1 Ebitru 4 - Ohwihwim Olehe

Esõ ba e nyiŋ

¹ Eka ba Ekristi a kpo ewu egʼba baŋ, alo o dzu omgbybi ba agimi a mbo e dzu la oshye-esõ nga e kpo ewu okyku okũ he lo. Okyku eshi areyaŋ a mbo la a kpo ewu egʼba le, aŋa á wo ewu ba odlobi nga mbo.

² Okyku eka he, a zga ohuhuhi a yi, o raŋ o gre ba agimi e da Ahogbrẽ a kpo ekʼpo ta la odzudzu bimi la o ra obiŋ hi. Agimi e dzu la okoklo ba egʼba mbo.

³ Okyku eshi ayga, agimi e tpi omba ayi nzenze e la e kpo ayakplo ba moaevbu a la a kpo. Agimi e kpo ayakplo la a wo eka lo mbo. Agimi e gro ayi, nga e wa ami e dro, nga e kpo ekpyle la e wo shasha mbo, nga e la e wa ami ba ogbu, nga e hlu okpko eshko la ohlueshko ba anzi.

⁴ Nga ohuhuhi moaevbu a ka egbregbre eka ba agimi e pu pa la mo ibu odzudzu ba ototno la o wo eka lo mbo. Okyku eka he moa a la a dzĩ gimi.

⁵ Ambo o dzu omgbybi ba moa a shri etsko ba eshri mo, a shri a da Ahogbrẽ. Ahogbrẽ he lo a dzu a bli baŋ á sõ moa la a wo ayi pa la moa la a kpu, ombgu.

⁶ Okyku eka he angyiŋ, moa a nyum Oshpaodzadzi a ygi moare la a sheŋ a kpu a mbo, moare la moa a sõ mo ombgu omba ba moa a wo egʼba ma, eka ba moa a la a sõ areyaŋ a mbo ombgu. Moa a nyum oshpa a ygi egbga moarehwĩ okyku o da mo a dzu la esõ ma okyku Ahogbrẽ.

Moanwyeadga adzadzi la a wo la okpogbu ba Ahogbrẽ

⁷ Amom-abgo ba ekployaŋ a mbo e wo osusku a mo. O raŋ o gre ba agimi e nyuŋ eshri bimi e zga nga e dzu e kʼpu, okyku o da gimi e kpo e gbu nga e fa olu.

⁸ Akplo la a gre pyeŋ, agimi e klo egimi la esõ pyeŋ, okyku eshi oklo o la o shki odlobi nzenze.

⁹ Agimi e yga egimi adne egimi la ovyevye, nga e nyi agla mbo.

¹⁰ O raŋ o gre ba areyaŋ a mbo a kpo otum ta la okpogbu ba Ahogbrẽ a shri a daŋ, okyku ohwihwiŋ moahwõ. Moa a kpo otum eka moanwye-odne la owlama ba Ahogbrẽ a shri edgu okpogbu andandandim a shri a di.

¹¹ Areyaŋ a mbo la a nyum oshpa le, o raŋ o gre baŋ a nyum oshpa ba odlo Ahogbrẽ angyiŋ. Nga areyaŋ a mbo la a kpo otum ba Ahogbrẽ, o raŋ o gre baŋ a kpo lo ta la oshye ba Ahogbrẽ a shri a daŋ, okyku o da mo a hlu Ahogbrẽ eshko ekployaŋ a mbo ibu ba Eyesu Ekristi la a wo la esesla ta la ekʼpo gbagbu gbagbu-amo! Amin.

Okpo ewu okyku Ekristi

¹² Agimi akyemeazba, agimi e da ewu ba agimi e la e kpo hi e dzu gimi ekplo egbregbre mbo. E ka eka ba ekplokyeŋ ehe angyiŋ e kpo ka la gimi mbo.

¹³ Ambo o raŋ o gre ba agimi e kpo ovye angyiŋ okyku ba agimi e pu ta la Ekristi ewu baŋ a la a kpo, okyku o da gimi e bli la ovye angyiŋ omba ba moa a tsa gi esesla baŋ.

¹⁴ O wo ba moa a dzĩ gimi okyku bimi e lu Ekristi ma le, agimi e kpo ovye. O dzu eka ba Ogbagaodzi ba esesla la o wo Ogbgaodzi ba Ahogbrẽ, o ba o gile okro bimi angyiŋ.

¹⁵ O raŋ o gre ba arekyeŋ eshki bimi a kpo ewu eka ba are la a bga ebga o mbo le are la a si mbo, o mbo le are la a gre abgo mbo, o mbo le eka ba are la a gre eshyẽ ayakplo moahwõ mbo.

¹⁶ Ambo agimi e da anzi a kpo gimi omba bimi e la e kpo ewu okyku bimi e lu Ekristi ma mbo. Ambo agimi e vye la Ahogbrẽ okyku ba agimi e wo la eshko ba Ekristi ma.

¹⁷ Omba o kpo okyku o da mo a zga esĩ ba o sõ ombgu, nga moa á zga esĩ á sõ moarehwĩ ba Ahogbrẽ angyiŋ ombgu ori. O wo ba moa a zga esĩ ka la gi le, moa á sõ moa la a bmi ba adlidzi ta la Oshpaodzadzi ba Ahogbrẽ mbo omgbu á ygi ekayaŋ?

¹⁸ Odlo Ahogbrẽ o lu mi le, O wo ba alo o wo ewu ba moarehwĩ la a wo la odlodzi ma á hwiŋ oshla le, Eshi é ba e kpo pa la moare la a tla Ahogbrẽ nga a la a kpo odlobi?

¹⁹ Okyku eka he nga, moare la a la a kpo ewu okyku ba alo o dzu ekplo ba Ahogbrẽ a shri a zga okyku mo, o raŋ o gre ba moa a kpo ayakplo la a wo adzi ombamba pyeŋ, nga moa a shri eshri mo a da Are la a kpo mo, la esõ ekyekyeŋ. Aŋa a la a kpaŋ ohwihwim baŋ ombamba pyeŋ.