رومیأن 1 - کتاب مقدس به زبان گیلکی - گویش شرقی

¹ پولُس اجی، مسیح عیسی نوکر، کی رسالت واسی دوخونده ببو و خُدا انجیلِ به وقف بوبو؛

² هو انجیلی کی پیشتر خُدا، بواسطه ی خوشه پیغمبرون، اونِ وعده مقّدس کتابون مئن بدابو،

³ و اونِ پسر باره، کی داوود نسل اجی طبق جسم بزاسه بوبو،

⁴ و طبق روح قدوسیت، خوشه بمرده ان مئن اجی زینده وابون همرا، قوت مئن اعلوم بوبو که خدا ریکه ایسه، یعنی امئه خُداوند عیسی مسیح.

⁵ خدا بواسطه ی مسیح امره فیض هدا تا اون رسولون ببیم و تموم ملتونه راهنمایی بکونیم کی مسیح نومه ایمون بارن و اون اجی ایطاعت بکونن.

⁶ و ای شیمئه شی ئم ایسه، کی دوخونده بوبوین تا عیسی مسیح شی ببین؛

⁷ تموم اوشونی کی روم شهر مئن ایسان که خدا ایشونه دوست دانه و دوخونده بوبون تا مقّدسین اجی ببون: فیض و سلامتی خُدا طرف اجی، امئه پئر، و عیسی مسیح خُداوندْ، شمره ببون.

پولُس روم شؤنِ واسی ذوق کونه

⁸ اولا، می خُدا بواسطه عیسی مسیح، شمه همه ته خاطیری شُکر کونم چونکی شیمئه ایمونِ آوازه تموم دُنیا مئن دپیته.

⁹ چون خُدایی کی اونه می تموم دیل و جون همرا، اونِ پسر انجیل کار مئن خدمت کادرم، او می گوا کی چطو همیشک می دعائانِ مئن همه وقت شمره یاد ابئنم

¹⁰ و همیشک می دعائان مئن خانم که اگه خُدا بخا سراخر بوتونم شیمئه دئن به بأم.

¹¹ چونکی ذوق دَانم شمره بینم تا روحانی عطاانه شیمئه ایمون قوت واسی شمره هدئم؛

¹² یعنی تا شمه و مو هر دوته همدیگرِ ایمون اجی دیل گرم ببیم.

¹³ ای برارون، نخوانم بی خبر ببین کی چن دفا خواستم شیمئه ورجه بام، امّا هر دفا یکچی پیش بما. خانم کی شیمئه مئنم أننی محصول ببینم، هوطو کی دیگر غیریهودیئنِ مئن بودَم.

¹⁴ مو ما چی یونانیئنَ و چی بَربَرونَ، چی دونائان و چی نادونونِ مدیون دونم.

¹⁵ هین واسی، خیلی ذوق دَانم کی، شمرام کی روم مئن زیندگی کونین، انجیله اعلوم بکونم.

¹⁶ چون انجیل اجی شرمنده نئم؛ چره کی انجیل خُدا قوته، هرکسِ نجات به کی ایمون باره، اول یهودی و بازین غیر یهودی.

¹⁷ چونکی انجیل مئن، او صالحی کی خدا جی ایسه آشکارابنه، کی بنا جی تا آخر، ایمون سر استواره. هوطو کی حَبَقوق پیغمبر کیتاب مئن بنویشته بوبو: «صالح آدم ایمون همره زیندگی کونه.»

خُدا غضب گُناکار آدمیئنِ سر

¹⁸ چون خُدا غضب آسمون اجی هرجور بی خدایی سَر و آدمیئنِ ناراستی سر هنه کی خوشونِ ناراستی همرا حئیقتَ ازبین بئنن.

¹⁹ چون اونچیَ کی خُدا جی شانه شناختن، اوشونِ به آشکار ایسه، چون خُدا اونَ ایشونِ به آشکار بوده.

²⁰ چونکی خُدا او صِفات کی بدئه نبنه، یعنی ابدی قوت و اون ذات الهی، دُنیا خلق بون اجی او چئن مئن کی بساته بوبون واضح بدئه بنه. پس اوشون بهونه ئی ندانن.

²¹ چون هرچن کی خُدا بشناختن، امّا اونَ خُدا مورسون احتروم ننان و شُکر نودن، بلکی خوشونِ فیکر مئن هیچ و پوچ گیرفتارَبون و ایشونِ نفهم دیلونَ ظولمات بیته.

²² هرچن کی ادعای دونایی داشتن، نادون بوبون

²³ و اوشون ابدی خُدای جلاله، او بتون همرا که فانی آدم و پرندئان و جونورون و خزندئانِ مورسونه عوض دکش بودن.

²⁴ پس خُدائم ایشونَ، خوشونِ دیل هواوهوس مئن ناپاکی همرا ویلاگوده، تا خوشون مئن خودشونِ تَنونَ بی حرمت بوکونن.

²⁵ چون اوشون او حئیقتَ کی خدا باره ایسه دوروغ همرا عوض دَکش بودن و خلق بوبوره به جای خالق، پرستش و خیدمت بودن، خالقی کی تا ابد خا پرستش گودن. آمین.

²⁶ پس خُدائم ایشونَ، خوشون هواوهوسِ شرم آورِ مئن به خوشونِ حال بنا. چونکه اوشونِ زناکون، طبیعی رابطهَ غیرطبیعی رابطه همرا عوض دکش بودن.

²⁷ و هین واسی، مرداکونَم طبیعی رابطه اجی زناکون همرا دس بکشئن، و همدیگر هواوهوس آتش مئن بسوتن. مَرد مَردِ همرا شرم آورِ کارون بوده و خوشون بد کارون مکافاته هیتن.

²⁸ هوطو کی اوشونِ به خُدا شناختن ارزش نداشت، خُدائم اوشونه، خوشون فاسید فیکرون مئن ویلاگوده تا او کاری کی نخاس انجوم بدن، بوکونن.

²⁹ ایشون هرجور نادرستی، شرارت، طمع و بدخواهی جی پورن. ایشون هرجور حسودی، قتل، دعوا، فریب و بدخواهی جی ایسن. ایشون چُو درگن،

³⁰ اِفترا زن، خُدا دوشمنون، گستاخ، مغرور و خودشیفته ایسن. و شرورونه کارونِ انجوم دَئنِ واسی، تازه راهون سازنن و خوشون پئر و مار اجی فرمون نبئنن،

³¹ نفهم، بی وفا، بی عاطفه و بی رحم ایسن.

³² هرچن خُدا عادلونه حُکم اجی واخوبن کی اوشونی کی ایجور کارون بوکونن ایشونِ مکافات مرگه، نه فقط خودشون ای کارونَ کونن، بلکی اوشونیئم کی ای کارونَ کونن، تصدیق کونن.