متّی 3 - کتاب مقدس به زبان گیلکی - گویش شرقیتعمید دهنده یحیی، مسیح راه آبادَ کوئنه 1 هو روزؤن میئن تعمید دهنده یحیی ظهور بُوده. او، یهودیّه بیابؤن میئن موعظه گود 2 و گوت: «توبه بکونین، چونکه آسمونِ پادشاهی نزدیکه!» 3 یحیی هونی ایسه که، ِاشعیای پیغمبر اونه باره گونه: «صدای او مردی که بیابؤن میئن فریاد زِئنه: ”خداوندِ راهِ آبادَ کونین! اونه مسیرؤنِ هموارَه کونین!“» 4 یحیی شتر پشمای رخت دؤود و یکته چَرمی غیش خوشِ کمر دوَست و اونه غذا مَلَخ و صحرایی عسل بو. 5 اورشلیم مردومؤن و تمؤم یهودیه و اُردن روخؤنه کنارِ دوروبر، همته اونه ورجه شوئن 6 و خوشؤنِ گوناهونِ اعتراف گودن و اُردن روخؤنه میئن اوناجی غسل تعمید گیتن. 7 امّا یحیی وختی بدِه که خیلیأن از فریسی فرقه عالمون و صَدّوقی فرقه عالمون اوره که او تعمید دای اَمَه دبون، اوشونِ بوته: «ای افعی بزاسّه أن! کی شمره واخُوبَ گوده تا از غضبی که پیش اَمئدره، دربشین؟ 8 پس شیمه عملِ أمره نیشون بدین که راست راستِ توبه بودین. 9 و شیمه أمره نوگوین ”امه جدّ ابراهیمِ“، چونکه شمره گونم خدا تینه ایی سنگونای، ابراهیم بِه زاکؤن بوجود بأری. 10 حتی الؤنم تؤر، دِه دارؤنِ بنه سر بنَه بوبُو. هینه واسه هرته دار که خوب بار نأری، ببِئه بنه و آتش میئن بَئگنِه بنه. 11 «مو شمره توبه وسه آؤ اَمره غسل تعمید دِئنم؛ امّا اونی که بعدِ مو هنه می جی قویتره، مو حتّی قابیل نیَم اونه چاروقؤنِ جفتَ کونَم. او شمره روحالقدس و آتش اَمره تعمید دِئنه. 12 او خو چنگه خو دست میئن دئنه و خوشِ خرمن دوجِئنه و خوشِ گندوم کندوج میئن ذخیره کوئنه. امّا کولوشِ آتش میئن که، هرگی دکوشؤئنه نبنه، سوجبِئنه.» عیسی تعمید 13 بازین عیسی جلیل جی اردنِ روخونه کنار بومَه تا یحیی جی تعمید بگیری. 14 ولی یحیی حقسَعی بُوده تا اونه جلوئه بگیری و اونه بوته: «مو ایسّم که باء تی جَی تعمید بگیرم، الؤن تو می ورجه هنی؟» 15 عیسی اونه جواب میئن بوته: «بدار الؤن ایطؤ ببی، أمَه به درست تر اینه که خدا حوکمونِ تمؤم و کمال بجا بأریم.» پس یحیی راضی بوبؤ. 16 وختی عیسی تعمید بَیته، درجا آؤَجی بیرون بومَه. هو دَم آسمؤن بازَ بوُ و یحیی خدا روحِ بدِه که، کبتره مورسون جیر بومَه و عیسی سر بنیشته. 17 بازین یکته صدا آسمؤنای برسه: «اینه می عزیز ریکه که، اوناجی راضی أم.» |
@ 2024 Korpu Company