مَرقُس 10 - کتاب مقدس به زبان گیلکی - گویش شرقیتعلیم طلاق باره 1 عیسی کفرناحوم شهرِ ترک بوئده و او طرف اُردن روخؤنه و یهودیه بشوء. یه بار دِه جَماعت اونه ورجه جومَه بوئن، و اونم بنا به خوشه عادت، اوشونه آمُوتی. 2 فَریسی فرقه عالمون اونه ورجه بومَئن و اونه امتحون گودن وَسه اونای بپورسئن: «شرعا درست ایسّه که مَرداک خوشِ زناک طلاق بدی؟» 3 عیسی جواب بده: «موسی پیغمبر چی حُکمی شمره هَدَه؟» 4 اوشون بوتَن: «موسی اجازه بدَه که مَرداک یکته طلاق نومه بنویسی و خو زناک ویلَه کونی.» 5 عیسی اوشونه بفرماسّه: «موسی شیمه سنگدلی واسه ایی حُکمَ شمه به بنویشته. 6 اما از هو اول که دنیا خلق بوبو، خُدا ”ایشونِ مَرداک و زناک بساته.“ 7 و هینه واسه مَرداک خوشِ پئر و مَئر جی سیوا بنه و خوشِ زناک چسبنه 8 و او دوته یکته تن بنن.“ پس اوشون دِه دوته نیئن، بَلکه یکته ایسّن. 9 هینه واسه اوچیزیکه خُدا جفت کوئنه، آدمی نباید سیوا بوکونه.» 10 وختی که عیسی و اونه شاگردون خونه میئن ایسابوئن، شاگردؤن یه باردِه ایی قضیه باره عیسی جی بپورسه ئن. 11 عیسی بفرماسّه: «هر کس خو زناکِ طلاق هدی و یکته دیگه زناکِ هگیری، در حقِ خوشِ زن زنا بوده. 12 و اگه یکته زناک خو مرداکَ جی طلاق هگیری و یکته دیگری مردِ ببی، زنا بوده.» عیسی و زاکؤن 13 مَردم، زاکؤنِ عیسی ورجه آردَن تا اوشونه سر دَست بنای و اوشونه برکت بدی. امّا شاگردؤن مَردم تشر بزئن. 14 ولی عیسی هیطو که اینه بده، برزخَ بؤ و خو شاگردؤن بوته: «بدارین کوشتای زاکون می ورجه بائن اوشونِ جُلُوئه نگیرین، چونکه خُدا پادشاهی ایجور کَسؤن شی ایسّه. 15 راست راستِ، شمره گونَم، هر کس خُدا پادشاهی یکته زاک مورسؤن قبول نکونی، اونه میئن نشنه.» 16 هووخت زاکؤنِ کیشایته، اوشون سر دَس بَنه و ایشونِ برکت بدا. دارا جوؤن 17 وختی عیسی راه دکته، یکته مَرداک بُدو بُدو بومه، عیسی جلو زانو بزِه و بپورسه: خُوروم اوستاد، چی بُکونم تا ابدی زندگیِ وارث بوبوم؟» 18 عیسی جواب بده: «چرِه مَه خُوروم دوخبِئنی؟ هیشکس خوروم نیه بغیر از خُدا. 19 حُکمؤن دؤئنی، قتل نکون، زینا نَکون، دوزی نَکون، دروغ گوائی ندی، فریبکار نبو، تی پئر و مَئر احترؤم بنی.“ 20 او مَردکای جواب بده: «اوستاد، همۀ ایشونِ از وختی که جوؤن بوم تا الون انجؤم بدَئم.» 21 عیسی محبت أمره اونه نیگاه بوده و بوته: «تو یه چی کم دئنی بَشو هرچی دئنی بَفروش و او پولِ فقیرؤنِ هَدی که آسمؤن میئن گنج دئنی. بازین بیه و مَه دومبال بکون.» 22 او مردکه ایی گب جی ناامیدَ بو و غصه دار اورای بُشو، چونکه خیلی مال و مینال داشت. 23 عیسی دور بر نیگاه گوده، خوشه شاگردؤن بوته: «چنی چی سخت ایسّه که مالدارون خدا پادشاهیِ دیرون بوشوئن!» 24 شاگردؤن اونه گبؤنَ جی ماتَ بوئن. اَما عیسی یه بار ده اوشونه بوته: «زاکون، خدا پادشاهیِ دیرون شوئن چنی چی سخته! 25 شترِ ردّه بوئن، سوزن سولاخای سهلتره تا مالدار آدمِ دیرون شوئن، خُدا پادشایی میئن.» 26 شاگردؤن که خیلی ماتَ بوبوئن، عیسی بوتَن: «پَس کی تینه نجات پیدا کونی؟» 27 عیسی ایشونِ چال بزه و بوته: «ایی، آدمِ بِه غیر ممکنه، ولی خدا به ایتو نیه؛ چونکه خدا به همه چی ممکنه.» 28 پَطرُس بینا بوده گب زئن و بوته: «بَین اَمه همه چی ویلَه گودیم و تَه دومبال کأدریم.» 