موکأشفه 13 - کتاب مقدس به زبان گیلکی - گویش شرقی

اولته وحشی جؤنور

¹ بأزین بدئم یکته وحشی جؤنور، دریا یأجی بیرین أمأدره. ده ته شاخ و هفت ته سر دأشت، ده ته تاج اون شاخؤن سر هنّأبو و اون هرته کلّه سر، یکته کفرآمیز نؤم بنویشته بوبؤبو.

² او وحشی جؤنور کی مو بدئم، پلنگه مؤنس و خرس لنگؤن و شیر دهنه دأشت. و یوها خوشه قدرت و خوشه تخت و یکته پیله ایقتدار، وحشی جؤنوره هدأ.

³ او وحشی جؤنورِ یکته سرؤن، بخألئه یکته کوشنده جیجا ویته بو، اما او کوشنده جیجا خوبأبؤبو. تمؤم زمین ماتأبؤن و او وحشی جؤنور أجی پیروی بودن.

⁴ مردوم، یوها پرستش گودن؛ چونکی خوشه ایقتداره او وحشی جؤنوره هدأبو، و او وحشی جؤنورم پرستش گودن و گوتن: «کیسه او کی بوتؤنه ای وحشی جؤنور مورسؤن ببون؟ کیسه کی بوتؤنه اون همرأ جنگ بوکونه؟»

⁵ یکته دهن او وحشی جؤنوره هدأ بوبؤ تا غرور و کفر همرأ گب بزنه و اونه ایجازه بدأ بوبؤ تا چهل و دو ماه خوشه ایقتداره کارأگیره.

⁶ او خوشه دهنه واگوده تا خدا کفر بوگؤ، کفر گوتن نسبت به اون نؤم و اؤره کی ایسأ، یعنی اوشؤنی که آسمؤن مئن ایسأن.

⁷ و اینم اونه ایجازه بدأ بوبؤ کی مقدسین همأ جنگ بوکونه و اوشؤنه بسر ببون. و اونه ایقتدار هدأ بوبؤ تا هرته طایفه، مردوم، زبؤن و میلّت سر حاکیم ببون.

⁸ و همه ته اوشؤن کی زمین سر ایسأن و او وحشی جؤنوره پرستش کؤنن -یعنی هرکس که اون ایسم، بره حیات دفتر مئن بنویشته ننأ، هو بره کی قبل ای کی دونیا خلق ببون قوربؤنی بوبؤبو.

⁹ او کی گوش دأنه، بشتؤه:

¹⁰ اگر قرار ببون یگ نفر أسیرأبون، أسیری به شنه، اگر قراره یگ نفر شمشیر أجی بکوشته ببون، هخأن شمشیر أجی بکوشته ببون. و ای، مقدسین پایداری و اوشؤن ایمؤنه خأنه.

دومته وحشی جؤنور

¹¹ بأزون یکته د وحشی جؤنوره بدئم کی زمین أجی بیرین هنه. دوته شاخ، بره شاخ مورسؤن دأشت و یوها موسؤن گب زی.

¹² او، اولته وحشی جؤنور تمؤم ایقتداره اون جا سر کأرأگیت و زمین و اوشؤنیِ کی زمین سر ایسأن زور گود که اولته وحشی جؤنوره که اون کوشنده جیجا خوبأبؤبو، پرستش بوکونن.

¹³ دومته وحشی جؤنور پیله نشؤنه ئان و معجزات به نمایش بنأ، اوجور که حتی مردوم چوشم جلؤ آسمؤن أجی آتش زمین سر أرد.

¹⁴ و او نشؤنه ئان و معجزات وأسی کی ایجازه دأشت او اولته وحشی جؤنور عوض کأرأگیره، اوشؤنیِ کی زمین سر ایسأن فیتأدأ و اوشؤنه بوته یکته مجسمه او وحشی جؤنور أجی چاکونن کی شمشیر أجی جیجاکی بوبؤ، اما با ای حال زینده بومؤنسه.

¹⁵ و اونه ایجازه بدأ بوبؤ تا او وحشی جؤنور مجسمهَ نفس بدئه تا او وحشی جؤنور مجسمه بوتؤنه حتی گب بزنه و باعیث ببون اوشؤنی کی وحشی جؤنور مجسمهَ پرستش نودن، بکوشته ببون.

¹⁶ هیطؤری همه کسه، کوشتأی تا پیلّه، دارا و ندار، و نؤکر و آزاده وأدأشت تا خوشؤن راست دست یا خوشؤن پیشؤنی سر نشؤن بنئن.

¹⁷ تا هیکس منّیسه بی بهین بفورش بوکونه، جوز او کس که او نوشؤن، یعنی او وحشی جؤنور نؤم یا اون نؤم شومارهَ بدأره.

¹⁸ ای، حیکمت خأنه. هرکس فهم دأنه، بدأ او وحشی جؤنور شومارهَ حیساب بوکونه؛ چره که او شوماره، اینسؤن شوماره ایسه و اون شوماره ششصد و شصت و ششه.