeŋ a kpo a gbu baŋ a dzu evom ta la anyuŋ eshyẽ ba ozhẽ bi mbo ku-ku! Aŋa a ba la egʼba arehwĩ, Ogbgaodzi nga o tsa baŋ a wo la adlidzi, Moanwyeadga ba Ahogbrẽ a mbo a ka ŋa. Moare ahwõ a su osu baŋ a ygi obiŋ hi pyeŋ. Nga moa a bmi ba adlidzi ka la ŋa obiŋ hi lo, Ambla he nga Ahogbrẽ a sko ŋa a gre Ongyeŋ.