1 Ebitru 5 - Ohwihwim Olehe

Ékylu ba Ahogbrẽ

¹ Ame e shĩ moandakʼpo ba Eklisiya la a wo eshki bimi. Ame ababgo me a mbo, e wo andakʼpo ba Eklisiya angyiŋ. Ame e wo egŋe eshri ewu ba Ekristi a kpo. Nga ame e wo la ogʼba eshki ba esesla ba moa á ba a tsa. Ame e la e vẽ gimi,

² okyku o da gimi e dzu moarehwĩ la a kpaŋ ékylu ba Ahogbrẽ a shri a da gimi, nga agimi e kpaŋ lo la oklo. Ahogbrẽ a klo bimi e kpo eka he lo. E kpo otum okyku ohre sha mbo, ambo la oklo ba adlidzi okyku o kpo otum.

³ Agimi e kpo akplokyeŋ la aga okyku o ri ekʼpo eshri moarehwĩ ba moa a shri a da gimi okyku o da gimi e kpaŋ mo mbo. Ambo agimi e dzu eka ozhẽ angyiŋ egi ayi mo.

⁴ Nga omba ba Andakʼpo ba moa la a kpaŋ ékylu he lo a ba le, agimi é yga egbre ba ekla-eshri ba esesla. Alo é shraŋ nga mbo ku-ku gbagbu-amo.

⁵ Nga ozhẽ he lo, agimi ola anwye, o raŋ o gre ba agimi e fa olbi e da moare la a kʼpo gimi. Nga o raŋ o gre ba agimi pyeŋ e kpo ble-ble, nga agimi e kpo e ghwo la egimi. Odlo ba Ahogbrẽ o lu mi le, Ahogbrẽ a tla moare la a nyom egʼba, ambo aŋa a la a kpo a ghwo la moarehwĩ la a wo ble-ble.

⁶ Okyku eka he nga, agimi e ta eshri bimi ble-ble abgo ba, Ahogbrẽ la a wo la anyuŋ ekʼpo ma, okyku o daŋ a da gimi e vre omba la o wo odzi baŋ a sla.

⁷ Agimi e shri ekployaŋ a mbo la e kpo gimi ewu e shri e ta egi ayi baŋ okyku eshi aŋa angyiŋ a wo are la a wo la oklo ma okyku o kpo o ghwo la gimi ombamba pyeŋ.

⁸ Agimi e nyuŋ e dzu, nga e nyuŋ e kʼpu! Okyku eshi afpu gimi la a wo Eshitaŋ, a la a ngla agŋe eka ba embdze la e gbre, e la e klo are baŋ á ba a vu á taŋ.

⁹ Agimi e tspi osheshye ta la obmi ba adlidzi bimi, nga e tla ŋa la osheshye. Okyku eshi agimi a mbo e yi eka ba moahwõ la a bmi ba adlidzi eka bimi hi, obiŋ hi pyeŋ, ba moa a la a kpo edgu ewu he lo.

¹⁰ Ambo ambla bimi e la e kpo ewu okyku omba ple le, Ahogbrẽ ba okpoghwo pyeŋ la a bzi gimi okyku o da gimi e pu ka la ŋa odzudzu ba esesla ba gbagbu-amo okro ba okŋeo-bga ta la Ekristi, aŋa angyiŋ ababgo baŋ, á ba a bli gimi. Nga aŋa á shri oghwo-esõ, ta la oshye, ta la esĩ la e wo zhezheŋ á shri á da gimi.

¹¹ Ekʼpo e dzu e baŋ, gbagbu-amo! Amin.

Oshko ba amom-abgo

¹² Esilvanu angyiŋ a kpo a ghwo la me, a da me e ta etaŋ akpa he lo. Ame e sko ŋa e zga eka anáŋ la a wo la adlidzi. Ame e klo e shĩ gimi nga e zgi egŋe eka ba odlo he lo o wo okpoghwo ba adlidzi ba Ahogbrẽ angyiŋ. Agimi e tspi osheshye ta la alo.

¹³ Moanigi ba Eklisiya ba Ahabila ba Ahogbrẽ a sla mo, moa a la a shko gimi. Anwye me la a ri Amarku a mbo a la a shko gimi.

¹⁴ E shko egimi la oshko ba oklo ba Ekristi. Opyapyaŋ o dzu ka la gimi pyeŋ la e wo moarehwĩ ba Ekristi.