موکأشفه 20 - کتاب مقدس به زبان گیلکی - گویش شرقی

هیزار سال سلطنت

¹ بأزین بدئم یکته فریشته آسمؤن أجی جیر أمأدره و هاویه چاه کلید اون همرأ دره. و یکته پیله زنجیل خوشه دست مئن دأنه.

² و فریشته، یوها که هو قدیمی ماره، هو کی ابلیس یا شیطؤنه، بیته و تا هیزار سال أسیرأگوده.

³ و اونه هاویه چاه مئن تؤدأ و اون دره دبسته و مهر و موم بوده تا د میلتؤنه فیتأندئه تا اون هیزار سال تمنأبون. بأزون او خأن أنّی زمؤن ئبه آزادأبون.

⁴ بأزین تختؤنیِ بدئم که اوشؤن سر کسؤنی نیشته بون کی داوری ایتقدار اوشؤنه هدأ بوبؤبو و آدمؤن جؤنؤنه بدئم کی عیسی مسیح شهادت دأن وأسی و خدای کلؤم ئبه، اوشؤن سر اوشؤن تن أجی سیوا بوبؤبو. و کسؤنیِ بدئم که او وحشی جؤنور و اون مجسمهَ پرستش نوده بون و اون نوشؤنه خوشؤن پیشؤنی یا دست سر قبول نوده بون. ایشؤن دومرته زینده بوبؤن و مسیح همأ هیزار سال سلطنت بودن.

⁵ ای اولته زینده وابؤن، بمرده ئان أجی بو. و بمرده ئان د زینده نوبؤن تا او هیزار سال تمنأبون.

⁶ مقدس و مبارکه او که اولته زینده وأبؤن مئن سهم دأنه. دومته مرگ، ای جور آدمؤن سر هیچ قدرتی ندأنه؛ بلکه اوشؤن، خدا و مسیح کاهینؤن بنن و اون همرأ هیزار سال سلطنت کؤنن.

شیطؤن شکست

⁷ وقتی که او هیزار سال تمنأبون، شیطؤن خوشه زیندؤن أجی آزادأبنه

⁸ و بیرین هنه تا میلتؤنه، زمین چهار گوشه سر فیتأدئه- یعنی جوج و ماجوج که اوشؤن تعداد، دریاکنار فورشه مؤنه- تا اوشؤنه جنگ ئبه جیمأکونه.

⁹ و اوشؤن، زمین پیله دشتؤن سر پیش بوشؤن و مقدسین اردوگاه و او عزیز شهره دؤرأگودن، ولی آسمؤن أجی آتش جیر بمأ و اوشؤنه فبرسه.

¹⁰ و ابلیس که اوشؤنه گول بزئه بو، آتش و گوگرد سل مئن تؤدأ بوبؤ؛ اؤره که او وحشی جؤنور و او دورؤغ پیغمبر تؤدأ بوبؤبون. ایشؤن شبنده روز تا ابد و تا ابد عذاب کشنن.

داوری، پیله سیفید تخت جلؤ

¹¹ بأزون یکته پیله سیفید تخت بدئم و یگ نفره که اون سه نیشته بو. آسمؤن و زمین اون حضور أجی درشؤن و هیچ جایی اوشؤن ئبه پیدا نوبؤ.

¹² بمرده ئانه بدئم، پیلدنه تا کوجدنه، او تخت جلؤ ایسأبون و دفترؤن، بازأبؤن. بأزین یکته د دفتر وابؤ که حیات دفتر بو. و بمرده ئان، او چیزؤن همأ کی دفترؤن مئن بنویشته بوبؤبو و مطابق او چی کی بوده بون، داوری بوبؤن.

¹³ و دریا، او بمرده ئانه کی خوشه مئن دأشت، پسأدأ؛ مرگ و بمرده ئان دونیا، او بمرده ئانه که اوشؤن مئن دبون، پسأدأن؛ و هرته از اوشؤن عَین او کارؤنی کی بوده بون داوری بوبؤن.

¹⁴ بأزین مرگ و بمرده ئان دونیا، آتش سل مئن تؤدأ بوبؤن. ای دومته مرگه، آتش سل.

¹⁵ و هرکس که اون نؤم، حیات دفتر مئن بنویشته ننأبو، آتش سل مئن تؤدأ بوبؤ.