1 Etimoti 2 - Ohwihwim Olehe

O hlu Ahogbrẽ eshko

¹ Ekplo ba oriori, ame e shĩ gimi ba moa a vẽ ekployaŋ a mbo okyku moare pyeŋ, nga a fa olu a zhĩ nga a vye Ahogbrẽ,

² nga okyku moareŋ, pa la moandakʼpo pyeŋ la a la a ri ekʼpo, okyku o da gi e dzi e hwile egʼba nga e dzu opya-pyaŋ, nga e fa olbi e da Ahogbrẽ la odzudzu la o wo shasha.

³ Eka he lo e wo edzi nga o raŋ Ahogbrẽ Areoshla bi esõ.

⁴ Aŋa nga a klo moarehwĩ pyeŋ a hwiŋ oshla nga a yi adlidzi.

⁵ Okyku eshi Ahogbrẽ akyakyeŋ sha a wo ma, ta la arekyeŋ la a shri opyapyaŋ a ba agʼbaha ba Ahogbrẽ pa la moarehwĩ. Are he lo angyiŋ a ri Ekristi Eyesu.

⁶ A shri eshri baŋ a di okyku o shla areyaŋ a mbo. Omba la o wo shasha ohe lo o tsa zhezheŋ eka ba Ahogbrẽ a klo moarehwĩ pyeŋ okyku o da moa a hwiŋ oshla he lo.

⁷ Okyku eka he angyiŋ moa a da me e ba okyku o da me e nyum oshpa e ygi moa la a wo moaEyahuda mbo. Oshpa he lo o wo oshpa ba obmi ba adlidzi, ta la adlidzi angyiŋ. Ame e sheŋ akpro angyiŋ mbo, ame e lu adlidzi angyiŋ!

⁸ Ame e klo moarehwĩ okroyaŋ a mbo a fa olu. Ame e klo ba moarehwĩ la a shri eshri mo a da Ahogbrẽ a si abgo mo ongyeŋ nga a fa olu. Ame e klo mo a fa olu lo la olom esõ, ta la oklaodlo mbo ku-ku.

⁹ Ame e klo moashe a la a sko eshri mo a zga ble-ble, nga moa a bʼbu aknye mo adzadzi nga a nyuŋ lo a ka. Moa a ta ozba la o gro ayi eshri mbo, nga moa a ta ozba la ezanariya ta la ézhim la e shka ayi, ta la aknye la a wo la egbmo nzenze mbo.

¹⁰ Ambo moa a la a kpo edgu ayakplo adzadzi ba ashe la a sko eshri baŋ a da Ahogbrẽ a la a kpo.

¹¹ O raŋ o gre ba moashe a dzu tki la opresõ-obiŋ omba moarealom a nye ekployaŋ a mbo.

¹² Ame e bmi ba moashe a nye moarealom o mbo le a ri ekʼpo eshri moarealom mbo. O raŋ o gre ba moa a dzu tki.

¹³ Okyku eshi moa a kpo Adamu ayga moa a kpo Ahawawu.

¹⁴ Nga moa a bile Adamu angyiŋ mbo, ambo moa a bile ashe baŋ angyiŋ a daŋ a pre odaŋ ba Ahogbrẽ.

¹⁵ Ambo ashe á gro ozhẽ baŋ a mbre moanwye, o wo baŋ a zga gble ombamba pyeŋ la obmi ba adlidzi, ta la oklo, ta la esesla, ta la oheheŋ.