موکأشفه 9 - کتاب مقدس به زبان گیلکی - گویش شرقی

¹ و پنجمی فریشته خو شیپوره فی دوده و مو یکته سیتارهَ بدئم که آسمؤن أجی زمین سر بکته و هاویه چاه کلید، کی تَه ندأنه، اونه هدأ بوبؤ.

² او فریشته هاویه چاهه واگوده. او چاه جی یک چی یکته پیله کوره دود مورسؤن ویریسأ و خورشید و هوا، او چاه دود أجی تاریکأبؤن.

³ بأزین دود مئن ملخؤن زمین سر بمأن و اوشؤنه یکته قدرت، زمین عقربؤن قدرت مورسؤن، هدأ بوبؤ.

⁴ و اوشؤنه بوته بوبؤ کی نه زمین واشؤنه و نه هیچ سبز واش یا داریِ صدمه نزنن، بلکه هچی او مردومه کی خدای مهره خوشؤن پیشؤنی سر ندأنن صدمه بزنن.

⁵ و اوشؤنه ایجازه بدأ بوبؤ که او مردومؤنه پنج ماه عذاب بدئن، بی ای کی هیکسه بکوشن. و اوشؤن عذاب، عقرب عذاب جور بو، او موقع که یگ نفره گزنه.

⁶ او روزؤن مئن مردوم مرگه وامجنن، اما اونه نیاجنن؛ مردن نأجهَ دأنن، اما مرگ اوشؤن أجی فرار کؤنه.

⁷ و او ملخؤن، أسپؤنیِ مؤنسن کی جنگ ئبه حاضیرأبؤن. اوشؤن کله سر یک چی هنّأبو کی طلایی تاجه مؤنس و اوشؤن سر و دیم، آدم مورسؤن بو.

⁸ اوشؤن سر مو، زناکؤن سر مو موسؤن بو و اوشؤن دوندؤنؤن، شیرؤن دندؤنؤن جور بو.

⁹ یکته آهینی سینه پوش خوشؤن سینه ئان سه دأشتن و اوشؤن بالؤن صدا، أرابه ئان و خیلی أسپؤن صدا مورسؤن بو کی جنگ ئبه تأخت زئدبون.

¹⁰ اوشؤن دوم و نیش، عقرب دوم و نیشه مؤنس و خوشؤن دوم مئن ای قدرته دأشتن کی مردومه پنج ماه عذاب بدئن.

¹¹ هاویه چاه فریشته ایشؤن پادشاهه کی عیبرؤنی زبؤن مئن "اَبَدون" و یونؤنی زبؤن مئن "آپولیون" ایسه؛ یعنی ویرانگر.

¹² اولته "وای" ردأبؤ؛ بین، دو ته د "وای" ألئه خأ بأ.

¹³ بأزین ششمی فریشته خوشه شیپوره فی دوده و مو یکته صدا، طلایی قوربؤنگه چهار شاخ أجی کی خدا پیش هنّأبو بشتؤسم

¹⁴ کی ششمی فریشته کی شیپور دأشت بوته: «او چهارته فریشتهَ کی پیله روخؤن، فرات ورجه، أسیرن، آزادأکون.»

¹⁵ پس او چهارته فریشته که او ساعت و او روز و او ماه و او سال ئبه حاضیرأبؤبون، آزادأبؤن تا یک سوم آدمؤنه بکوشن.

¹⁶ سواره نظؤم تعداد دویست میلیون نفر بو که اوشؤن تعداده بشتؤسم.

¹⁷ أسپؤن و او سوارؤنه می رؤیای مئن ایطؤ بدئم: اوشؤن زره ئان رنگ، آتش سورخی و آبی کبود و گوگرد زردیِ دأشت. أسپؤن سر، شیر سره مؤنس و اوشؤن دهن أجی آتش و دود و گوگرد بیرین زی.

¹⁸ ای سوته بلا همرأ، آتش و دود و گوگرد، که اوشؤن دهن أجی بیرین زی، یک سوم آدمؤن بکوشته بوبؤن.

¹⁹ چون أسپؤن قدرت اوشؤن دهن و دوم مئن دبو. چونکی ایشؤن دومؤن، مار مورسؤن بو کی سر دأنه و اوشؤن همأ صدمه زئن.

²⁰ بقیه آدمؤن، کی ای سوته بلا یأجی بکوشته نوبؤن، نه خوشؤن دست کارؤن أجی تؤبه بودن و نه دیوؤن پرستش گودن أجی و نه طلایی بتؤن و نقره ای و برنجی و سنگی و چوبی بتؤن پرستش أجی؛ کی نه تینن بینن و نه ایشتؤنن و نه راه شنن.

²¹ اوشؤن خوشؤن آدمکوشی ئن و جادوگری ئن و بی عیفتی ئن و دوزی ئن أجی نی تؤبه نودن.