موکأشفه 21 - کتاب مقدس به زبان گیلکی - گویش شرقی

تازه آسمؤن و تازه زمین

¹ بأزون یکته تازه آسمؤن و یکته تازه زمین بدئم، چون اولته آسمؤن و اولته زمین از بین بوشؤبون و د دریایی ننأبو.

² و مقدس شهر، یعنی تازه اورشلیمه بدئم که آسمؤن أجی، خدا ور أجی، جیر أمأدبو؛ یکته چاکون واکون بوده عروس مورسؤن کی خوشه مردأک ئبه حاضیرأبؤبی.

³ و تخت أجی یکته بولند صدا بشتؤسم کی گوت: «بین، خدا منزل آدمؤن همرأ دره. او اوشؤن همرأ ایسنه، و ایشؤن اون مردوم بنن، و خدا خودش ایشؤن همرأ دره و اوشؤن خدا بنه.

⁴ او هرته أرسؤ اوشؤن چوشم أجی پکأکؤنه. و د مرگی ننأ؛ و د هیچ شیون و هیچ گیریه و هیچ دردی ننأ، چونکه اولته چیزؤن از بین بوشؤن.»

⁵ و او تخت نیشین بوته: «بین، مو تمؤم چیزؤنه تازه واکؤنم.» و هنده بوته: «اینه بنویس، چونکی ای گبؤن راستن و شأنه اوشؤنه اعتماد گودن.»

⁶ و او مأ بوته: «انجؤم بوبؤ! مو "الف" و "ی" و اول و آخر ایسم. مو هرکسه کی تشنه ببون، زیندگی آؤ چوشمه أجی، بی ای کی هیچی هدئه، هدئنم.

⁷ هرکس پیروز ببون، اینه ایرث بئنه و مو اون خدا بنم و او می ریکه.

⁸ ولی ترسوؤن و بی ایمؤنؤن و فاسیدؤن و آدمکوشؤن و زیناکارؤن و جادوگرؤن و بت پرستؤن و تمؤم دورؤغگوؤن، اوشؤنِ همه ته نصیب، بلأگیته سل، آتش و گوگرد همرأ ایسه. ای، دومته مرگه.»

تازه اورشلیم

⁹ بأزین یکته از او هفت ته فریشته که هفت ته پیاله پور از هفت ته آخرته بلا دأشتن، بمأ مأ بوته: «بیه! مو عروسه، یعنی برّه زنه، تأ نشؤن دئنم.»

¹⁰ و او، خدای روح مئن مأ یکته پیله بورز کوه سر ببرده و مقدس شهر، اورشلیمه، مأ نوشؤن بدأ که آسمؤن أجی، خدا ور أجی، جیر أمأدبو.

¹¹ خدا جلاله دأشت، اون شبق شبق یکته گرؤن و کمیاب گؤهره مؤنس، هچی یشم مورسؤن و بلور مورسؤن زنگ.

¹² یکته پیله بورز دیوار دأشت، دوازده ته دروازه همرأ و دوازده ته فریشته اون دروازه ئان سر ایسأبون و او دروازه ئان سر، اسراییل دوازده ته طایفه نؤم بنویشته هنّأبو.

¹³ سوته دروازه مشرق طرف، سوته شمال طرف، سوته جنوب طرف و سوته نی مغریب طرف هنّأبو.

¹⁴ و شهر دیوار، دوازده ته پی دأشت که اوشؤن سر، بره دوازده ته رسول نؤم بنویشته هنّأبو.

¹⁵ و او فریشته کی می همرأ گب زی، یکته طلایی چوب، اندازه زئن ئبه دأشت تا شهر و دروازه ئان و اون دیوارؤنه اندازه بزنه.

¹⁶ شهر مربع شکل بو و اون درازا و پهنا برابر بو. فریشته او شهره اندازه زئن چوب أجی اندازه بیته کی دو هیزار و چهارصد کیلؤمیتر بو. اون درازا و پهنا و بولندی برابر بو.

¹⁷ فریشته شهر دیواره اندازه بیته و آدمی قیاس همأ او دیوار شصت و پنج میتر بو، کی فریشته قیاسم هی بو.

¹⁸ شهر دیوار، یشم أجی بساته بوبؤبو و شهر، خالیص طلا یأجی بو و شیشه مورسؤن زنگ بو.

¹⁹ شهر دیوار پی، همه رقم گوهر أجی قشنگأبؤبو. اولته پی یشم أجی بو، دومته لاجوردی یاقوت أجی، سومته سیفید عقیق أجی و چهارمی زمرد أجی،

²⁰ پنجمی سورخ عقیق أجی، ششمی آتشی عقیق أجی، هفتمی زبرجد أجی، هشتمی کبود یاقوت أجی، نهمی زرد یاقوت أجی، دهمی سبز عقیق أجی، یازدهمی فیروزه أجی و دوازدهمی بنفش یاقوت أجی.

²¹ و شهر دوازده ته دروازه، دوازده ته مروارید بون؛ هرته از دروازه ئان، یکته مروارید أجی بساته بوبؤبو. شهر خیابؤن خالیص طلا یأجی بو و شیشه جور زنگ.

²² و شهر مئن هیچ معبدی ندئم؛ چونکه اون معبد، خداوند خدای قادر مطلق و بره ایسن.

²³ و شهر احتیاج ندأنه خورشید و مانگ اونه رؤشنأکونن، چونکی خدای جلال اونه نور هدئنه و بره اون چراغه.

²⁴ میلّتؤن اون نور مئن مجنن و زمین پادشائان، خوشؤن جلاله اؤره أبئنن.

²⁵ او شهر دروازه ئان هرگیز روز مئن دبسته نبنه و اورأ هرگی شؤ دنکئنه.

²⁶ میلتؤنِ جلال و حرمته اؤره أبئنن.

²⁷ ولی هیچ ناپاکی و هیکس که اون کارؤن نیفرت انگیز و دورؤغ أجی ببون، هرگی اؤره راه پیدا نوکؤنه؛ بلکه هچی فقط اوشؤنی که اوشؤن ایسم، بره حیات دفتر مئن بنویشته بوبؤ، اؤره راه پیدا کؤنن.