رومیأن 13 - کتاب مقدس به زبان گیلکی - گویش شرقی

صاحیب منصبؤن أجی ایطاعت گودن

¹ هرکس خا صاحیب منصبون اجی فرمون ببره، چونکی هیچ صاحیب منصبی نیسأ، جوز خُدا طرف. صاحیب منصبونی یم کی ایسأن، خُدا ور اجی معینابون.

² پس هر کَس کی صاحیب منصبون ضید ویریسه، ضد او چی کی خدا معین بوده ویریسأ؛ و اوشونی کی ایطو کونن، داوری بنن.

³ چون اوشونی کی درست رفتار کونن حاکیمون اجی ترس ندانن، امّا خلافکارون اوشونه ترسنن. خانی صاحیب منصبون اجی نترسی؟ پس او چیَ کی درسته انجوم بدی کی تأ تحسین کونه.

⁴ چونکی او تی خیر واسی خُدا خدمتکار ایسه. ولی اگه کار خلاف بوکونی، بترس، چونکی هَچی شمشیرَ خوشه کمر سَر دَنبسته. او خُدا خدمتکاره و کسئه کی خُدا واسی اینتقؤم گینه و خدای غضبه، خلافکار سر أبئنه.

⁵ پس آدم خا نه هچی خدا غضب واسی، بلکی وجدونِ واسی هم فرمون ببره.

⁶ اینه واسی نی مالیات هدئنین، چونکی صاحب منصبون، خدا خدمتکارن و ای چیزون أجی مواظبت کونن.

⁷ هرکس حقه اونه هدین: اگه خراجه، خراج هدین، اگه مالیاته، مالیات هدین، اگه احترومه، احتروم بَنین؛ و اگه حُرمته، حُرمت بَنین.

شریعت أنجؤم دأن، بواسیطه محبت

⁸ هیچ دینی هیکسِ گردن ندَارین، جوز ای کی همیشک کس کسه محبت بوکونین. چونکی هرکس یگ نفرَ محبت بوکونه، شریعته به جا بارده.

⁹ چونکی ای حکمون، ’زینا نوکون‘، ’قتل نوکون‘، ’دوزی نوکون‘، ’طمع نوکون‘، و هر ته ده حکم کی ببون، همه ته ای حکم مئن خلاصه بنه کی «تی همسایهَ خودت مورسون دوست بدار.»

¹⁰ محبت، خوشه همسایهَ بدی نوکونه؛ پس محبت، شريعتَ تموم و کمال به انجوم رسونئنه.

¹¹ به علاوه شمه دونین کی چی زمت مئن ایساین، ایسه اونِ وقت برسئه کی خؤ أجی ویریسین، چره که الون در مقایسه با او زمت کی ایمون بارده بیم، امئه نجات نزدیکترابو.

¹² شؤ سر امادره و روج نزدیکه. پس باین تاریکی بد کارونه دیمه بنیم و نور زرهَ دوکونیم.

¹³ باین درست رفتار بوکونیم کی شایسته اوشونی ایسه کی روج روشنایی مئن سر کونن. نه عیاشی و عرق خوری مئن، نه زینا و هرزگی مئن، نه دعوا مرافعه و حسودی مئن.

¹⁴ بلکی عیسی مسیحِ خُداوند شخصیته یکته رخت جور دوکونین و جسمِ هوا و هوسِ واسی تدارُک نینین تا اونِ خواسته ئانَ بجا بارین.