موکأشفه 19 - کتاب مقدس به زبان گیلکی - گویش شرقیشادی، آسمؤن مئن 1 ای چیزؤن پسی یکته صدا بشتؤسم، عَین یکته پیله خلق صدا آسمؤن مئن کی ژگله کشئن: «هَلِلویا! نجات و جلال و قوت، أمئه خدای شئه، 2 چونکه اون داوری ئن حق و عدله. چون او، او پیله فاحیشهَ داوری بوده او کی خوشه بی عیفتی همأ زمینه فاسیدأگوده، و خدا خوشه خادیمؤن خون تقاصه اون أجی هیته.» 3 و هنده ژگله بودن: «هَلِلویا! تا ابد و تا ابد او پیله شهر أجی دود ویریسنه.» 4 و او بیست و چهارته پیر و او چهارته زینده مخلوق، دیم همرأ بکتن و خدا کی تخت سه نیشته بو پرستش بودن و گوتن: «آمین. هَلِلویا!» 5 و یکته صدا تخت أجی بمأ کی گوت: «أمئه خدا ستایش بوکونین، أی تمؤم اون خادیمؤن، أی شمه که اون أجی ترسنین کوشتأی تا پیلدنه!» 6 بأزون یکته صدا بشتؤسم، یکته پیله خلق غلغله صدا موسؤن، و خیلی آؤؤن صدا مورسؤن بو؛ و یکته پیله آسمؤنگؤر صدای مورسؤن، کی داد زئن و گوتن: «هَلِلویا! چون أمئه خداوند خدا، خدای قادر مطلق، سلطنت کأدره. 7 بأین شادی بوکونیم و خوشحال ببیم و اونه جلال بدیم، چونکه او برّه عروسی زمت برسئه، و اون عروس، خوشه حاضیرأگوده، 8 یکته نازک کتؤن رخت کی شبق شبق زئنه و پاکه، اونه هدأ بوبؤ تا دوکونه.» چون او نازک کتؤن، مقدسین صالح اعماله. 9 و او فریشته مأ بوته: «اینه بنویس: خوشا به حال اوشؤن که او بره عروشی شام ئبه دعوتن.» و مأ بوته: «ایشؤن، خدای حقیقی کلؤمن.» 10 بأزین اون په جیر بکتم تا اونه پرستش بوکونم، اما او مأ بوته: «ایطؤ نوکون! چونکی مو تی همأ و تی برأرؤن همأ کی عیسی شهادته قایم دچکنن، همخدمتم. خدا پرستش بوکون! چونکی عیسی شهادت، نبوت روحه.» او کی سیفید أسپ سر سواره 11 بأزین بدئم که آسمؤن وابؤ و بین، یکته سیفید أسپ! یگ نفر اون سر سواره که اون نؤم وفاداره و حقه. او عادیلؤنه داوری کؤنه و جنگنه. 12 اون چوشمؤن، آتش بله مؤنه و اون کلّه سر خیلی تاجؤن هنّأ. و یکته بنویشته نؤم دأنه کی هیکس نودؤنه، جوز خودش. 13 یکته خونی قبا دوده دأنه و او ایسمی که اونه دوخؤنن "خدا کلؤم" ایسه. 14 و آسمؤن لشگرؤن، نازک کتؤن رخت دوده دأشتن کی سیفید و پاک بو، سیفید أسپ سر سوار بون و اون دومبالسر أمأن. 15 و اون دهن أجی یکته تیج شمشیر بیرین أمأ تا اون همرأ میلّتؤنه بزنه. «آهینی عصا همرأ اوشؤن سر حکومت کؤنه.» او، خدای قادر مطلق غیظ و غضب أنگوره، شراب چاه مئن لقد دمج کؤنه. 16 اون قبا و پاکیله سر یکته نؤم بنویشته هنّأ: "شاهؤن شاه و خداوندؤن خدا." 17 بأزون یکته فریشته بدئم که أفتؤ مئن ایسأبو و بولند صدا همرأ تمؤم مورغؤنه که آسمؤن مئن پر زئن، دوخؤنده و بوته: «بأین، خدا پیله شام ئبه حتما جیمأبین، 18 تا پادشائان و فرمؤنده ئان و زوردار آدمؤن گوشته بوخؤرین و اوشؤن أسپؤن و سوارکارؤن گوشته، و تمؤم آدمؤن، کوجدنه تا پیلدنه، نؤکر و آزاد گوشته بوخؤرین.» 19 و او وحشی جؤنور و زمین پادشائانه بدئم کی خوشؤن لشگرؤن همأ جیمأبؤبون تا اون ضید که أسپ سر نیشته و اون لشگر ضید، جنگ بوکونن. 20 و او وحشی جؤنور گیرفتارأبؤ و اون همرأ او دورؤغ پیغؤمبر که او وحشی جؤنور جلؤ نشؤنه ئان و معجزات انجؤم دأ تا اوشؤنیِ که او وحشی جؤنور نشؤنه قبول بوده بون و اون مجسمهَ پرستش گودن، گول بزنه. اوشؤن هردو، زینده زینده، آتش سل مئن کی گوگرد همرأ سوجنه تؤدأ بوبؤن. 21 و اوشؤن بقیه، او شمشیر همرأ که او أسپ سوار دهن أجی بیرین أمأ، بکوشته بوبؤن و همه ته مورغؤن خوشؤنه اوشؤن گوشت أجی سیرأگودن. |
@ 2024 Korpu Company