مَرقُس 15 - کتاب مقدس به زبان گیلکی - گویش شرقی

محاکمه پیلاتُس ورجه

¹ هوتو که صوب ببو، کاهینون سرؤن، شیخؤن و تورات معلمون و تموم یهودِ آدمؤن شورا تشکیل بدئن. اوشون عیسی دَست دَوَسّه بَبَردَن و پیلاتُس روم فرموندارِ تحویل بدَئن.

² پیلاتُس عیسی جی بپورسه: «تو یهودِیون پادشایی؟» عیسی جواب بَدَه: «تو خودت ایطؤ گونی!»

³ کاهینون سرؤن خیلی اونه ایفترا زِئن.

⁴ پَس پیلاتُس هنده عیسی جی بپورسه: «هیچ جوابی ندَئنی بدی؟ بین چقَدَر تَه ایفترا زِئدَرَن!»

⁵ ولی عیسی هنده هیچی جواب نَدَه، جوری که پیلاتُس ماتَ بؤ.

⁶ پیلاتُس یکته رسم داشت که عید وخت، یکته زندؤنیِ که مَردوم خواستن آزادَ کونی.

⁷ شورشی أن میئن که زندون میئن ایسا بوئن یکته مرداک بو که باراباس ایسم داشت. او قتل واسه یکته آشوبِ میئن زندؤن دکته بو.

⁸ مَردم پیلاتُس ورجه بومَئن و اونای بخواسّن که همیشگی رسم ایشونِ به انجوم بدای.

⁹ پیلاتُس اوشونای بپورسه: «خوائنین یهودِیونه پادشاه شیمه به آزادَ کونم؟»

¹⁰ پیلاتُس هینه واسه اینه بوته بو که بفَهمسه بو کاهینون سرؤن، عیسی، حسودی وسه، اونه تحویل بدَئن.

¹¹ امّا کاهینون سرؤن جَمعیتَ تیرَ گودَن تا پیلاتُس جی بخوائن بجای عیسی باراباسِ ایشونِ به آزادَ کونی.

¹² پیلاتُس هنده اوشونای بپورسه: «پَس ایی مَرداک أمره که شمه اونه یهودیونه پادشاه دوخبئنین، چی بُکونم؟»

¹³ دومَرته پیله داد أمره بوتن: « اونه صلیب سر هکش!»

¹⁴ پیلاتُس اوشونای بپورسه: «چرِه؟ چی بدی بوده؟» امّا اوشون پیلتر فریاد زئن: «اونه صلیب سر هکش!»

¹⁵ پَس پیلاتُس که خواس مَردم راضی بکونی، باراباسِ ایشونِ به آزادَ گوده و دستور بده عیسی شلاق بزنن، اونه سربازون دست هده تا صلیب سر هکشن.

سربازون عیسی روشخنایتَن

¹⁶ بزین سربازؤن، عیسی کاخ صارا میئن، یعنی فرماندار کاخ، ببوردَن و همۀ سربازؤنِ دوخوندن که جومَه بوئن.

¹⁷ بازین یکته ارغوؤنی رخت اونه دودَن و یکته تاج تیفای ببافتن و عیسی سَر بنَئن.

¹⁸ بازین اون جلو زانو بزئن و گوتَن: «سلام بر یهودیون پادشاه !»

¹⁹ اوشون چوب امره عیسی سَرِ زئن و اونه سَر فیلی فودَن، اونه جلو زانو زئن و تعظیم گودن.

²⁰ بعد اونکه اونه روشخنایتن، ارغوؤنی عبا اونه تنَ جی بکندن، خوشه رختَ اونه دودَن. بازین عیسی بیرون بَبَردَن تا صلیب سر هکشَن.

عیسی صلیب سر هکشِئن

²¹ سربازون راه میئن ینفر که شَمعون ایسم داشت و از قیروؤن مردم بو واداشتَن تا عیسی صلیب کولَ گیری.شمعون، اسکندر و روفُس پئر بو و زمین طرف أمه دبو.

²² اوشون عیسی یکته جیگا که جُلجُتا ایسم داشت بَبَردَن، که اونه معنی محل جمجمه ایسّه.

²³ هووقت عیسی شرابی که مُر اَمَرِه قاطی بوبوُ بو هَدئن، امّا او قبول نوده.

²⁴ بازین عیسی صلیب سر هکشِئن و اونه رختؤن خوشونِ میئن سهم بودَن، هرکسِ سَهم وسه قرعه تودَئن.

²⁵ ساعت نُه صبح بو که اوشون عیسی صلیب سر ببردَن.

