1 Ebitru 1 - Ohwihwim Olehe

¹ Akpa he lo a zgi abgo ba Ebitru, are la a nyum oshpa ba Eyesu Ekristi. Akpa he lo a wo okyku moarehwĩ ba Ahogbrẽ a sla mo. Moa a som ayi okyku ewu, nga moa a gre a yi a dzu moazhẽ egʼba ebiŋ ba Obontu, ta la Egalasiya, ta la Akapadokiya, ta la Asiya, ta la Ebitaniya.

² Ahogbrẽ la a wo Ada angyiŋ, aŋa ababgo baŋ a sla gimi okyku ohwihwim baŋ. A da gimi e dzu moarehwĩ ba esesla ozhẽ ba Ogbgaodzi baŋ, nga okyku o da gimi e kpaŋ odlo ba Eyesu Ekristi nga okyku o da amanzhli ba Eyesu a ndza gimi pse. Okpoghwo ta la opyapyaŋ, o dzu ka la gimi nzenze.

Okayiozhẽ ba esõ

³ E da gi e vye la Ahogbrẽ la a wo Adaŋ Adigi-odne Eyesu Ekristi! Okyku okayiekŋe baŋ la o wo ogagre, nga okyku baŋ a shri esõ elehe a shri a da gi ozhẽ baŋ a kso Eyesu Ekristi ongybi. Ohe lo o da gi e wo la okayiozhẽ ba esõ ma.

⁴ Okyku eka he, agi e la e ka ayi ozhẽ ba agi é ba e hwiŋ owlama nzenze ba Ahogbrẽ a shri a zga ma okyku moarehwĩ baŋ. A shri lo a zga Ongyeŋ okyku gimi. Ahe lo, alo o kpo o gbu ba alo o vrẽ mbo, o mbo le ba alo o tpi ayi mbo, o mbo le ba alo o shraŋ mbo ku-ku.

⁵ Owlama o wo ma okyku gimi arehwĩ ba ekʼpo ba Ahogbrẽ e la e kpaŋ, okyku bimi e bmi ba adlidzi omba ba agimi e la e dzu e kʼpu oshla he lo. Moa a shri oshla he lo a zga ma, ba moa á tsa lo omba ba amom-abgo.

⁶ Okyku eka he, agimi e da esõ e gbu gimi obiŋ angyiŋ. Ambo, o dzu mbo, alo o dzu omgbybi angyiŋ ba alo ó kpo gimi ewu esõ ohuhuhi okyku omba ple sha, okyku edgu ewu nzenze la e la e hwiŋ gimi.

⁷ Okũ lo o wo okyku o da mo a yi ba obmi ba adlidzi bimi o wo o ba adlidzi angyiŋ. Azurfa a mbo, la a tpi ayi a gbu, moa a la a bre lo ovo. Okyku eka he nga obmi ba adlidzi bimi la o wo la owlama o gre azurfa, alo o dzu omgbybi ba moa a bre lo, okyku o da lo o ri edzi. Ambla he nga agimi é hwiŋ ohlueshko ta la anyuanyuŋ, ta la ekʼpo Onda ba moa á ba a tsa gimi Eyesu Ekristi.

⁸ Agimi e ka ŋa e ka mbo, ambo ekakahelo agimi e la e klo ŋa. Agimi e ka ŋa ohuhuhi mbo, ambo ekakahelo agimi e la e bmi ba adlidzi ka la ŋa. Okyku eka he agimi e la e kpo ovye la edgu ovye la o wo nzenze. Edgu ovye he lo, anyu a kpo a gbu ba alo a lu eka ba ovye lo o wo mbo,

⁹ okyku eshi agimi e la e hwiŋ owlama eshri ba obmi ba adlidzi bimi. Alo angyiŋ o wo oshla ba esõ bimi e hwiŋ.

¹⁰ Moarehwĩ ba Ahogbrẽ a hom mo otum moa a klo aga nga moa a zhĩ ayakplo eshri ba oshla he lo. Moarehwĩ he lo angyiŋ, a ka nga a lu odlo eshri owlama ba Ahogbrẽ á ba a shri á da gimi.

¹¹ Moa a zga ngre okyku o da mo a yi omba lo, ta la eka ba oshla lo ó ba o ba. Ogbgaodzi ba Ekristi la o wo pa la mo, alo o tsa omba he lo angyiŋ, nga alo o ka nga o lu odlo eshri ewu ba Ekristi á ba a kpo, nga baŋ á ba a ghwo esõ ta la alo. Nga alo o sa o lu odlo eshri ekekʼpo la é ba e ba ambla.

