موکأشفه 8 - کتاب مقدس به زبان گیلکی - گویش شرقی

هفتمی مُهر

¹ وقتی بره هفتمی مهره بشکنئه، حدودا نیم ساعت آسمؤن مئن سکوت برقرار بوبؤ.

² او موقع او هفت ته فریشتهَ بدئم کی خدا جلؤ ایسنن و اوشؤنه هفت ته شیپور هدأ بوبؤ.

³ و یکته د فریشته بمأ کی یکته طلایی منقل خوشه همأ دأشت و قوربؤنگه ورجه بیسأ. اونه خیلی بخور هدأ بوبؤ تا اونه تمؤم مقدسین دعائان همرأ طلایی قوربؤنگه سر، تخت جلؤ تقدیم بوکونه.

⁴ و بخور دود، او فریشته ئان دستؤن أجی مقدسین دعائان همرأ تا خدا محضر مئن جؤر بوشؤ.

⁵ بأزون فریشته، بخور منقله ویته و قوربؤنگه آتش أجی پورأگوده و زمین سر تؤدأ. آسمؤنگؤر دوخؤنکه دبو و برقی که آسمؤن مئن زی، و زلزله بمأ.

هفت ته شیپور

⁶ و هفت ته فریشته که هفت ته شیپور دأشتن، حاضیرأبؤن تا اوشؤن صدا در بأرن.

⁷ اولته فریشته خوشه شیپوره فی دوده و تگرگ و یکته آتش کی خون همأ قاطی بو، زمین سر بوارسه و یک سوم زمین و یک سوم دارؤن و تمؤم سبزه واشؤن بسوتن.

⁸ دومته فریشته خوشه شیپوره فی دوده و یک چی یکته پیله کوی موسؤن کی تشأگیته بو، دریا مئن تؤدأ بوبؤ و یک سوم دریا خون بوبؤ.

⁹ و دریای جؤنورؤن أجی یک سوم بمردن و کشتی ئن أجی یک سوم نابودأبؤن.

¹⁰ سومی فریشته خو شیپوره فی دوده و یکته پیله سیتاره، یکته سوجؤن مشعل مورسؤن، آسمؤن أجی بکته یک سوم روخؤنه ئان و آؤ چوشمه ئان سر.

¹¹ او سیتاره نؤم "اَفسَنتین" ایسه و یک سوم آؤؤن، افسنتین همأ تلأبؤن. و خیلی از مردوم او آؤ أجی کی تلأبؤبو، بمردن.

¹² چهارمی فریشته خوشه شیپوره فی دوده و یک سوم خورشید و یک سوم مانگ و یک سوم سیتاره ئانه ضربه بوخؤرده، اوجور که یک سوم اوشؤن نور تاریکأبؤ. و یک سوم از روز، بی نور بومؤنسه و یک سوم از شؤ نی هیطؤ.

¹³ بأزون نیا بودم و بشتؤسم که یکته عقاب آسمؤن مئن هوطؤ کی پرواز کأدبو، پیله صدا همرأ ژگله کشی: «وای، وای، وای زمین مردوم سر. چونکی هیچی نومؤنسه او سو ته فریشته شیپورؤن، به صدا در بأ.»