رومیأن 16 - کتاب مقدس به زبان گیلکی - گویش شرقی

سلام و درود

¹ امئه خاخور فیبیَ شمره سفارش کونم. او كِنخْريه شهر کلیسا خدمتکارون اجی ایسه.

² اونَ خُداوند مئن، اوجور کی مقدسین لایق ایسه، قبولاکونین و هر کمکی کی شمراجی بخواسته مضایقه نوکونین، چونکی او خیلیئنَ، حتی خود مأ، خیلی کمک بوده دانه.

³ می همکارون مسیح عیسی مئن، پْريسكيلا و آكيلا، سلام برسونین.

⁴ اوشون، خوشون جونَ می واسی خطر مئن تودان، و نه هچی مو، بلکی تموم غیر یهودیئن کلیسائانم اوشون اجی تشکر کونن.

⁵ هیطورم، کلیساییَ کی اوشون خونه مئن همدیگر هما جیمابنن، سلام برسونین. می عزیز ریفئق اِپینِتوسَ سلام برسونین، او اولته کسی بو کی آسیا مئن مسیحَ ایمون بارده.

⁶ مریمَ کی شیمئبه خیلی زحمت بکشئه، سلام برسونین.

⁷ می فامیلون، آندْرونیکوس و یونیاَ کی می همرا زیندون مئن ایسابون، سلام برسونین. اوشون رسولون مئن، سرشناس ایسن کی مأجی پیشتر مسیحه ایمون داشتن.

⁸ می عزیز ریفئق خُداوند مئن آمپْلیاتوسَ سلام برسونین.

⁹ امئه همکارون مسیح مئن، اوربانوس، و می عزیز ریفئق اِستاخيسَ، سلام برسونین.

¹⁰ آپلیسَ کی خوشه ایمتحونَ مسیح مئن پس بدا دانه، سلام برسونین. آریستوبولُسِ خونواده سلام برسونین.

¹¹ می خویش و قوم هیرودیون و نارکیسیونِ خونواده کی خُداوند مئن ایسان سلام برسونین.

¹² تْريفينا و تْريفوسا، او خادمونی کی خُداوند خدمت مئن زحمت کشنن سلام برسونین و پرسیسَم کی می اوکته عزیز رفئقه کی خُداوند مئن خیلی زحمت کشنه، سلام برسونین.

¹³ روفُسَ کی خُداوند مئن دوجئه بوبو و اونِ مأر کی در حق منم مأری بوده دانه، سلام برسونین.

¹⁴ آسینکْریتوس، فْلِگون، هِرمِس، پاتْروباس و هِرماس و دیگر برارونی کی ایشونِ هما ایسان، سلام برسونین.

¹⁵ به فيلولوگوس، يوليا، نيرياس و اونِ خاخور، و اوليمپاس و تموم مقّدسینی کی اوشونِ همرا ایسان، سلام برسونین.

¹⁶ کس کسونه یکته مقّدس موچی جی سلام بوگوین. تموم مسیح کلیسائان شمره سلام رسونئنن.

آخرته سفارش

¹⁷ ای برارون، خوانم کی شمراجی بخوام مراقبِ اوشونی ببین کی باعث سیوایی ایسن و شیمئه راه مئن سد نئنن و شیمئه یادبیته تعلیم همرا مخالفت کونن و اوشون اجی دوری بوکونین،

¹⁸ چونکی ایجور آدمون امئه خُداوند مسیحَ خدمت نوکونن، بلکی به فیکر خوشونِ شوکومن و قشنگ گبون و خاش والیسی هما، ساده آدمونَ گول زئنن.

¹⁹ شیمئه ایطاعت گودنِ آوازه همه ته مئن دکته؛ و شیمئه واسئه خیلی ذوق کونم. ولی شمراجی خوانم که، او چی جلو که خوبه دونا، و او چی جلو کی بده، ساده ببین.

²⁰ صلح و سلامتی خدا خیلی زود شیطونَ شیمئه پأن جیر له کونه. امئه خُداوند عیسی فیض شیمئه همرا ببون.

²¹ می همکار تیموتائوس شمره سلام رسونئنه. می خویش و قوم لوکیوس، یاسون و سوسیپاتِرَم شمره سلام رسونئنن.

²² مو، تِرتیوس، کی ای نومهَ بنویشتم، خُداوند مئن شمره سلام رسونئنم.

²³ گایوس کی من و تموم اوشون اجی کی ائره کلیسا مئن ایسان میمؤنداری بوده، شمره سلام رسونئنه. اِراستوس که شهر خزانه‌ دار ایسه، و امئه برار کوآرتوس شمره سلام رسونئنن.

²⁴ «امئه خُداوند عیسی مسیح فیض شمه همه ته همرا ببون. آمین».

²⁵ ایسه جلال اونه کی، تینه شمره عین انجیلی کی مو عیسی مسیحِ باره موعظه کونَم تقویت بوکونه- یعنی عین یکته راز واشکاتن کی پور زمته دخوته بومونسه بو،

²⁶ ولی الون بنا به پیغمبرون بنویشته ئان و خُدای ابدی حکم همرا تموم مردومون ئبه آشکارابو، تا اوشون ایمون بارن و ایطاعت بوکونن-

²⁷ اونَ کی تنها خُدای دونا ایسه، بواسطه ی عیسی مسیح تا ابد جلال ببون! آمین.