مَرقُس 3 - کتاب مقدس به زبان گیلکی - گویش شرقیشفای مرداکی که این دست لامَ بو 1 عیسی یه بار ده عبادتگاه دیرون بومه. اوره یکته مَرداک ایسابو که اونه یکته دَست لامَ بؤ بو. 2 بعضی أن عیسی پاستن تا بَینَن مقدس شنبه روز میئن او مَرداک شفا دئنه یانه، تا ایطوری یکته گزک اونه بهتون زئن به بیاجن. 3 عیسی او مَرداک که اونه دَست لامَ بوُ بو بوته: «بیه اِره.» 4 هو وخت ایشونای بپورسه: «مقدس شنبه روز میئن خوبی گودَن روا ایسّه یا بدی گودَن؟ جؤن نجات دئن یا کشتن؟» امّا اوشون تام بزِئن. 5 عیسی، برَزَخ بؤ و او کسونیه که اونه دور بر ایسابُن نیگاه گوده و خیلی ناراحت اوشونه سنگدلی جی، او مَرداک بوته: تی دَست درازَ کون.» او خوشِ دَست درازَ گوده و اونه دَست خوبَ بوُ. 6 فَریسی فرقه عالمون بیرون بوشؤئن و درجا هیرودی أن امره که هیرودیس پادشا دنباله رو بوئن، نقشه بکشِئن که چُطو عیسی بکوشن. پیله جمعیت عیسی دومبال بوئن 7 بازین عیسی خوشِ شاگردؤن أمره دریا کنار سو بوشؤ. خیلی جلیلیه مردم 8 و خیلی یهودیه مردم جی و اورشلیم شهر و ادومیه منطقه و اُردن روخونه اوطرف و صور و صیدون دورو بر، عیسی دومبالسر راه دکتن. وقتی که او پیله جماعت تمام او کارونی که عیسی گود بشتوسن، عیسی ورجه بومئن 9 اینه واسه که جمعیت خیلی زیاد بو، عیسی خوشِ شاگردؤن بفرماسّه یکته نوء اونه به حاضیرَ کونَن، تا مَردم اونه سر دنکالَن. 10 چون هینه واسه که عیسی خیلی أن شفا بَدَه بو، ناخوشؤن اونه فوقوتَن تا اونه دست بزنن. 11 هر زمون که پلید روحون عیسی دِئن، اونه جلو گلِ سر کتَن و ژَگَلَه زئن: «تو خُدا ریکاکی!» 12 عیسی ایشونِ دستور بدَه، تا هیچ کس نوگوئن که او کی ایسه. دوازده رسول 13 عیسی کوه سر بوشؤ و اوشؤنیِ که خواست، خوشِ ورجه دوخُنده، و اوشون اونه ورجه بومَئن. 14 او دوازده نفرِ تعیین بوده و اوشونه رسول دوخُنده، تا اونه أمره بوبؤئن و اوشونه موعظه گودَن به سرادا، 15 و ایی قدرتِ بدارَن که دیوؤنِ مردم جی بیرونَ کوئنن. 16 او دوازده نفر که عیسی تعیین بوده بُو ایشون بوئن: شَمعون (که عیسی اونه پِطرُس اسم بنا)؛ 17 یعقوب زِبِدی ریکه و یوحنا یعقوب برار(که اوشون ’بوآنِرجس‘، اسم بنه یعنی ’آسمون گُرگُر ریکاکون‘ )؛ 18 آندریاس، فیلیپُس، بَرتولْما، مَتّی، توما، یعقوب حَلْفای ریکه، تَدّای، شَمعون وطن پرست، 19 و یهودا اِسْخَریوطی که عیسی دُشمنِ دَست هدَه. عیسی و بِعِلزِبول 20 عیسی بُشو خونه و هنده پیله جمعیتی اونه دور جومَه بوئن، جوری که او و اونه شاگردؤن حتی منیستن غذا بُخؤرَن. 21 وختی عیسی خانواده اینه بِشتوئسَن، راه دکتن تا اونه ویگیرَن خوشونه امره بَبورن، چونکه گوتَن: تورَ بؤ.» 22 تورات معلمونم که اورشلیمای بومهَ بُن گوتَن: «بِعِلزِبول اون جلد میئن بوشو» و « او دیوؤنِ، دیوؤنِ رئیس کمک امره بیرونَ کوئنه.» 23 پَس عیسی اوشونه دوخُنده و حیکایتونی ایشونِ به بئرده و بوته: «چُطو بنه شیطؤن، شیطونَ بیرونَ کونی؟ 24 اگه یکته مملکت خوشِ ضد دسته دسته ببی، نابودَ بنه. 25 اگه خونه میئن خوشِ ضد دسته دسته ببی، او خونه هم فگردنه. 26 اگه شیطؤن هم خوشِ ضد ویریسی و دسته دسته ببی، منئه دوؤم بأری، بَلکه نابودَ بنه. 27 هیشکس منئه بشی یکته قوی مَرداکَ خونه و اونه مال و مینالِ بدوزی، مگه اونکه اولَ او قوی مرَداک دَوَدی. بازین تینه او خونه غارت بکونی. 28 «راست راستِ، شمره گونَم که تمؤم آدمی گناه أن و هر کُفری که بوگؤی بَبَخشه بنه؛ 29 امّا هرکَس که روح القدس کُفر بوگؤی، هَرگی بَبَخشه نبنه، بَلکه تا اَبد اون گناه اون سر موئنه.» 30 عیسی هینه واسه ایی گب بوته، که گوتن «اون پلید روح دئنه.» عیسی مَئر و برارون 31 بازین عیسی مَئر و برارون بومئن. اوشون بیرون بَیسئن، یه نفر سرا دئن تا اونه دوخؤنی. 32 جمعیتی که عیسی دؤر نیشته بُوئن، اونه بوتَن: تی مَئر و برارون بیرون ایسَئن و تی دومبال گردنن.» 33 عیسی جواب بَدَه: «می مَئر و می برارون کی ایسّن؟» 34 هووقت اوشونیه که اونه دؤر نیشته بوئن، نیگا بوده و بوته: «می مَئر و برارون ایشؤن ایسّن! 35 چون هرکه خُدا خواسته انجوم بدی، او ایسّه می برار و خاخور و مَئر .» |
@ 2024 Korpu Company