رومیأن 14 - کتاب مقدس به زبان گیلکی - گویش شرقی

همدیگرَ قضاوت نوکونین

¹ کسی کی اونِ ایمون ضعیف ببون، شیمئه مئن را بدین، اما نه این واسئه که اون عقاید باره اون همأ بوگو واگو بوکونین.

² یگ نفر ایمون اونَ ایجازه دئنه کی هر غذایی بخُوره، ولی یک نفر ده کی ضعیفه، هچی سبزی خُونه.

³ او کی همه چی خونه نخا اونئه کی نُخونه کوچیکا کونه؛ و او کی همه چی نُخونه، نخا اونئه کی همه چی خونه، قضاوت بوکونه. چونکی خُدا اونَ قبولاگوده دانه.

⁴ تو کیسی کی یک نفر دیگر نوکرَ قضاوت کونی؟ چی او خوشه ایمون سر بیسه یا بکئه اون اربابه ربط دانه. و اونم خوشه پا سه ایسنه چونکی خُداوند تینه اونَ سرپا بداره.

⁵ یگ نفر یکته روجه الباقی روجون اجی بهتر دؤنه؛ در حالی کی یک نفر دیگر، تموم روجونَ یگجور دونه. هرکس خأ خوشه فیکر مئن خوشه عقاید باره خاطیرجمع ببون.

⁶ او که یکته خاصِ روج احترومَ دانه، خُداونده احتروم ئبه ای کارَ کونه. او کی خُونه، خُداوند احتروم واسی خُونه، چونکی خُدا شُکر کونه. ولی اونیئم کی نخُونه، اونم خُداوند احتروم ئبه ای کارَ کونه و خُدا شُکر کونه.

⁷ چونکی هیتته از اَمه امئبه زیندگی نوکونیم و هیتته از اَمه امئبه نمینیم.

⁸ چره که اگه زیندگی کادریم، خُداوند ئبه کونیم، و اگه مینیم، خُداوند ئبه مینیم. پس چی زیندگی بوکونیم، چی بمیریم خُداوند شی ایسیم.

⁹ چونکی مسیح هم هین واسئه بمرده و زینده وابو، تا هم زینده ئان و هم بمرده ئانِ خُداوند ببون.

¹⁰ پس تو چره تی برارئه داوری کونی؟ یا تو چره تی برارِ پست شومارنی؟ چونکی اَمه همته خُدا داوری تخت جُلو ایسنیم.

¹¹ چره کی اشعیای پیغمبر کتاب مئن بنویشته بوبو: «خداوند گونه: به می زیندگی قسم هر چکره ای می جُلو هچمنه و هر زبونی خُدا ایقرار کونه.»

¹² هرته از اَمه خوشه حیسابَ خُدا پس دئنه.

¹³ پس، باین بازین کس کسونه قضاوت نوکونیم. در عوض تصمیم بگیرین کی هیچ سنگی گراخوردن ئبه و یا مانعی شیمئه برار راه سر ننین.

¹⁴ مو عیسی یِ خُداوند مئن دونم و قانع ایسَم کی هیچی خوشئبه نجیس نئه. ولی اگه یک نفر یک چئه نجیس بودونه، اونِ به نجیسه.

¹⁵ اگه تی غذا خوردن همرا تی برار اذئت کونی، دِه محبت همرا رفتار کادننی. تی غذا خوردن هما، تی برارَ کی مسیح اون واسی بمرده، هلاک نوکون.

¹⁶ پس نوگذارین او چی واسی کی خورم شومارنین، بد بوگون.

¹⁷ چونکی خُدا پادشایی، خوردن و واخوردن نئه، بلکی صالحی، صلح و سلامتی و شادی روح القدس مئن ایسه.

¹⁸ هرکس ایطو مسیحَ خدمت بوکونه، خُدا اونَ قبول دَانه و مَردومم اونَ تصدیق کونن.

¹⁹ پس باین اوچیِ دومبال دبیم کی باعث برقراری صلح و صفا و همدیگر ایمونِ تقویت بنه.

²⁰ غذا خوردَن واسی خُدا کارَ خرابَ نوکون! راس راسه تموم غذائان پاکن، ولی هر غذائی کی باعیث ببون یگ نفر بکئه، کار دُرستی نیه.

²¹ بهتره که گوشت نوخوری یا شراب وانخوری یا کاری نوکونی کی باعیث ببون تی برار بکئه.

²² تی ایمونه ای چیزون باره، تون و تی خُدا مئن بدار. خوشا بحال او کس کی او چی واسی کی خوشه باره تَصدیق کونه، خودشه داوری نوکونه.

²³ ولی کسی کی یکته غذا خوردن واسی شک دانه، اگه اونَ بوخوره محکومابنه، چونکی ایمون همرا نخورده و اوچی کی ایمون اجی نبون، گُنا ایسه.