¹² Ahogbrẽ a tsa moarehwĩ baŋ a hom mo otum. A lu ma otum mo lo o wo okyku ohwihwiŋ ba eshri mo angyiŋ mbo. Ma alo o wo okyku gimi angyiŋ. Moa a lu eka he lo angyiŋ eshri ba adlidzi ba agimi e gno ohuhuhi. Moa la a tsa gimi adlidzi lo, moa a wo moanwyeadga ba Oshpaodzadzi, nga moa a lu odlo lo la ekʼpo ba Ogbgaodzi la o zgi Ongyeŋ angyiŋ o ba. Moanwyeadga ba Ahogbrẽ a mbo a klo o ka adlidzi he lo o bmye.

Moa a bzi gi okyku odzudzu ba esesla

¹³ Agimi e nyuŋ eshri bimi e zga okyku o kpo otum a mo. E dzu e ka, nga e shri okayiozhẽ bimi pyeŋ e zga ibu owlama ba moa á shri á da gimi omba ba moa á tsa gimi Eyesu Ekristi.

¹⁴ E kpaŋ odlo ba Ahogbrẽ nga e da edgu okoklo ba ayakplo ba agimi e wo la alo ma omba bimi e wo efĩ o ri ekʼpo eshri bimi mbo.

¹⁵ Ambo agimi e dzu la esesla ekployaŋ a mbo ba agimi e la e kpo, eka ba Ahogbrẽ la a bzi gimi a mbo a wo la esesla.

¹⁶ Nga odlo ba Ahogbrẽ o lu mi le, Agimi e dzu la esesla, okyku eshi ame e wo la esesla.

¹⁷ Omba ba agimi e fa olu e vẽ Ahogbrẽ la a la a sõ moare ombgu ozhẽ okyekyeŋ, eka ekployaŋ a mbo ba areyaŋ a mbo a kpo, agimi e la e bzi ŋa ma Ada. Okyku eka he, agimi e kpo otum ta la omba bimi la o ra obiŋ hi ayi okyku o hlu ŋa eshko,

¹⁸ okyku eshi agimi e yi zhezheŋ eka ekplo ba moa a hre okyku o da gimi e hwiŋ odzudum abgo edgu odzudzu ototno ba moadigimi. Alo o wo ekplokyeŋ la e tpi ayi eka azurfa ta la ezanariya angyiŋ mbo.

¹⁹ Oshriondba ba Ekristi la o wo egbmo o gre eshri angyiŋ o shri odzudum lo o da gimi. Ekristi he lo a wo eka anwye ekylu la a wo sese nga a wo la engla egʼba mbo.

²⁰ Ahogbrẽ a sheŋ a sla ŋa ayga moa a kpo obiŋ hi. Nga moa a shri ŋa a tsa omba ba amom-abgo he okyku gimi.

²¹ Okyku ŋa angyiŋ agimi e bmi ba adlidzi ta la Ahogbrẽ la a kso ŋa okro eku nga a shri ekekʼpo a shri a daŋ. Okyku eka he, obmi ba adlidzi bimi ta la okayiozhẽ bimi, e da mo a dzu gaŋ ibu ba Ahogbrẽ.

²² Nga ohuhuhi, agimi e sheŋ e nyuŋ eshri bimi e ndza ozhẽ ba okpaŋ adlidzi, nga agimi e dzu la oklo ba adlidzi okyku moanigimi la a bmi ba adlidzi a mbo. Okyku eka he nga agimi e la e klo egimi la esõ bimi pyeŋ.

²³ Okyku eshi okro ba odlo ba Ahogbrẽ la o wo la esõ ma nga ba alo ó dzu ma gbagbu-amo, moa a sa a bla gimi a mbre eka moanwye ba ada la á kpu ku-ku nga mbo.

²⁴ Odlo ba Ahogbrẽ o lu mi le, Moarehwĩ pyeŋ a wo eka ba asoso ba akla angyiŋ. Nga ozba mo pyeŋ o wo eka ba ambumbwi ba asoso angyiŋ. Asoso a kpu le, ambumbwi a mbo a kpo nga a kpu a hwom a ygi obiŋ.

²⁵ Ambo odlo ba Adigi-odne ó ra ó dzu ma gbagbu-amo. Oshpaodzadzi angyiŋ o shri odlo he lo o shri o kom gimi.