متّی 19 - کتاب مقدس به زبان گیلکی - گویش شرقیعیسی طلاق دئنِ باره چی گونه؟ 1 وختی که عیسی ایی گبؤنِ تمنه گوده، جلیل ولایت میئنای بوشو و اوطرف اُردن روخونه جَی یهودیّه سامؤن میئن بومَه. 2 جمعیت زیادی اونه دومبالسر راه دکتن و عیسی اوشونه اوره شفا بده. 3 فریسی فرقه عالمون اونه ورجه بومَئن تا اونه امتحؤن بکونَن. اوشؤن بپورسِئن: «شرعا درست ایسّه که، مرد به هر دلیلی خوشِ زناکِ طلاق بدای؟» 4 عیسی جواب بده: «مگه تورات میئن نوخُندین که، خالقِ ایی دنیا از اوّل ایشونِ مرد و زن خلق بُوده، 5 و بوته: ”هینه وسه مرداک خو پئر و مئره ورجای شنه، و خوشِ زنِ امره جفتَ بنه و او دوته یکته بنن“؟ 6 هینه واسه، بازین دِه دوته نییَن، بلکه یکته تن بنن. پس اوچیزیکه خدا جفتَ کوئنه، آدمی نباسی سیوا بکونی.» 7 اوشون عیسی بوتَن: «پس چرِء موسی اَمر بفرماسّه که مرد خوشِ زنِ طلاقنؤمه هدأی و اونه ویله کونی؟» 8 عیسی بوته: «موسی شیمه سنگ دیلِ وَسه اجازه بدا که، شیمه زناکؤنِ طلاق بدین، امّا از اوّل ایطؤ نبو. 9 شمره گونم هر کس خوشِ زنِ به هردلیلی به جز خیانت طلاق بدای و یکته زنِ دیگه بگیری، زنا بُوده.» 10 شاگردؤن عیسی بوُتن: «پس اگه مرد خو زنِ أمره ایطو بکونی، ازدواج نؤدَن بهتره!» 11 عیسی بوته: «هرکس منِئه ایی گبِ قبول بکونی، مگه کسؤنی که، اوشونه هَدَه بوبو بی. 12 چونکه بعضیین خواجه أن، چرِء که خوشؤنِ مئره شوکُمای ایطوری بچِه بوبوئن؛ و بعضی دیگه هم مردوم دست أمره خواجه بوبوئن؛ و بعضی‌ینم آسمون پادشاهی وسه خوشون خواجه بودونسَن و عروسی گودنای بوگذشتن. هر کس تینه اینه قبول بکونی، بدار هیطو بکونی.» عیسی و کوشتای زاکؤن 13 بازین مردوم کوشتای زاکؤن عیسی ورجه بأردن تا اوشونه سر دست بنای و دعا بکونی. امّا شاگردؤن مردومِ تشر بزئن. 14 اما عیسی بوته: «بدارين کوشتای زأکؤن می ورجه بأن و ایشؤنِ جلوئه نگیرین. چونکه آسمونِ پادشاهی ایجور کسونِ شِه!» 15 پس اوشونه سر دست بنه و اورای بوشو. جوؤن پولدار 16 یته روز، یکته مردکه عیسی ورجه بومَه و بپورسه: «اُوستاد، چی خوروم کاری انجوم بدَئم تا ابدی زیندگیِ بدأرم؟» 17 عیسی جواب بده: «چره می جَی پورسنی که چی خوبه؟ فقط یکته ایسّه که خوروم ایسّه. اگه خوأنی زیندگی میئن بشی، حوکمؤنِ بجا بأر.» 18 او مردکای بپورسه: «کو حوکمؤنِ؟» عیسی بوته: «”قتل نکون، زنا نکون، دوزی نکون، دروغ گوایی ندی، 19 تی پئر و مئره احتروم بنی،“ و تی همسایه تی مورسؤن محبت بکون.“ 20 او جوؤن بوته: «همه ایی حوکمونِ بجا بأردم؛ ده چی کم دَئنم؟» 21 عیسی جواب بده: «اگه خوأئنی کامل ببی، بشو و هرچی که دَئنی بفروش و اونه پولِ ندارؤنِ هدی که، آسمون میئن گنج دئنی. بازین بیه و مَه دومبالَ کون.» 22 وختی جوؤن اینه بشتؤسه، غُصه دارَ بوُ و اورای بوشو، چون که خیلی مال و مینال داشت. 23 بازین عیسی خو شاگردؤنِ بوته: «راست راستِ شمره گونم که، آسمونِ پادشاهی میئن شوئن، پولدأرؤنِ بِه خیلی سخته! 24 هنده شمره گونم، شترِ ردّه بوئن سوزنِ سولاخای سهلتره تا مالدار آدمِ دیرون شوئن خدا پادشاهی میئن!» 25 وختی شاگردؤن ایی گبِ بشتوسَن خیلی ماتَ بوئن و بپورسِن: «پس کی تینه نجات پیدا کونی؟» 26 عیسی ایشؤنِ نیگاه بُوده و بوته: «ایی، آدمِ بِه غیر ممکنه، امّا خدا به همه چی ممکنه.» 27 هوموقع پطرس بوته: «بَین، أمه همه چیه ویله گودیم و تَه دومبالَ کوئنیم. چی چی امه گیر هنه؟» 28 عیسی ایشؤنه بوته: «راست راستِ شمره گونم که تازه دنیا میئن، وختی که انسونِ ریکه خوشِ جلال تخت سر بنیشته، شَمَرَم که مَه دومبالَ گودین، دوازده ته تختِ سر نیشنین و دوازده ته اسرائیلِ قبیله سر حکومت کوئنین. 29 و هر کس می ایسمِ وسه، خوشِ خونه یا برأر یا خاخور یا پئر یا مَئر یا زأک یا خو زمینِ ویلَه گوده بی صد برابر هگینه و ابدی زیندیگیِ بدست ابِنه. 30 امّا خیلیین که اولی ایسّن، آخری بنن و آخری أن اوّلی! |
@ 2024 Korpu Company