تیتوس 3 - کتاب مقدس به زبان گیلکی - گویش شرقی

هرته خؤرم کار ئبه حاضیر ببین

¹ اوشؤنه یاد بأر که حاکیمؤن و صاحیب منصبؤن فرمؤنبر ببون و هرته خؤرم کار ئبه حاضیر ببون.

² هیکس بده نوگؤن، دعوا نگیرن، آرؤم ببون و همه ته مردوم همرأ ادب أجی کردکار بدأرن.

³ چون أمرأم یگ زمؤن نادؤن بیم و نافرمؤن و گومراه، همه جور هوا و هوس و خوشی ئن نؤکر بیم و حسودی و کینه مئن زیندگی گودیم. مردوم أمرأجی نیفرت دأشتن و أمه کس کس أجی.

⁴ اما او زمت که أمئه نجات دهنده خدا مهربؤنی و اون محبت، مردوم ئبه آشکارأبؤ،

⁵ او أمره نجات بدأ. ای نجات نه او کارؤن وأسی که أمه صالحی مئن بودیم، بلکی خوشه رحمت خؤنی و او شوردن راه مئن بو کی بواسیطه او، روح القدس أمره تازه تولد و تازه زیندگی هدأ،

⁶ کی خدا، هو مقدس روحه بواسیطه أمئه نجات دهنده عیسی مسیح، فت و فراوؤن أمئه سر فوده

⁷ تا اون فیض همرأ صالح به حیساب بأیم و عَین او امید که ابدی زیندگیِ دأنیم، واریثؤن ببیم.

⁸ ای گبه شأنه ایطمینؤن گودن و تأجی خأنم کی ای چیزؤن سر ایصرار بدأری تا اوشؤنی کی خدا ایمؤن بأردن، اوشؤن حواس بومؤنه کی خوشؤنه خؤرم کارؤن ئبه وقف بوکونن. ای چیزؤن، مردوم ئبه خوبه و فایده دأنه.

⁹ ولی جنگ و جدال أجی کی حیماقت سره، شجره نؤمه ئان أجی، ایختلافؤن و دعوا و مرافعه ئان أجی کی شریعت باره ایسن، دوری بوکون. چونکی بی فایده و بی أرزشن.

¹⁰ او کس باره کی سیوایی تؤدئنه، یک دفأ و بأزون دو دفأ اونه ایخطار بدی و اون پسی د اون همرأ شؤن و أمأن ندأر.

¹¹ چره کی دؤنی ایطؤچی آدم فاسیدأبؤ و گوناهکاره. او خودش خوشه محکومأکؤنه.

آخرته نصیحتؤن و سلامؤن

¹² هیطؤ که آرتماس یا تیخیکوسه تی ور سرأدئنم، تا تینی تقلا بوکون نیکوپولیس شهر می ورجه بأی، چونکی تصمیم بیتم زمسّؤنه اورأ بیسم.

¹³ تا اؤره کی تینی، وکیل زیناس و آپولسه ای سفر مئن کی دأنن کومک بوکون، تی حواس دبون کی کم و کسری ندأرن.

¹⁴ بدأ أمئه مردوم باموجن که احتیاجؤن برطرف گودن وأسی، خوشؤنه خؤرم کارؤن ئبه وقف بوکونن و بی ثمر نبون.

¹⁵ همه ته اوشؤنی کی می همأ ایسأن، تئه سلام رسؤنئنن. اوشؤن ئبه که أمره ایمؤن مئن دوست دأنن سلام برسؤن. فیض شمه همه ته همرأ ببون.