تیتوس 2 - کتاب مقدس به زبان گیلکی - گویش شرقی

درست تعلیمه یاد بدن

¹ اما تو او چیِ که عَین درست تعلیم ایسه یاد بدی.

² پیرمرداکؤن هوشیار و باوقار ببون، خوشؤن نفس جلؤ بگیرن و ایمؤن و محبت و پایداری مئن درست رفتار بوکونن.

³ پیرزناکؤن نی خأ خوشؤن حرمته بدأرن، ایفترا نزنن و زیادی شراب خؤردن برده نبون. اوشؤن خأ هرچیِ کی خؤرمه، تعلیم بدئن

⁴ تا جوؤن زناکؤنه یاد بدئن کی مرددوست و زأکدوست ببون،

⁵ خوشؤن نفس جلؤ بدأرن و پاک ببون، کدبانو و مهربؤن و خوشؤن مرداکؤن فرمؤنبر ببون، تا خدای کلؤم بد بوته نبون.

⁶ هیطؤ جوؤن مرداکؤنم ایصرار بوکون کی خوشؤن نفس جلؤ بگیرن.

⁷ همه چی مئن خؤرم کارؤن ئبه یکته نمونه ببأش، تی تعلیم مئن صاف و صادق و باوقار ببو

⁸ و یک جور درست گب بزن کی نشأسه بون عَیبی اون سر نأن، تا مخالفؤن منّیسه بون أمرأجی بدی بیاجن و شرمنده ببون.

⁹ نؤکرؤنه تشویق بوکون که همه چی مئن خوشؤن أربابؤن فرمؤنبر ببون، بی ای کی بوگو واگو بوکونن اوشؤنه راضی بدأرن،

¹⁰ دوزی نوکونن، بلکی خوشؤن خؤرم ایمؤنه تمؤم و کمال نوشؤن بدئن تا هرچی مئن أمئه نجات دهنده خدا تعلیم قشنگیِ به خوبی نشؤن بدئن.

¹¹ چونکی خدای فیض آشکارأبؤ، او فیض که همه ته مردومه نجات دئنه

¹² و أمره یاد دئنه کی بی دینی و دونیا هوا و هوسه ویلأکونیم، أمئه نفس جلؤ بدأریم و صالحی و دینداری همأ ای دؤره مئن زیندگی بوکونیم،

¹³ و أمئه او موارک امید رافا بیسیم، یعنی أمئه عظیم خدا و أمئه نجات دهنده عیسی مسیح جلال آشکارأبؤن

¹⁴ کی خوشه جؤنه أمئبه هدأ تا أمره هرته شرارت أجی رهایی بدئه و پاک مردومی خوشئبه چاکونه که هچی خودش شی ببون و خؤرم کارؤن ئبه غیرت بدأرن.

¹⁵ ای چیزؤنه اعلؤم بوکون و تمؤم ایقتدار همرأ تشویق و تؤبیخ بوکون. نوگذأر هیکس تأ ندئه بؤ بگیره.