29 عیسی بفرماسّه: «راست راستِ، شمره گونَم، هیشکس نیه که می وسه و انجیل وسه، خونه یا برارون یا خاخؤرؤن یا مَئر یا پِئر یا زاکون یا خو زمینون ویلَه گوده بی، 30 و ایی دنیا میئن صد برابر بیشتر خونه أن و برارؤن و خاخؤرؤن و مارؤن و زاکؤن و مال و مینال، اذیت و آزار أمره بدست ناری، و او دونیا دیرون هم ابدی زندگی اونه قسمت نبی. 31 امّا خیلی أن که اوّلی ایسّن آخری بنن، و آخری أن اوّلی!» عیسی پیشگویی سومین بار خودشه مردن و زنده بوئن باره 32 عیسی و اون شاگردون اورشلیم شهر راه میئن ایسابوئن و عیسی ایشونِ پیش دکته راه شوئدبو. شاگردؤن ماتَ بوبوئن و اوشؤنی که ایشون دومبالسر شوئدبون، واهیمه داشتن. عیسی یه بار ده او دوازده شاگرده یکته کنار بَبورده و اوچیزیکه باء اونه سر بای، اوشونه به بوته. 33 عیسی بفرماسّه: «بَینین، اورشلیم سو شوئدریم. اوره انسون ریکه، کاهینون سَرؤن و تورات معلمونِ، تسلیمَ کوئنَن. اوشون اونه موردَن به محکوم کوئنَن و غیر یهودی أن دَست هدِئنن. 34 اوشون اونه روشخنه گینَن، فیلی اونه سر فوکوئنَن و اونه شلاق زِئنَن و کوشنَن. امّا سُه روز بعد اون زنده بنه.» یعقوب و یوحنا درخواست 35 زِبدی ریکاکؤن، یعقوب و یوحنا، عیسی ورجه بومَئن و بوتَن: «اوستاد، خواهیش کوئنیم اوچیکه ته جی خوائنیم، اَمه به انجوم بدی!» 36 عیسی ایشونِ بوته: «چی خوائنین شیمه به بَکونم؟» 37 اوشون بوتَن: «اجازه بدی که تی جلال میئن، یکته از أمه تی راست دست و اویکته هم تی چپ دست ور بنیشیم.» 38 عیسی اوشونِ بفرماسّه: «شمه نودوئنین چی خوائنین. شمه تینین از او جامی که مو وودوشَنَم، وودوشین؟ و غسل تعمیدی که مو گینم، هَگیرین؟» 39 اوشون بوتَن: «بله، تینیم.» عیسی بفرماسّه: «از او جامی که مو وودوشَنَم، وودوشَنین و او تعمیدی که مو گینَم، هگینین. 40 امّا می راست دست و چپ دست طرف نیشتن، می اختیار نیه تا اونه یه نفر هدئم. ایی جیگا اوشؤن شی ایسّه که اوشونه به حاضیرابو.» 41 وختی او دَه ته شاگرد، ایی اتفاق جی باخبرَ بوئن، یعقوب و یوحنا سر غیظَیتن. 42 عیسی ایشونِ دوخُنده و بوته: «شمه دوئنین اوشونی که قومؤن دیگه حاکمؤن دوخونده بَنَن ایشونِ سر آقایی کؤئنَن و اوشونه پیله ترؤن ایشونِ سر دستور دِئنَن. 43 امّا شمه میئن ایطؤ نبنه. هر کس خوائنه شمه میئن پیله ببی، باید شمه خدمتکار ببی. 44 و هر کس خوائنه شمه میئن اوّل بَبی، باید همه کسِ نوکر ببی. 45 چون که حتی انسون ریکه هم نومَه تا اونه خدمت بکونین، بَلکه بومه تا خدمت بکونی و خو جؤنِ أمره خیلی أنِ آزادی بها هدی.» عیسی کور بارتیمائوس شفا دئنه 46 هووخت اوشن اَریحا شهر دیرون بومَئن. وختی عیسی خوشِ شاگردؤن و خیلی جَمعیت امره اَریحا جی شؤدبون، یکته کور گدا به ایسمِ بارتیمائوس، اونه راه سر نیشته بو. بارتیمائوس،تیمائوسِ ریکه بو 47 هیطو که بارتیمائوس بشتؤسه عیسای ناصری ایسّه، داد بزه: «ای عیسی، داوود پادشاه ریکه، مِه به رحم بَکون!» 48 خیلی از مَردم اونه تشر بزِئن که تام بزَنی، امّا او بیشتر ژَگَله زی: «ای داوود پادشاه ریکه، مِه به رحم بکون!» 49 عیسی بیسه و بوته: «اونه دوخوئنین.» پَس او کور مَرداک دوخُوندَن، اونه بوتَن: تی دیل قرص بدار! ویریس که عیسی تَه دوخبِئنه.» 50 بارتیمائوس درجا خوشِ عبا یکته کنارَی تُؤدَه، واز بوده و عیسی ورجه بومه. 51 عیسی اونای بپورسه: «چی خوائنی ته به بَکونم؟» کور مرداک جواب بَدَه: «اوستاد، خوائنم می چیشمون بَینی.» 52 عیسی اونه بفرماسّه: «بَشو که تی ایمؤن تَه شفا بَدَه.» هو دَم او مرداک خوشِ بینائی هیته و عیسی دومبالسر راه دکته. |
@ 2024 Korpu Company