موکأشفه 12 - کتاب مقدس به زبان گیلکی - گویش شرقی

زنأک و یوها

¹ و یکته پیله نشؤنه آسمؤن مئن آشکارأبؤ: یکته زنأی که أفتؤه دوده بو و مانگ اون په جیر دبو و یکته تاج، دوازده ته سیتاره أجی اون سر هنّأبو.

² او زنأی شوکؤمدار بو چئن درد و زأسّن عذاب أجی ژگله کشی.

³ بأزون یکته د نشؤنه آسمؤن مئن آشکار بوبؤ: بین، یکته پیله سورخ یوها که هفت ته سر و ده ته شاخ دأشت و اون کله ئان سر هفت ته تاج هنّأبو.

⁴ خوشه دوم همرأ یک سوم آسمؤن سیتاره ئانه جیمأگوده و زمین سر فوده. یوها او زنأک جلؤ کی زأسّه دبو بیسأ، تا هیطؤ که اون زأک دونیا بمأ اونه فبره.

⁵ او زنأی یکته ریکه بچئه، یکته ریکه کی قراره آهینی عصای همرأ تمؤم میلّتؤن سر حکومت بوکونه. اما اون زأک، خدا و اون تخت سمت ویته بوبؤ.

⁶ و او زنأی بیابؤن سو فرار بوده، او جیگه کی خدا اون ئبه فراهم بوده تا اؤره هیزار و دویست و شصت روز اونه فأرس فورس بوکونن.

شیطؤن زمین سر تؤدأ بنه

⁷ و آسمؤن مئن جنگ بوبؤ. میکاییل و اون فریشته ئان، یوها همرأ بجنگسن. یوها و اون فریشته ئان، اوشؤن پیش جنگ ئبه ویریسأن،

⁸ ولی یوها شکست بوخؤرده و د آسمؤن مئن اوشؤن ئبه جا ننأبو.

⁹ و پیله یوها، جیر تؤدأ بوبؤ؛ یعنی هو قدیمی مار کی ابلیس یا شیطؤن دوخؤنده بنه کی تمؤم دونیا گومراه کؤنه. او، زمین سر تؤدأ بوبؤ و اون فریشته ئانم اون همرأ جیر تؤدأ بوبؤن.

¹⁰ بأزون یکته پیله دوخؤنکه آسمؤن مئن بشتؤسم کی گوت: «ایسه، أمئه خدا نجات و قدرت و پادشاهی، و اون مسیح ایقتدار بمأ دأنه. چون او که أمئه برأرؤنه بندؤم زی، کی شبنده روز أمئه خدا حضور مئن اوشؤنه ایفترا زئنه، جیر تؤدأ بوبؤ.

¹¹ و اوشؤن، بره خون همرأ و خوشؤن شهادت کلؤم همرأ اون سر حریفأبؤن. چونکه اوشؤن خوشؤن جؤنه دوست ندأشتن، حتی تا مردن زمت.

¹² پس أی آسمؤنؤن و أی کسؤنی که آسمؤنؤن مئن ایسأین، شادی بوکونین! ولی وای بر شمه، أی زمین و أی دریا چون ابلیس، بدجور غیظ همأ شیمئه سر، جیر بمأ، چونکی دؤنه وقت کمه.»

¹³ و او مؤقع که یوها بدئه زمین سر جیر تؤدأ بوبؤ، او زنأک دومبال بوشؤ که یکته ریکه بچئه بو.

¹⁴ اما او پیله عقاب دوته بال، او زنأکه هدأ بوبؤ تا او جیگه ور کی بیابؤن مئن اون ئبه فراهم بوبؤبو، پرأگیره و اؤره مار أجی دور بیسه و یگ زمؤن و زمؤنؤنی و یکته نیصف زمؤن، اونه فأرس فورس ببون.

¹⁵ او لانتی یکته آؤ، روخؤن آؤ مورسؤن، خوشه دهن أجی بیرین فوده که او زنأک دومبال بوشون تا سیل اونه خوشه همأ ببره.

¹⁶ اما زمین او زنأک یاری به بمأ و خوشه دهنه واگوده و او سیله که یوها خوشه دهن أجی بیرین فوده بو، فبرسه.

¹⁷ بأزین یوها زنأک سر غیظ بوده و بوشؤ تا اون الباقی نسل همرأ جنگ بوکونه، یعنی اوشؤن همرأ کی خدای حکمؤن أجی ایطاعت کؤنن و عیسی شهادته قایم دچکنن.

¹⁸ و یوها، دریاکنار رافا بیسأ.