رومیأن 10 - کتاب مقدس به زبان گیلکی - گویش شرقی1 ای می برارون، می دعا و می دیلِ ناجه خُدا ورجه، یهودیئن به اینه کی نجات بیاجن. 2 چونکی مو ایشون باره تینم گوائی بدئم کی خُدا واسی غیرت دانن، ولی نه دونایی همرا. 3 چون او صالحی واسی کی خُدا یاجی ایسه نفهمسن، و اینه واسی کی خوشون صالحی ثابیت گودن دومبال دبون، در برابر او صالحی کی خُدا جی ایسه، خوشون سره جیر ناردن. 4 چون مسيح آخرِ شريعته تا هركسی اونه ایمون باره، صالح به حیساب با. 5 چونکی موسی او صالحی باره که شریعتِ سر بنا ایسه ایطو نیویسنه کی: «او کَس کی ای حکمونَ عمل بوکونه، بواسطه ی اوشون زیندگی خا بداره.» 6 ولی او صالحی کی ایمونِ سر بنا ایسه گونه: « تی دیلِ مئن نوگو”کیسه که آسمون جؤر بوشون؟“» - تا مسيح‌َ جیر باره- 7 یا «”کیسه کی بمردئانِ دُنیا مئن بوشون؟“»- تا مسيح‌َ بمردئان اجی زینده بوکونه. 8 ولی او چی گونه؟ ای کی« ای کلوم تی نزدیکی هننا، تی دهنِ مئن، و تی دیلِ مئن دره.» ای هو ایمون کلوم ایسه که اَمه اعلوم کونیم، 9 که اگه تی زبونِ همرا اعتراف بوکونی «عيسی خُداوندِ» و تی دیل مئن ایمون بداری کی خُدا اونَ بمردئان اجی زینده بوده، نجات گینی. 10 چون دیل مئنه که آدم ایمون ابئنه و صالح بحساب انه، و زبونِ همرا ایسه کی اعتراف کونه و نجات گینه. 11 هوطوکی اشعیای پیغمبر کیتاب گونه:« هرکس اونه ایمون بأره، شرمنده نبنه.» 12 چون یهود و یونانی فرق نوکونه، چره کی هو خُداوند، همه ته خُداوند ایسه و تموم اوشونی کی اونَ دوخونن، برکتِ فراوون دئنه. 13 چون «هرکی خُداوند نومَ دوخونه، نجات گینه.» 14 پس چطو یک نفره دوخونن کی اونَ ایمون ناردن؟ و چطو یگ نفره ایمون بارن کی اونِ باره هرگی نشتوسن؟ و چطو بشتوئن، اگه یگ نفر اوشون ئبه موعظه نوکونه؟ 15 و چطو موعظه بوكونن، اگه سرادا نبون؟ هوطوکی اشعیای پیغمبر کیتاب مئن بنویشته بوبو: «اوشونِ لنگون کی انجیل خورم خبرَ موعظه کونن، چی قشنگه.» 16 ولی اوشون همه ته انجیله قبول نودن، چونکی اشعیای پیغمبر کیتاب مئن گونه: « ای خُداوند، کیسه كه اَمئه پيغومَ باور بوده؟» 17 پس ايمون، پيغوم ایشتوسن اجی هنه و پيغوم ایشتوسن، مسیحِ کلومِ را یاجی هنه. 18 ولی واپورسنم: مگه نشتوسین؟ البته که بشتوسین: «ایشونِ صدا سراسر زمین مئن دپیته، و ایشونِ کلوم ای سر دُنیا تا او سر دُنیا برسئه.» 19 ولی واپورسنم: مگه اسراییل مردوم، او چیَ کی بشتوسه، نفهمسه؟ اول، موسی گونه: «بواسطه اوشون کی مردوم به حساب نَانن، شیمئه غیرته ویریسونئنم؛ و نادونِ مردوم خاطیری شیمئه غیظه ویریسونئنم.» 20 بازون، اِشعیا پیغمبر جرأت همرا گونه: «اوشونی کی می دومباله نگرسن، مأ بیاتن؛ و خودمَ اوشونی به کی مأ دونخونده بون، نشون بدَام.» 21 ولی اسراییل مردوم باره گونه: «تموم روج می دسونه مردومی کجرو و سرکش سمت درازَ گودم.» |
@ 2024 Korpu Company