تیتوس 1 - کتاب مقدس به زبان گیلکی - گویش شرقی

¹ پولس جی، خدا نؤکر و عیسی مسیح رسول، کی تعیین بوبؤم تا خدای دؤجئرؤن ایمؤنه تقویت بوکونم و او حقیقته کی مطابق دینداری ایسه بوگؤم،

² او حقیقت طبق امید به ابدی زیندگی ایسه که او خدا که هرگی دورؤغ نوگونه، قبل ای کی دونیا بنا ببون، اون وعدهَ أمره هدأ

³ و مناسب وقت مئن او وعده آشکار بوبؤ، او کلؤم مئن که اون اعلؤم أمئه نجات دهنده خدا حکم همرأ، مأ بسپارده بوبؤ.

⁴ تیتوس ئبه که عَین او ایمؤن که أمه همه ته نصیب بوبؤ، می حقیقی زأکه: فیض و صلح و سلامتی، پئر خدا یأجی و أمئه نجات دهنده أجی، مسیح عیسی، تئبه بأ.

ریش سیفیدؤن صفتؤن

⁵ تأ این وأسی کرت جزیره مئن بنأم تا نیصفه نیمه کارؤنه سر و سامؤن بدی و هوطؤ کی تأ بوتم، هر شهر مئن ریش سیفیدؤنی بنی.

⁶ کلیسا ریش سیفید نخأ هیچی اون زیندگی مئن دبون که اون ئبه سرأکؤ بوخؤره، یکته زنأک مردأی ببون و باایمؤن زاکؤن بدأره که اوشؤنه هرزگی و نافرمؤنی به متهم گوده نشأسه بون.

⁷ چون یکته ناظیر کی خدای مباشیر ایسه، نخأ هیچی اون زیندگی مئن دبون که اون ئبه سرأکؤ بوخؤره. او نخأ مغرور یا توندمیجاز یا عرقخؤر یا زورگو ببون یا ای کی پول ئبه حیرص بزنه،

⁸ بلکی خأ میمؤندوست ببون، خوبیِ دوست بدأره، خوشه نفس جلؤ بدأره، درستکار و مقدس ببون و نظم بدأره.

⁹ او خأن او قابیل اعتماد کلؤمه که یاد بیته، قایم دچکه، تا بوتؤنه درستِ تعلیمه یاد بدئه و اوشؤنی ئم کی ای تعلیم ضیدن، تؤبیخ بوکونه.

¹⁰ چونکه یاغی ئن، هپراگبزنؤن و چاچولبازؤن زیادن، علی الخصوص اوشؤنی کی ختنه بؤن ئبه ایصرار دأنن،

¹¹ اوشؤن توک مچهَ خأ دبستن، چونکه اوشؤن همه ته خؤنواده ئانه دکألنئنن و ناحق سود وأسی او چیزؤنیِ تعلیم دئنن کی نخأ تعلیم بدئن.

¹² یکته از اوشؤن پیغؤمبرؤن بوته: «کرتِ همه ته مردومؤن دورؤغگؤن، شرور وحشی جؤنورؤن، شوکؤمپرست و تنبل ایسن.»

¹³ ای شهادت راسته. پس اوشؤنه سخت تؤبیخ بوکون تا ایمؤن مئن درست ببون

¹⁴ و یهود داستؤنؤن و اوشؤن احکؤمه که حقیقت أجی دوره، گوش نگیرن.

¹⁵ پاک آدمؤن ئبه همه چی پاکه، اما اوشؤن ئبه کی نجیس و بی ایمؤنن، هیچی پاک نئه. بلکه هم اوشؤن فیکر و هم اوشؤن وجدؤن نجیسه.

¹⁶ اوشؤن ایدعا دأنن کی خدا شناسنن، اما خوشؤن کارؤن أجی اونه حشا کؤنن. اوشؤن نیفرت انگیز و نافرمؤنن و هرته خؤرم کار ئبه ناجور.