مَرقُس 12 - کتاب مقدس به زبان گیلکی - گویش شرقی

شرور باغبونؤن حیکایت

¹ عیسی بینا بوده حیکایتون أمره ایشونِ به گب زئن و بوته: «یکته مرداک یکته انگور باغِ چاگوده و اونه دؤره حصار بَکشِه و یکته حوضکم انگورِ له گودن به بکنده و یکته کوتوم هم دیدبونی واسه اونه میئن بساته. بازین انگور باغِ چَند ته باغبون اجاره بَدَه و خودوش، یکته ده مملکت سفر بوئده.

² انگور چیئنِ زمون، یکته نوکر باغبون ورجه سرا دا تا خوش محصولِ سهمِ اوشونه جی هگیری.

³ امّا اوشون نوکر بیتَن، بزِئن و دَست خالی وگردونِئن.

⁴ بازین صاحب باغ، یکته ده نوکر اوشونه ورجه سرا دا، اَما باغبونون اونه سَر بِشکنِئن و اونه بی احترؤمی بودَن.

⁵ دومَرته صاحب باغ یکته ده نوکر سرا دا، امّا اونه بکوشتَن و خیلی أن امره هم هیتو رفتار بوُدَن؛ بعضی أن بزِئن و بعضی أنم بکوشتَن.

⁶ صاحب باغ فقط یه نفر دیگه داشت که سرا دی و او، اینه عزیز ریکه بو. پَس آخر سر اونه سرا دا و خوشِ امره بوته ”می ریکه احترؤم نِئنَن.“

⁷ امّا باغبونون همدیگر بوتَن ”ایی وارثِ بأین اونه بکوشیم تا ارث اَمیشی ببی.“

⁸ پَس اونه بِیتن، بکوشتَن و انگور باغِ مئنای بیرون تُؤدَن.

⁹ ألؤن، انگور باغ صاحب باغبونون أمره چی کوئنه؟ او هنه و باغبونون سر به نیست کوئنه و انگور باغِ دیگرون دست هدِئنه.

¹⁰ مگه زبور کتاب میئن نوخوندین که: «” سنگی که بناأن ردّه گودَن، سنگ اصلی بنا بوبُو

¹¹ خُداوند هیطو بوده و امه نظر میئن عجیب و غریب هنه“؟»

¹² اوشون خواسّتن عیسی بگیرَن، چونکه بفهمسبون که ایی حیکایت اوشون باره بوته، امّا جَمعیت جی واهیمه داشتن پَس عیسی ویلَه گودَن و بوشؤئن.

امپراطور خراج هَدَئن

¹³ بازین بعضی از فَریسی أن فرقه عالمون و هیرودیس هوادارؤنِ عیسی ورجه سرادائن تا اونه خوشِ گبؤن امره گرفتارَ کونَن.

¹⁴ اوشون بومَئن و عیسی بوتَن: «اوستاد، دؤنیم که تو صادق مرداکی و ته به مهم نیه مردم چی گونن، چونکه ظاهیرِ گول نوخوئنی، بَلکه خُدا راهِ به‌ دُرُستی أمره آموجنِئنی. امپراطور رومِ خراج هَدَئن شرعا درست ایسّه یا نه؟

¹⁵ باء اونه خراج هَدیم یا نه؟» اما عیسی اوشون دو رویی دوئنست و اوشون بوته: «چرِه مَه امتحون کادرین؟ یکته یه دیناری سکه می ورجه بأرین تا اونه بَینَم.»

¹⁶ اوشون یکته سکه‌ بأردَن. عیسی ایشونِ جی بپورسه: «نام و نیشونی کی ایی سکّه سر هَنّه کی​شی ایسه؟» اوشون جواب بَده ئن:« امپراطور شی.»

¹⁷ عیسی اوشونه بوته: «پَس امپراطور مالِ امپراطور هَدین و خُدا مال خُدا.» اوشون عیسی گبؤنَ جی ماتَ بوئن.

سوال مرده انَ زنده بوئن جی

¹⁸ بازین صَدّوقی فرقه عالمون که گوتن مرده أن زنده نبنن، عیسی ورجه بومَئن و اونه جی یکته سوال بودَن، بوتن:

¹⁹ «اوستاد، موسی پیغمبر اَمه به بنویشته که اگه یکته مَرداک برار بمیری و اونه زناک زاک نداشته بی، او مَرداک باید او بیوه زناک به زنی بگیری تا یکته نَسل، خوشِ برار به باقی بَنای.

²⁰ هفت ته برار بوئن. اولی برار یکته زناکِ بیته، و بی زاک بمورده.

²¹ دومی برار اونه بیوه زناکِ به زنی بیته، امّا اونم بی زاک بمورده. سومی برار هم هیطو بوبوُ.

²² هیطوری، هیتّه او هفت ته برار هیچ زاکی خوشونه به بجا ننائن. سرآخر، او زناکم بمورده.

