موکأشفه 16 - کتاب مقدس به زبان گیلکی - گویش شرقیخدا غضب هفت ته پیاله 1 بأزین معبد أجی یکته پیله دوخؤن بشتؤسم که او هفت ته فریشتهَ گوت: «بشین و خدای غضب هفت ته پیالهَ زمین سر فوکونین.» 2 پس اولته فریشته بوشؤ و خوشه پیالهَ زمین سر فوده، و جیجائانی کی بدگیل و دردآور بو، او مردوم سر که او وحشی جؤنور نشؤنه دأَشتن و اون مجسمهَ پرستش گودن، ظاهیرأبؤ. 3 دومته فریشته خوشه پیالهَ دریای مئن دوده، و دریا یکته بمرده آدم خون مورسؤن بوبؤ و هرچی کی دریا مئن جؤن دأشت، بمرده. 4 سومی فریشته خوشه پیالهَ روخؤنه ئان و آؤ چوشمه ئان مئن دوده، و اوشؤن خون بوبؤن. 5 و بشتؤسم او فریشته که آؤؤن ایختیار اونه بدأ بوبؤبو، بوته: «أی قدوس، تو عادیلی، تو کی ایسأی و ایسأبی، چونکی ای مجازاتؤنه تو بأردی. 6 چونکه اوشؤن، مقدسین و پیغمبرؤن خونه فودن، و تو اوشؤنه خون هدأی تا بوخؤرن. ای، او چی ایسه کی ایشؤن حقه!» 7 و بشتؤسم قوربؤنگه گونه: «بله، أی خداوند خدای قادر مطلق، تی داوری ئن حق و عدله.» 8 چهارمی فریشته خوشه پیالهَ خورشید سر فوده، و خورشیده ایجازه بدأ بوبؤ تا مردومه آتش أجی بسوجؤنه. 9 مردوم، گرما شدت أجی بسوتن و خدا نؤمه، کی ای بلائان قدرته دأنه، لعنت بودن. اوشؤن توبه نودن و اونه جلال ندأن. 10 پنجمی فریشته خوشه پیالهَ او وحشی جؤنور تخت سر فوده و اون پادشاهی مملیکته ظلمات بیته. آدمؤن بسکی درد دأشتن، خوشؤن زبؤنه گازأگیتن. 11 و خوشؤن دردؤن و جیجائان خؤنی، آسمؤن خدا لعنت گودن. اوشؤن خوشؤن کارؤن أجی تؤبه نودن. 12 ششمی فریشته خوشه پیالهَ او پیله روخؤن، فرات سر فوده، و اون آؤ واسوته تا راهه او پادشائان ئبه کی مشرق أجی أنن حاضیرأکونه. 13 بأزین بدئم یوها دهن أجی و وحشی جؤنور دهن أجی و دورؤغ پیغؤمبر دهن أجی سوته پلید روح کی شوبوک مورسؤن بون، بیرین بمأن. 14 چونکی ایشؤن دیوؤن ارواحن کی نوشؤنه و معجزاتی أبئنن و تمؤم دونیا پادشائان ورجه شنن، تا اوشؤنه خدای قادر مطلق پیله روز مئن، جنگ ئبه، جیمأکونن. 15 «بین، مو یکته دوز مورسؤن هنم! خوشا به حال او کی بیدار بیسه و رخت دوده بی، نبون کی لوخت و سوخت راه دکئه و همه اون روسواییِ بینن.» 16 و او سوته پلید روح، زمین پادشائانه یکته جا جیمأگودن کی عیبرؤنی ئن زبؤن مئن اونه گونن "حارمگدّون". 17 هفتمی فریشته خوشه پیالهَ هوای مئن فوده، و یکته بولند صدا او تخت و معبد أجی بمأ که: «تمنأبؤ!» 18 و آسمؤن برق و آسمؤنگؤر ویریسأ و پیله زلزله ایتفاق دکته؛ اوجور پیله زلزله که او زمت أجی که آدمی زمین سر ایسأبو تا ایسه، اون مورسؤن ایتفاق دنکته بو. 19 پیله شهر سو خاله بوبؤ و میلّتؤن شهرؤن فگرسن. و خدا او پیله بابله یاد بأرده و یکته شراب پیاله، کی خودش غضب آتش أجی پور بو، اونه واخؤرؤنئه. 20 و هرته جزیره در بوشؤ و د هیچ کوهی ننأبو. 21 و تگرگی که هرته حدودا پنجاه کیلؤ وزن دأشت، آسمؤن أجی بوارسه آدمؤن سر. آدمؤن، خدا تگرگ بلا وأسی لعنت بودن، چون ای بلا خیلی سخت بو. |
@ 2024 Korpu Company