²⁶ اونه تقصیرنؤمه سر بنویشته بوبوُ: «یهودِیونه پادشاه.»

²⁷ دو ته راهزنم عیسی امره صلیب سر هکشِئن، یکته راست وَر و اویکته اونه چپ وَر.

²⁸ ایطو بوبؤ که مُقدس کِتابؤنِ بنویشته أن به حقیقت برسه که گونه: «او تقصیرکارون مورسون محکوم بوبؤ.»

²⁹ اوشونی که اورای شوئدبون خوشونِ سرؤنِ توکون دَئن و فحش أمره گوتَن: «ای تو که ‌خواسی معبدِ فگردوئنی و سُه روز میئن اونه هنده چاکونی،

³⁰ تَه نجات بدی! صلیب جی جیر بیه!»

³¹ کاهینون سرؤن و تورات معلمونم خوشونِ میئن اونه روشخنایتَن و گوتَن: «بقیه نجات بدا، امّا خوشِ منئه نجات بدای!

³² بدارین مسیح موعود، اسراییل پادشاه، الؤن صلیب جی جیر بای تا بَینیم و ایمؤن بأریم.» او دوته که اونه امره صلیب سر هکشه بوبؤبوئن هم عیسی فحش دئن.

عیسی موردَن

³³ ساعت دوازده ظهر تاریکی سراسر او ولایت بیته و تا ساعت سه بعدظهر، طول بکشه

³⁴ ساعت سه بعدظهر بو که عیسی ژگله بزه: «ایلویی، ایلویی، لَمّا سَبَقْتَنی؟» یعنی «ای می خُدا، ای می خُدا، چرِه مَه ترک بوئدی؟»

³⁵ بعضی از اوشون هم که اوره ایسه بُن هیطو که اینه بِشتوئسَن، بوتَن: «گوش بدین، ایلیا پیغمبر دُخوُندره.»

³⁶ پَس یه نفر جلو بُدُؤسه و یکته ابر ترش شرابَ میئن بزه و یکته چوب سر بَنه، عیسی دَهَن جلو بَبَرده تا وودوشی، و بوته: «بیسین تا بَینیم ایلیا هنه، اونه صلیب جی جیر بئره ؟»

³⁷ پَس عیسی ژگله بزه و آخری نفسَ بکشه.

³⁸ هووقت معبد پرده جؤر تا جیرای دو پَئره بوبوُ.

³⁹ وختی سربازون فرمانده که عیسی جلو ایسا بو، بدِه که عیسی چُطو خودشه جؤن تسلیم بوده، بوته: «راست راست ایی مرَداک خُدا ریکه بو.»

⁴⁰ بعضی از زناکؤنم دورادوری ای ایتفاق نیگاه کائدبون. اوشون میئن مریم مَجَدلیهَ، مریم کوشتای یعقوب و یوشا مئر و سالومه ایسابوئن.

⁴¹ ایی زناکؤن هووقت که عیسی، جلیل ولایت میئن ایسابو، اونه دومباله رو بوئن و اونه خدمت گودَن. خیلی زناکون دیگه هم که عیسی أمره اورشلیم بومه بوئن، اوره ایسابوئن.

عیسی دفنَ گودَن

⁴² او روز، ’تهیه‘روز بو، روزی که یهودی أن خودشونه عیدِ واسه آماده گودن، یعنی یک روز قبلِ مقدس شنبه روز.

⁴³ پس غروب دمی یکته مردکای که یوسف ایسم داشت، و رامه شی بو بی واهیمه، پیلاتُس ورجه بوشؤ و عیسی جنازه بخواسته. یوسف یهود شورا عضو بو که اونه خیلی احترام گودن و خُدا پادشایی ریفا ایسا بو.

⁴⁴ پیلاتُس که باور نؤد، عیسی، به ایی زودی بمورده بی، سربازؤن فرمانده دوخونده تا بَینی عیسی بمورده یا نه.

⁴⁵ وختی که پیلاتُس، ای فرماندَه جی بشتوسه که عیسی بمورده، اجازه بده عیسی جنازه یوسفِ هدئن.

⁴⁶ یوسف هم یکته پارچه کتان بیه و عیسی جنازه صلیبای جیر بأرده، کتان میئن فیبیته و یکته مَقبره میئن که صخره میئن بتاشته بوبوُ بو، بَنه. بازین یکته سنگِ، مقبره دَهَنه جُلُو گرا دا.

⁴⁷ مریم مَجَدلیهَ و مریم یوشا مَئر، بدِئن که عیسی کوره بَنه بوبؤ.