موکأشفه 7 - کتاب مقدس به زبان گیلکی - گویش شرقیمُهر بوبؤرؤن تعداد 1 بأزون چهارته فریشته بدئم کی زمین چهارگوشه ایسأن و زمین چهارته باد جلؤ گینن تا هیچ بادی زمین سر و دریای سر و هیچ دار سر نأ. 2 بأزین یکته د فریشته بدئم که اؤره أجی که أفتؤ جؤر أنه، آسمؤن سمت جؤر بوشؤ و زینده خدای مُهر اون همرأ دبو. و پیله دوخؤنکه همأ او چهارته فریشتهَ که اوشؤنه قدرت هدأ بوبؤبو تا زمین و دریا ضرر بزنن، دوخؤنده و 3 بوته: «تا او زمت که أمه، أمئه خدا نؤکرؤن پیشؤنی سر مهر نزیم، زمین یا دریا یا دارؤنه ضرر نزنین.» 4 و بشتؤسم کی مهر بوبؤرؤن تعداد صد و چهل و چهار هیزار نفر، اسراییل همه ته مردوم طایفه ئان أجی بو. 5 یهودا طایفه أجی دوازده هیزار نفر مهر بوبؤن، رئوبین طایفه أجی دوازده هیزار نفر، جاد طایفه أجی دوازده هیزار نفر 6 أشیر طایفه أجی دوازده هیزار نفر نفتالی طایفه أجی دوازده هیزار نفر منسی طایفه أجی دوازده هیزار نفر 7 شمعون طایفه أجی دوازده هیزار نفر لاوی طایفه أجی دوازده هیزار نفر یساکار طایفه أجی دوازده هیزار نفر 8 زبولون طایفه أجی دوازده هیزار نفر یوسف طایفه أجی دوازده هیزار نفر و بنیامین طایفه أجی دوازده هیزار نفر مهر بوبؤن. یکته پیله جماعت، هرته میلّت أجی 9 بأزون نیگا بودم و بین، یکته پیله جماعت کی هیکس اونه شومأرده منّیس، هرته میلّت و طایفه و مردوم و زبؤن أجی، همه ته او تخت و بره جلؤ ایسأبون. سیفید قبا دوده بون و نخل خالؤنه خوشؤن دست مئن دأشتن. 10 اوشؤن پیله دوخؤن همرأ خؤندن: «نجات أمئه خدا شئه، کی تخت سر نیشته؛ و بره شئه.» 11 و همه ته فریشته ئان، تخت دؤر و پیرؤن و چهارته زینده مخلوق دؤر ایسأبون، و اوشؤن تخت جلؤ خوشؤن دیم همرأ زمین سر بکتن و خدا پرستش گودن و 12 گوتن: «آمین! ستایش و جلال حیکمت، شکر و حرمت و قوت و قدرت أمئه خدای ئبه دبون، تا ابد و تا ابد. آمین!» 13 بأزین یکته او پیرؤن مأ دوخؤنده و بوته: «ایشؤن کی سیفید قبا دوده دأنن، کیسن و کورأرأجی بمأن؟» 14 مو اونه آؤجا بدأم: «أی آقا، اینه تو دؤنی.» و او مأ بوته: «ایشؤن هوشؤنی ایسن که او پیله عذاب أجی بیرین بمأن و خوشؤن قبائانه بره خون مئن بشوسن و سیفیدأگودن. 15 هین وأسئه که: «ایشؤن خدا تخت جلؤ ایسأن، و اون معبد مئن شبنده روز اونه خدمت کؤنن، و او تخت نیشین خوشه حضور همرأ اوشؤنه سرپناه هدئنه. 16 اوشؤن د گوشنه نبنن، و د تشنه نبنن، نه أفتؤ اوشؤن سر فتؤنه، و نه هیچ گرمایی کی بسوجؤنه. 17 چون او بره کی تخت مئن ایسأ اوشؤن گالش بنه، و اوشؤنه زیندگی چوشمه ئان آؤ سمت راهنمایی کؤنه. و خدا هرته أرسؤ اوشؤن چوشمؤن أجی پکأکؤنه.» |
@ 2024 Korpu Company