مَرقُس 11 - کتاب مقدس به زبان گیلکی - گویش شرقی

عیسی شاه مورسون اورشلیم میئن شنه

¹ وختی بِیت فاجی و بِیت‌عَنْیا دهاتِ که اورشلیمِ شهر نزدیکی، و زیتون کوه میئن هنه بو برسِئن، عیسی دو نفر خوشِ شاگردؤنِ سرا دا

² و عیسی اوشونه بوته: «او دهاتی که شیمه راه سر هَنّه، بشین. هیطوکه دیرون بوشوین، یکته خر کُرّه دَوَسّه پیدا کوئنین که تا الؤن هیشکس اونه سر سوارَ نوبؤ. اونه بازَ کُونین و بأرین.

³ اگه یه نفر شمرای بپورسه: ”چرِه ایطؤ کأدرین؟“ بوگوین: ”خُداوند اونه احتیاج دائنه و درجا شمه به وگردونه.“»

⁴ او دوته شاگرد بوشؤئن، و کوچه دیرون یکته خر کره بیاتّن که یکته درِ ورجه دَوَسته هنّه بو. اونه بازَ گودَن.

⁵ بعضی أن که اوره ایسَه بوئن بوتن: «چرِه خر کُرّه بازَ کأدرین؟»

⁶ او دوته شاگرد هیطو که عیسی ایشونِ بوته بو، بوتن؛ پَس اوشونی که اوره ایسابوئن بگذاشتن که ای دونفر بشن.

⁷ شاگردون خر کُرّه عیسی ورجه بأردن، خوشونِ رداأنِ اونه سر بنئن، و عیسی سوارَ بو.

⁸ خیلی از مَردم هم خوشونِ عبانه اونه راه سر وارگنِئن و یسری هم ولگ دار خالؤنیِ که هو دور و بر زمینون اجی ببِئه بوئن، راه میئن وارگنِئن .

⁹ اوشونی که عیسی پیش دکته شوئدبون و اوشونی که عیسی دومبالتر آمائدبون، فریاد زِئن و گوتَن: «نجات بدی!» «مبارک ایسّه، او که خداوند ایسم أمره هنه!»

¹⁰ «مبارک ایسّه امه پئر داوود پادشاهی که اَمَئدره!» «نجات آسمون گوف میئن!»

¹¹ عیسی اورشلیم شهر بومه و معبد دیرون بُشو. اوره خوش دور و بر همه چیِ نیگاه بوده، امّا چون که دیر وخت بو او دوازدته شاگرد أمره بیت عَنیا سو بُشو.

عیسی انجیل دار نفرینه کوئنه

¹² فردایی، وختی که بِیت‌عَنْیا جی شوئدبو، عیسی وشته بوبوُ.

¹³ دورادوری یکته انجیل دار بدِه که وَلگ داشت؛ پَس جلو بُشو تا بَینه انجیل دئنه یا نه. وختی انجیل دار نزدیک بوبو جز وَلگ هیچّی اونه سر نیاتّه، چونکه هله انجیل فصل نَبو.

¹⁴ پَس عیسی او انجیل دارِ بوته: « دِه هَرگی هیشکس ته جی میوه نخوری!» اونه شاگردؤن اینه بِشتوئسَن.

عیسی معبد تمیزَ کوئنه

¹⁵ اوشون اورشلیم شهر برسِئن، عیسی معبد میئن بوشو و اوشونی که اوره کاسبی گودَن، بیرونَ گوده. عیسی صَرافون تختؤن و کبتر فروشؤن بساط فگردؤنه

¹⁶ و نوگذاشته هیشکس خو اسبابِ بوردن به معبد صحن میئنای ردَّ بی.

¹⁷ بازین اوشونه تعلیم بدا و بوته: «مگه مقدس کیتابون میئن بنویشته نوبؤبو که، «”می خونه همته قومؤن به دوعا خونه، دوخونده بنه“؟ امّا شمه اونه ’دوزؤن لونه‘ چاگودین.

¹⁸ کاهینؤن سرؤن و تورات معلمون هیطو که اینه بشتؤسَن، یکته راه دومبال بوئن که عیسی بکوشَن، چونکه اونای واهیمه داشتن، چرِه که جَمعیت همه، عیسی تعلیم دَئن جی حیرونا بوئن.

¹⁹ وختی غروب بوبوُ، عیسی و شاگردؤن شهر جی بیرون بوشؤئن.

²⁰ صوبه دَم، راه میئن، انجیل دار بدِئن که بنه جی خُشکا بؤ بو.

²¹ پِطرُس، او جریونِ به‌ خاطر بأرده و عیسی بوته: «اوستاد، نیگاه بکون! او انجیل دارِ که نفرین بودی، خُشکَ بو.»

²² عیسی جواب بَدَه: «خُدا ایمؤن بدارین.

²³ راست راستِ، شمره گونَم، اگه یه نفر ایی کوه بوگوی بَکنَده ببو و دریا میئن باگده بَبو،“ و خوشِ دیل میئن شک نکونی بَلکه ایمؤن بَداری اوچی که گونه هوطو بنه، اونه به انجوم بنه.

²⁴ پَس شمره گونَم، هر چی دوعا میئن بخوائین، ایمؤن بَدارین که اونه هیتین، اون شیمه شی بنه.

²⁵ «پَس هر وخت که دوعا کأدرین، اگه یه نفر جی یه چی شیمه دیل میئن دَئنین، اونه بَبَخشین تا شیمه پئر هم که آسمؤن میئن ایسَه، شیمه تقصیرات بَبَخشی.

²⁶ ولی اگه شمه نبَخشین، شیمه پئر هم که آسمؤن دیرون ایسَه، شیمه تقصیرون نبَخشنه.

عیسی حق و اختیار

²⁷ اوشون یه بار دِه اورشلیم شهر بومَئن. هووخت که عیسی معبدِ میئن قدم زئدبو، کاهینون سَرؤن و تورات معلمون و شیخؤن اونه ورجه بومَئن،

²⁸ اوشون عیسی جی بپورسِئن: «به چی حقی، ایی کارؤنِ کوئنی؟ کی تَه ایی حق و اختیارِ هَده که ایی کارؤنِ بکونی؟»

²⁹ عیسی جواب بده: «منم شمرای یکته سوال دَئنَم. مَه جواب بدین تا منم شمره بوگؤم چی حقی أمره ایی کارؤن ‌کوئنم.

³⁰ یحیی غسل تعمید خدا جی بو یا آدمِ جی؟ می جوابِ بَدین.»

³¹ اوشون خوشونِ میئن بُگو مگو بوُدَن، بوتَن: «اگه بگیم ”خدا جی بو“، گونه، ”پَس چرِه اونه ایمؤن نأردین؟“

³² اگه بگیم ”آدمَ جی بو“...»- اوشون مردوم واهیمه داشتن، چونکه همته باور داشتن که یحیی یکته واقعی پیغمبر ایسه.

³³ پَس ایشون عیسی جواب بَدَئن: «نودونیم.» عیسی بوته: «منم شمره نگونَم چی حقی أمره ایی کارؤنِ ‌کوئنم.»