متّی 9 - کتاب مقدس به زبان گیلکی - گویش شرقیفلجِ مرداک شفا 1 پس عیسی نوئه سوارَ بوُ و اوطرف دریا، خوشِ شهر بوشو. 2 بازین یکته فلج مرداکِ که تخته سر خوته بو، اونه ورجه بأردن. عیسی وختی ایشؤنِ ایمؤنِ بدِه، فلج مردکا بوته: «تی دیل قورص ببی، زأک، تی گوناهؤن ببخشِئه بوبُو!» 3 هی موقع بعضی از تورات معلمون خوشؤنِ أمره بوُتن: «ایی مردکای کفر گونه.» 4 اما عیسی که دونَس اوشونه فکرون میئن چی گذرنه، بوته: «چرِء ایجور پلیدِ فکرِ شیمه دیل میئن راه دِنین؟ 5 کویکته گوتن سهلتره: ”تی گوناهؤن ببخشه بوبُو» یا ایکه ”ویریس و راه بوشو“؟ 6 الؤن اینه واسه که بدؤنین که انسؤنِ ریکه، ایی قدرت دئنه که زمینِ سر، گوناهونِ ببخشه»- فلج مردکاکه بوته:- «ویریس، تی جاجیگه ویگیر و بشو خؤنه.» 7 او مردکای ویریسا و بوشو خونه. 8 وختی مردوم ایی ایتفاق بدِئن، بترسه ئن و خدا، ستایش بودَن که ایجور قدرت آدمؤن ببخشه. عیسی متّی دعوت کوئنه 9 وختی عیسی اورای شوئدبو، یکته مردکه بدِه که اونه ایسم مَتّی بو که خراجگیر دکّه میئن نیشته بو. اونه بوته: «می دومبال بیأ!» مَتّی ویریسَه و اونه دومبالسر بوشو. 10 یروز عیسی متّی خؤنه میئن سفرهسر نیشته بو که، خیلی از خراجگیرؤن و گناهکارؤن بومئن و عیسی و اونه شاگردؤنِ اَمره همسفره بوُبوُئن. 11 وختی فریسی فرقه عالمون اینه بدِئن، اونه شاگردؤن بوُتن: «چرِء شیمه اوستاد خراجگیرؤن و گوناهکارؤنِ اَمره غذا خوردره؟» 12 وختی عیسی اینه بشتؤسه، بوته: «ناخوشؤن ایسّن که طبیب احتیاج دئنن، نه سالمؤن. 13 بشین و معنی ایی کلامِ بفهمین که، ”رحمت خوائنم، نه قربؤنی.“ چونکه مو صالحونِ واسه نومَئم بلکه بومَئم گناهکارونِ دعوت بکونم.» سوال روزه واسه 14 بازین یحیی شاگردؤن، عیسی ورجه بومئن و بوُتن: «چرِء أمه و فریسی ان روزه گینیم، ولی تی شاگردؤن روزه نگینن؟» 15 عیسی جواب بده: «مگه بنه عروسی مَیمونؤن، تا وختی که، داماد ایشؤنِ اَمره ایسأ، عزاداری بکونَن؟ امّا زمونی رسنه که داماد ایشونَ جی هیته بنه، هوزمون روزه گینن. 16 هیشکس تازه پارچه، کهنه رختِ پینَک نزِئنه، چونکه پینَک رختَ جی بکَنده بنه و پئرَهگی بدتره بنه. 17 و تازه شرابِ کهنه خیکؤن میئن دونکوئنَن، چونکه خیکون پئره‌بنن و شراب فبنه و خیکؤن از بین شنن. تازه شرابِ تازه خیکؤن میئن دوکُئنن تا هر دوته سالم بمؤنن.» ناخوش زنائک شفادئن و یایروس لاکوئه زنده گودن 18 حله عیسی ایی گبونِ اوشونه بِه زِدبو که یکته از رئیسؤن اونه ورجه بومَه و اونه جلو زانو بزه و بوته: «می لاکوی هی الؤن بمورده. ولی بیه و تی دستِ اونه رو بنی که زنده بنه.» 19 عیسی ویریسه و خو شاگردونِ أمره اونه دومبال بوشو. 20 هی موقع، یکته زناک که دوازده سال خونریزیای زجر کشئده بو، پشت سرا جی عيسی نزدیک بوُ و اونه ردا لبه دست بکشه. 21 چونکه او زنکای خوشِ امره بوته بو: «اگه حتّی اونه ردا پره دست بزنم، شفا هگینم.» 22 عیسی وگرسه، اونه بدِه و بفرمأسّه: «لاکو، تی دیل قورص ببی. تی ایمؤن تَه شفا بدا.» هو وقتاجی، او زناک شفا بیته. 23 وختی که عیسی او رئیسِ خونه میئن بوشؤ، نوحه خونؤن و کسونییه بدِه که ونگ زئده بُون. 24 بفرماسته: «بشین بیرون. لاکو نمورده، بلکه خوته.» امّا اوشؤن اونه بِه خنده بودَن. 25 وختی مردومِ بیرونَ گودَن، عیسی دیرون بوشؤ و لاکؤکه دستِ بِیته و اونم ویریسا. 26 ایی اتفاق خبر سرتاسرِ او منطقه مِیئن فیبیته. دوته کورِ شفا 27 وختی که عیسی اورای شوئدبو، دوته کورِ مردکای، تاتأدی اونه دومبالسر بوشوئن و داد زِئن: «داوودِ ریکه، اَمه به رحم بکون!» 28 وختی عیسی خونه بوشو، او دوته کورِ مردکای اونه ورجه بومئن. عیسی اوشؤنای بپورسه: «ایمؤن دَئنین که تینم ایی کاره انجوم بدِئم؟» جواب بدئِن: «بله، آقا.» 29 بازین عیسی اوشونه چیشمونِ سر دست بکشه و بوته: «بنا به شیمه ایمؤن، شیمه بِه انجؤم ببی.» 30 هوموقع اوشونه چیشمون بازَ بوُ. عیسی اوشونِ اصرار اَمره، اَمر بفرماسته: «مراقب ببین که کسی از ایی اتفاقَ جی واخُوبَ نبی.» 31 امّا اوشؤن بیرون بوشوُئن و اونه تمؤمِ او منطقه میِئن نامدارَ گودَن. 32 هوموقع که اوشؤن بیرون شوئودبون، یکته لالِ مردکاکه که دیوبزه بو، عیسی ورجه بأردن. 33 وختی عیسی دیوِ اونه مِئنای بیرونَ گوده، او لالِ مردکه زبؤن، بازَ بوُ. مردوم غاغه بو گوتَن: «اسرائیلِ میئن هیچوقت ایطو چی بدِه نوبؤبو!» 34 امّا فریسی ان بوُتن: «او دیوؤنِ، دیوؤن رئیس کمک أمره بیرونَ کؤئنه.» کارگرؤن کَم ایسّن 35 عیسی همه‌ء شهرؤن و دهاتؤن میئن گرسی و اوشونه عبادتگاه أنِ میئن مردوم آموتی و پادشاهی خوروم خبر دائ و هر ته درد و ناخوشیِ شفا دأئ. 36 وختی شلوغیِ جمعّیتِ بدِه، اونه دیل اوشونه بِه بسووته، چونکه گوسندؤنِ بی چوپؤن مورسؤن پریشؤن و وامؤنده بؤئن. 37 پس خوشِ شاگردؤنِ بوته: «محصول زیادِ، ولی کارگر کم. 38 پس، صاب محصولَ جی بخواین خو محصول بِئنِ به کارگرونِ سرادای.» |
@ 2024 Korpu Company