فیلیپیان 2 - کتاب مقدس به زبان گیلکی - گویش شرقی

مسیح فروتنی جی سرمشق گیتن

¹ پس اگر مسیح مئن دیلگرمی دأنین، اگر اون محبت شیمئه تسلی باعیث بنه، اگر خدا روح مئن رفاقت دأنین، اگر مهربونی و دیلسوجی هننأ،

² همرأی بؤن همرأ، هی محبت همرأ، یکدیلی و همنظر بؤن همأ می شادئه کامیلاکونین.

³ هیچ کارئه منم منم یا چوشم و همچوشمی سر نوکونین، بلکی فروتنی همأ دیگرونه خودتؤن اجی بهتر بودونین.

⁴ هیتته از شمه، هچی خوشه منفعت فیکر دنبون، بلکی دیگرون فیکرم بوکونه.

⁵ هو فیکرونئه بدأرین کی مسیح عیسی دأشت:

⁶ او کی هرچند خدای همرأ همشکل بو، خدا همرأ برابرئه دودسی دنچکسه،

⁷ بلکی خوشه خالی وأگوده نوکر شکله به خودش بیته، آدمون مورسؤن بوبؤ.

⁸ و چونکی آدمون شکل جور بوبؤ، خوشه فروتن بوده و مردن ئبه، حتی صلیب سرِ مردن ئبه فرمؤنبر بوبو.

⁹ پس خدا اونه خیلی جؤر ببرده و یکته نؤم، همه ته نؤمؤن اجی جؤرتر، اونه ببخشئه،

¹⁰ تا عیسی نؤم أجی هرته زؤنی هچمه، آسمؤن مئن، زمین سر و زمین جیر،

¹¹ و هرته زبؤن موقؤر بأ کی عیسی مسیح خداوند ایسه، خدای پئر جلال ئبه.

نور دونیا مئن

¹² پس ای عزیزون، هوطو که همیشک فرمونبر بین، الؤن، نه هچی می جلو، بلکی خیلی ویشتر می غیاب مئن، شیمئه نجات وأسئه خأ ترس و لرز اجی عمل بوکونین،

¹³ چونکی خدا ایسه کی شیمئه مئن خوشه خشنودی به کار کأدره، هم ایراده مئن و هم عمل مئن.

¹⁴ هرته کاره بیدون غرغر زئن و بوگو واگو انجؤم بدین،

¹⁵ تا بی عیب و ساده دیل و خدای بی عیب زاکون ببین، خطاکار و گومراه نسل مئن کی شیمئه نور اوشون مئنی سیتاره ئان مورسون ای دونیا مئن فتؤنه،

¹⁶ زیندگی کلؤمه قایم بدأرین، تا مسیح وگرسن روز مئن گولاز بوکونم که هچی ندؤسم و هچی زحمت نکشئم.

¹⁷ حتی اگر لازیم ببون می خون یکته پیشکش مورسون شیمئه ایمؤن قوربؤنی به فوده ببون، خوشحالم و شمه همه ته همرأ ذوق کؤنم.

¹⁸ و شمرأم خأ هیطو خوشحال ببین و می همأ ذوق بوکونین.

تیموتائوس و اپافرودیتوس

¹⁹ خداوند عیسی مئن امید دأنم تیموتائوسه زودازود شیمئه ور سرأدئم تا شیمئه احوال اجی واخوبأبوم و می دیل شاد ببون.

²⁰ چونکی د هیکسه ندأنم کی حقیقتا شیمئه راحتی فیکر دبون.

²¹ اوشؤن همه ته خوشون منفعت دومبال درن، نه عیسی مسیح.

²² اما شمه دؤنین کی تیموتائوس خوشه ایمتحونه پس بدأ، کی چوطو می همرأ، یکته ریکأک مورسؤن کی خوشه پئر همرأ ایسأ، انجیل کار مئن خدمت بوده.

²³ پس امیدوارم کی هیطو تا می تکلیف روشنابو، اونه شیمئه ورجه سرأدئم؛

²⁴ و خداوند مئن ایطمینؤن دأنم کی خودمم خیلی زود هنم.

²⁵ مو لازیم بودؤنسم اپافرودیتوسه شیمئه ورجه سرأدئم، اونه که یک طرف اجی می برأر، همکار و همرزم ایسه، و یک طرف اجی شیمئه سرأدأره، می احتیاجون برطرف گودن ئبه.

²⁶ چونکی او شمه همه ته دئن ئبه مشتاق بو و این واسئه کی بشتؤسه‌بین ناخوشه، پریشونه.

²⁷ راس راسه کی ناخوش بو و مرده دبو. ولی خدا اونه رحم بوده، و نه هچی اونه، بلکی مأ نی رحم بوده، تا یکته د غصه می غصه ئان سر دچئه نبون.

²⁸ پس مو اونه سرادان اجی ویشته ذوق دأنم، تا یک دفأ د اون دئن أجی خوشحالأبین و می غصه أجی نی کمأبون.

²⁹ پس خداوند مئن، اونه تموم خوشحالی همرأ تنأگیرین و ایطوچی کسؤنه حرمته بدأرین،

³⁰ چونکه او، مسیح کار ئبه مرده دبو و این وأسی کی شیمئه خدمت کم و کاستی نسبت به مو جوبرؤن ببون، خوشه جؤنه خطر تؤدأ.