²³ ألؤن، او روز که مورده أن زنده بنن، وقتی که اوشون هنده زنده بنن، او زناک کویکته زن بنه، چونکه هر هفت ته برار اونه به زنی بِیته بُن؟»

²⁴ عیسی اوشونِ بوته: « مگه شمه هی گب نشون ندئنه که شمه چقدر گمراه ایسین، چونکه نه مقدس بنویشتأن شمه حالی بنه و نه هیچی خدا قدرتَ جی دوئنین؟

²⁵ چونکه او زمون که مُرده أن زنده بنن، نه زن گینَن و نه مَردهِ بنَن بَلکه آسمؤن فرشته أن مورسؤن بنن.

²⁶ امّا مُرده أنِ زنده بوئنِ باره، مگه موسی کِتاب میئن نوخوندین که تیفِ جریون میئن، چُطو خُدا اونه بفرماسّه: ”مو ایسَم ابراهیم خُدا و اسحاق خُدا و یعقوب خُدا“؟

²⁷ خُدا مُرده أن خُدا نیه، بَلکه زنده أن خُدا ایسّه. شمه کامیلا گمراه ایسین!»

پیله ترین حُکم

²⁸ یکته تورات معلمون اونه نزدیک بومه و اوشونِ گبؤن بشتؤسه. وختی بده که عیسی چنی خوب اوشونه جواب بدا، اونای بپورسه: «کویکته حُکم، همته جی مهمتر ایسّه؟»

²⁹ عیسی اونه بفرماسّه: «مهمترین حُکم ایی ایسّه: ”گوش بدی، ای اسرائیل، أمه خُداوندْ خُدا، یکته خُداوندْ ایسّه.

³⁰ و تو، تی خُداوندْ خُدا با تمام دیل أمره و تموم جؤن أمره و تموم فکر أمره و تموم قوّت أمره دوست بدار.“

³¹ دوّمی حُکم ایی ایسّه: ”تی همسایه تی مورسؤن دوست بدار.“ ایی دو ته حکمای پیله تر نَنَه.»

³² او تورات معلم عیسی بوته: «درست بوتی، اوستاد! راست راست که خُدا یکته ایسّه و بغیر از او هیچ خُدایی ننه،

³³ و خدا تمام دیل أمره و تمام عقل أمره و تمام قوّت أمره دوست داشتَن و ای کی تی همسایَه تی مورسؤن دوست بداری، همته پیشکشؤن و تموم سوج قربانی أن جی مهمتر ایسّه.»

³⁴ وختی عیسی بدِه که او تورات معلم چه قدر عاقلونه جواب بَده، اونه بفرماسّه: «تو خُدا پادشایی جی دور نیسای.» بازین، دِه هیشکس نیارَست هیچّی عیسی جی بپورسی.

مسیح موعود کی ریکه ایسّه؟

³⁵ هووخت که عیسی معبد صحن میئن، تعلیم داءدبو، بپورسه: «چُطویه که تورات معلمون گونن مسیح موعود داوود پادشاه ریکه ایسّه؟

³⁶ داوود خودوش، روح‌القدس هدایت أمره بوته: ”خُداوند، می خُداوندِ بوته: «می راست دَس وَر بنیش تا او زمونی که تی دُشمنؤن تی پا جیر تودئنم.“

³⁷ داوود پادشاه خودوش، اونه خُداوند دوخبِئنه، پس او چُطو تینه داوود ریکه بَبی؟» خیلی جمعیت که اوره ایسابوئن، ذوق أمره عیسی گبؤنِ گوش دَئن.

تورات معلمون اجی دوری بکوئنین

³⁸ عیسی خو تعلیم دئنِ موقع بفرماسّه: «تورات معلمون جی دوری بکونین، اوشون دوست دَئنَن درازَ عبا أمره راه بوشوئن و مَردم کوچه و بازار میئن اوشونه سلام بوگؤن،

³⁹ و عبادتگاه أن میئن بهترین جاجیگه بَدارَن و مِیمؤنی أن میئن مجلس جور بنیشَن.

⁴⁰ اوشون یه طرف بیوه زناکون خونه أن دُزدی کؤئنَن و یه طرف دیگرای، ریا واسه، خوشونِ دعا درازِه دِئنَن. ایشونِ محکومیت خیلی پیله ترَ بنه.»

ندار بیوه زناک پیشکش

⁴¹ عیسی معبدِ بیت المالِ صوندوقِ جلو بنیشته و او مَردمی نیگاه گود که پول صوندوقِ میئن تؤدادبون. خیلی از پولدارؤن پیله پیله پول هدَئن.

⁴² بازین یکته ندار بیوه زناک بومه و دو قِرؤن صوندوق میئن تودَه.

⁴³ عیسی خو شاگردؤنِ دوخُنده و ایشونِ بوته: «راست راستِ، شمره گونَم، ایی ندار بیوه زناک همۀ اوشونَ جی که صوندوق میئن پول تَودَه درن، بیشتر هَدَه.

⁴⁴ چونکه اوشون همته خوشونِ زیادیِ دارایی جی هَدَئن، امّا ایی زناک، خو نداری میئن، هرچی که داشت، یعنی تمؤم خو روزیِ هَده.»