فیلیمون 1 - کتاب مقدس به زبان گیلکی - گویش شرقی

¹ پولس أجی، مسیح عیسی زیندؤنی، و تیموتائوس أجی، أمئه برأر، أمئه عزیز همکار، فیلیمون ئبه،

² أمئه خأخؤر، آپفیا به، و أمئه همرزم، آرخیپوس ئبه، و او کلیسای ئبه کی تی خؤنه مئن دره:

³ فیض و صلح و سلامتی أمئه پئر، خدا، و خداوند عیسی مسیح طرف أجی شیمئه بأ.

فیلیمون محبت و ایمؤن

⁴ مو تأ می دعائان مئن یاد أبئنم، همیشک می خدا شکر گونم،

⁵ چونکی مو تی محبت و ایمؤن باره کی خداوند عیسی و همه ته مقدسین ئبه دأنی، ایشتؤنم.

⁶ و دعا کؤنم کی تی ایمؤن شریکأبؤن، کمک بوکونه و مسیح خؤنی هر خؤرمچی باره که أمئه مئن دره، یکته تمؤم و کمال شناخت ثمر بأره.

⁷ أی برأر، چون تی محبت أجی خیلی شادأبؤم و تسلی بیتم، چونکی مقدسین دیلؤن بواسیطه تو هندئه جؤن بیته.

پولس خواهش، اونیسیموس باره

⁸ این وأسئه، هرچند مسیح مئن ای جرأته دأنم کی تأ حکم بوکونم که او چئه کی لازم ایسه أنجؤم بدی،

⁹ با ای وجود، محبت وأسی صلاح دؤنم کی تأجی خواهش بوکونم: مو، پولس، که یکته پیرمردأکم، و ألؤنم مسیح عیسی زیندؤنئم؛

¹⁰ می زأک باره، اونیسیموس، کی زیندؤن مئن اون پئر بوبؤم، تأجی خواهش دأنم.

¹¹ او، قدیم زمتؤن تئبه بی‌فایده بو؛ ولی ایسه هم تئبه هم مئبه فایده دأنه.

¹² مو می جگرگوشهَ تی ورجه سرأدئنم.

¹³ مو خوشحال بؤنأبوم أگه اونه می ورجه بدأشته بی، تا ای مدت مئن کی انجیل وأسی زیندؤن درم، تی جا سر او مأ خدمت بوکونه.

¹⁴ ولی صلاح بودؤنسم کی بیدون تی رضایت کاری نوکونم، تا تی خوبی گودن تأ بوأ، نه ای کی نوأنوأ و زوری ببون.

¹⁵ أصلا بلکی هین وأسی أننی زمت تأجی سیوا وابؤ، تا همیشک ئبه تی ور وگرده؛

¹⁶ أما نه د نؤکر مورسؤن، بلکی نؤکر أجی جؤرتر، یکته عزیز برأر مورسؤن. بخصوص مئبه، أما چنی ویشتر تئبه، هم جسم مئن، هم خداوند مئن.

¹⁷ پس أگه مأ تی ریفئق دؤنی، اونه هوجور تنأگیر کی مأ تنأگینی.

¹⁸ أگه تأ بدی بوده، یا یکچی تأ بدهکاره، اونه می حیساب بنی.

¹⁹ مو، پولس، می دست أجی نیویسنم: مو اونه تلافی کؤنم - ألبته احتیاجی نئه بوگؤم کی تو تی جؤنم مأ مدیونی.

²⁰ أهأ برأری، خأنم کی خداوند مئن یکته منفعت تأجی مأ برسه؛ می جؤنه مسیح مئن تازه وأکون.

²¹ اینه نیویسنم چون تی ایطاعت گودن أجی خاطیرجمعم و دؤنم که حتی این أجی کی گونم نی ویشتر کؤنی.

²² ضیمنا یکته اوتاق مئبه حاضیرأکون، چون امید دأنم خدا شیمئه دعائانه مستجاب بوکونه و خوشه لطف أجی مأ شیمئه ورجه وگردؤنه.

²³ اپافراس، کی مسیح عیسی وأسی می همأ زیندؤن مئن ایسأ، تئه سلام رسؤنئنه.

²⁴ هیطؤ نی می همکارؤن، مرقس، آریستارخوس، دیماس و لوقا تئبه سلام رسؤنئنن.

²⁵ خداوند عیسی مسیح فیض شیمئه روح همرأ ببون.